काठमाडौं- एक वर्षभन्दा बढी अवधिका व्यक्तिगत कर्जाको ब्याजदर अब बैंकहरूले परिवर्तन गर्न नपाउने भएका छन्। नेपाल राष्ट्र बैंकले व्यक्तिगत आवधिक कर्जाको ब्याजदर स्थिर बनाउने यस्तो व्यवस्था गरेको हो।
एक वर्ष भन्दा बढी अवधि भएका व्यक्तिगत आवधिक कर्जाको ब्याजदर परिवर्तन नहुने गरी स्थिर ब्याजदर कायम गर्न राष्ट्र बैंकले सबै बैंक तथा वित्तीय संस्थाहरूलाई निर्देशन दिएको छ।
नेपाल राष्ट्र बैंकले बैंक तथा वित्तीय संस्थाहरुका लागि जारी गरेको एकीकृत निर्देशन २०७६ संसोधन गर्ने क्रममा व्यक्तिगत आवधिक कर्जा प्रवाह गर्ने बैंकले एक वर्षभन्दा बढी भुक्तानी अवधि भएका प्रत्येक व्यक्तिगत आवधिक कर्जाको ब्याजदर भुक्तानी अवधिभर परिवर्तन नहुने गरी स्थिर ब्याजदर निर्धारण गर्नु पर्नेछ।
तर ग्राहकले स्वम्ले बैंकको आधार ब्याजर परिवर्तन हुँदा परिवर्तन हुने परिवर्तनीय ब्याजदरमा कर्जा लिन चाहेमा ग्राहकको अनुरोधमा परिवर्तनीय ब्याजदर कायम गर्न यो व्यवस्थाले बाधा नपुर्याउने समेत सो संशोधनमा व्यवस्था गरिएको छ।
यो व्यवस्था व्यक्तिको नाममा प्रवाह भएका हुने घर कर्जा, गाडी कर्जालगायतका मासिक वा कुनै पनि आवधिक किस्तामा भुक्तानी हुने गरी प्रवाह गरिएको हुने एक वर्षभन्दा बढी भुक्तानी अवधि भएका कर्जामा लागू हुने राष्ट्र बैंकको भनाइ छ।
बैंक तथा वित्तीय संस्थाहरुले निक्षेपको ब्याजदर मासिक रुपमा मात्रै परिवर्तन गर्न पाउने भएका छन्। नेपाल राष्ट्र बैंकको यो निर्देशन जारी हुनु पूर्व मासिक त्रैमासिक आवधिक किस्तामा भुक्तानी हुने गरी व्यक्तिको नाममा प्रवाह भएका कर्जालगायतका आवधिक कर्जाको हकमा ग्राहकको अनुरोधमा स्थिर ब्याजर कायम हुने गरी कर्जाका सर्तहरु परिवर्तन गर्नु पर्नेछ।
यसअघि नै कर्जा लिएका ऋणीले पनि यो व्यवस्थाको उपभोग गर्न सक्ने संशोधनमा स्पष्ट पारिएको छ। यो व्यवस्थाको अनुपालनका लागि कर्जाका सर्त वा भुक्तानी तालिका वा किस्ता रकममा भएको परिवर्तनलाई पुनर्तालिकीकरण वा पुनर्संचरना मानिने छैन।
बैंकहरुले प्रवाह गर्ने यस्तो किसिमको कर्जाको स्किम अर्धवार्षिक रुपमा मात्रै परिवर्तन गर्न पाउने छन्। यो व्यवस्थासँगै घर तथा गाडी कर्जा लिएका ऋणीले महिना महिनामा ब्याजदर परिवर्तनको मानसिक दबाब झेल्नु पर्ने छैन। यस्तो कर्जा प्रवाह गर्ने बैंकहरुले मनलाग्दी ब्याजदर तोक्ने तथा असुल गर्न पनि नपाउने भएका छन्।
यो व्यवस्थासँगै बैंकमा तरलता हुँदा सस्तो ब्याजदरमा विभिन्न व्यक्तिगत कर्जाका स्किम ल्याउने र केही समयपछि नै परिवर्तन गर्ने गलत प्रवृत्ति सदाका लागि अन्त्य भएको छ। कर्जा लिएको एक महिनापछि नै खुला बजारको धावा पिट्दै बैंकहरुले मनलाग्दी असुल गर्ने ब्याजदरलाई यसले नियन्त्रण गर्ने अपेक्षा गरिएको छ। यस्तो कर्जा लिने प्रायः साना ऋणी हुने गरेका छन्।
उनीहरूले आफ्नो आम्दानीको स्रोतअनुसार ब्याज भुक्तानीको योजना बनाएका हुन्छन्। तर कर्जा लिएको केही समयमै बैंकहरुले चर्को ब्याजदर अशुल गर्दा यस्ता ऋणीहरु मानसिक दबाबमा पर्ने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
