फाइल तस्बिर
बागलुङ- भारी वर्षा भइरहेका कारण मध्यपहाडी लोकमार्गको पर्वत– बागलुङ सडक पुनः अवरुद्ध भएको छ। पर्वतको कुस्मा नगरपालिका– १ सहस्रधारामा निरन्तर पहिरो झर्ने क्रम नरोकिएपछि दैनिक सडक अवरुद्ध हुँदै आएको छ।
गत मङ्गलबार रातिदेखि अवरुद्ध भएको सडक बुधबार दिउँसो ४ बजेपछि एकतर्फी चलेपनि रातिदेखि पुनः अवरुद्ध भएको जिल्ला प्रहरी कार्यालय पर्वतका प्रहरी निरिक्षक बुद्धिप्रसाद सुवेदीले जानकारी दिए। वर्षा नरोकिएकाले पहिरो खुलाउन सकिएको छैन।
सामान्य वर्षा हुनेबित्तिकै पहिरो ठूलो भएकाले ढुङ्गा र लेदो बगेर आउँछ। वर्षा हुँदा स्काभेटर प्रयोग गरेर हटाउन समेत कठिन भएकाले २० घण्टादेखि बाटो अवरुद्ध बनिरहेको उनले बताए। पाङ जोड्न सहस्रधारा-पाङ सडक निर्माण गरिएपछि सहस्रधाराका विभिन्न ठाउँमा पहिरो खसेको छ। सडक अवरुद्ध हुँदा यातायातका साधन घण्टौं रोकिने गरेका छन्। अहिले लामो दूरीका सवारी साधन खुलेपछि यात्रुको चाप बढेपनि अवरुद्ध हुँदा त्यसले यातयात व्यवसायी र यात्रु प्रभावित हुन पुगेका छन्।
सडक खुलाउन स्काभेटर तयारी अवस्थामा छ। दैनिक चारपाँच घण्टा स्काभेटर चलाएर सडक खुलाउँदा सडक निर्माणको जिम्मा लिएको लामा कन्ट्रक्सनले पनि थप आर्थिक भार व्यहोर्न बाध्य छ। लामा कन्स्ट्रक्सनका प्रोजेक्ट म्यानेजर गोविन्द भुसालका अनुसार डोजर परिचालनमा दैनिक पाँच हजार खर्च भइरहेको छ भने सडकमा खाल्डाखुल्डी पुर्ने काम पनि गर्न कठिन भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
