जाजरकोट- गाउँगाउँमा स्वास्थ्य सेवा उपलब्ध गराउने उद्देश्यले रुकुमपश्चिमको चौरजहारी नगरपालिका–१० नेपानेमा पाँच शय्याको शहीदस्मृति नगर अस्पताल निर्माण गरिएको छ।
अस्पतालले नगरपालिकाका वडा नं. १०, ११, १२, १३ र १४ सहित सल्यानको दार्मा गाउँपालिकाका बिरामीलाई उपचार सेवा प्रवाह गर्ने नगरप्रमुख विशाल शर्माले जानकारी दिए। अस्पताल निर्माणका लागि स्थानीयवासी टेकबहादुर बुढाथोकी र ममी बुढाथोकीले छोरी ललिता बुढाथोकीको स्मृतिमा पाँच रोपनी जग्गा दान गरेका थिए।
नवनिर्मित अस्पतालमा डा विवेक केसीको नेतृत्वमा २२ स्वास्थ्यकर्मी परिचालित हुनेछन्। नियमित आकस्मिक सेवाका साथै प्रयोगशाला, डिजिटल एक्सरे, भिडियो एक्सरे, फार्मेसी, इसिजीलगायत सेवा सो अस्पतालबाट उपलब्ध हुनेछ।
अस्पतालको भवन निर्माण र उपकरण खरिदका लागि हालसम्म रु एक करोड ४६ लाख खर्च भएको छ। अस्पतालको भवन निर्माणमा ७१ लाख रूपैयाँ, उपकरण खरिदमा ५६ लाख रूपैयाँ र ल्याब सामग्री व्यवस्थापनमा १९ लाख रुपैयाँ खर्च भएको हो।
भवन निर्माणका लागि कर्णाली प्रदेश सरकारको प्रदेश पूर्वाधार क्षेत्र विकास कार्यक्रमले ६९ लाख रुपैयाँ खर्च गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।