सप्तरी- पूर्वमन्त्री डा डम्बरनारायण यादवको ८६ वर्षका उमेरमा आइतबार निधन भएको छ। महादेवा गाउँपालिका–३ बथनाहा निवासी डा यादवको विराटनगरस्थित विराट नर्सिङ होममा उपचारका क्रममा निधन भएको उनका भतिजा अजयले जानकारी दिएका छन्।
काठमाडौंमा बसोबास गर्दै आएका डा यादव एक महिनाअघि बथनाहास्थित घरमा आएर बसेका थिए। चार दिनअघि अचानक बेहोस भएपछि उपचारका लागि उनलाई विराटनगर लगिएको थियो। केही वर्षअघि मुटुको बाइपास सर्जरी गराएका डा यादवको मस्तिष्काघातका कारण निधन भएको अजयले बताए।
यादव २०३६ साल जेठ १८ गते तत्कालीन प्रधानमन्त्री सूर्यबहादुर थापा नेतृत्वको मन्त्रिमण्डलमा शिक्षा राज्यमन्त्री थिए। यसैगरी २०४० असार २९ गते लोकेन्द्रबहादुर चन्द नेतृत्वको मन्त्रिमण्डलमा उनी स्वास्थ्यमन्त्री रहेका थिए।
प्रजातन्त्र स्थापनापछि नेपाल सद्भावना पार्टीमा सक्रिय डा यादव मधेशी नागरिक समाजका अध्यक्षको हैसियतमा सामाजिक कार्यमा संलग्न रहेका थिए। उनको बथनाहास्थित पैतृक गाउँमा आइतबार साँझ दाहसंस्कार गरिने डा यादवको पारिवारिक स्रोतले जनाएको छ। यादवका एक छोरा र एक छोरी छन्। उनकी श्रीमतीको एक वर्षअघि निधन भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
