फाइल तस्बिर
काठमाडौं- काठमाडौ उपत्यकामा कोरोना भाइरसको संक्रमणबाट बच्न जारी निषेधाज्ञाबीच बागमती सफाइ महाअभियानलाई भने निरन्तरता दिइएको छ। सफाइ महाअभियानको ३८२औँ हप्तामा पशुपति र शङ्खमूल क्षेत्रको नदी किनारमा सफाइ गरिएको छ। पशुपति क्षेत्रमा अभियानकर्मी एवं अधिकार सम्पन्न बागमती सभ्यता एकीकृत विकास समिति सञ्चालक सदस्य माला खरेलको नेतृत्वमा सफाइ भएको हो।
पशुपति क्षेत्रको विद्युतीय शवदाह गृह परिसरमा सफाइ गरिएको उनले जानकारी दिए। त्यस क्षेत्रमा बढी फोहर भेटिएकाले सफाइ गरिएको हो। शंखमूल क्षेत्रमा अभियानकर्मी डा लक्ष्मी पौडेलेको नेतृत्वमा सफाइ भयो। त्यस क्षेत्रको नदी किनार र टोलमा सफाइ गरी कुहिने एवं नकुहिने फोहरमा वर्गीकरण गरी व्यवस्थापन गरिएको अभियानकर्मी पौडेलले बताए। सफाइमा हनुमान मार्ग टोल विकास समितिका पदाधिकारी एवं सदस्यको सहभागिता रहेको थियो। कोरोनाबाट बच्न भौतिक दूरी कायम गरी सफाइ अभियानलाई निरन्तरता दिइएको थियो।
विष्णुमती सफाइ अभियानको ३१०औँ हप्तामा संयोजक शोभाकान्त पाण्डेलगायत अभियाकर्मीले सफाइ गरेका छन्। विष्णुमतीको घर, टोल क्षेत्रमै सफाइ गरिएको उनले बताए। यसैगरी मनोहरा सरसफाइ अभियान १८१औँ हप्तामा काठमाडौं महानगरपालिका–३२ स्थित बालकुमारी पुलमा बागमती प्रदेशसभा सदस्य दीपेन्द्र श्रेष्ठ, संयोजक चन्द्र दङगाललगायत अभियानकर्मीले सफाइ गरेका छन्।
त्यस्तै काठमाडौं उपत्यकाका आलोकनगर, चक्रपथ सफाइ अभियान उत्तरी खण्ड, चक्रपथ सरसफाइ अभियान पश्चिम खण्डले पनि घर, टोल सफाइका साथै राहत वितरण, रक्तदान गरी मनाएको अभियानकर्मी किशोरसिंह शाहीले जानकारी दिए। ललितपुरको गोदावरी खोला सफाइ अभियानको ७९औँ हप्तामा अभियानकर्मीले घर, टोल सफाइ गरेको अभियानकर्मी बेबी राजभण्डारीले जानकारी दिए। कोरोनाबाट बच्न भौतिक दूरी कायम गरी सफाइ गरिएको उनले सुनाए।
विसं २०७० जेठ ५ गते बागमती सफाइ महाअभियान शुरु भएपछि यसका सहायक नदी हुँदै देशभर यो अभियान फैलिएको छ। कोरोनाको जोखिम हुनुअघिसम्म देशका १०६ स्थानमा सफाइ अभियान शुरु भएको थियो। हाल कोरोनाका कारण धेरै स्थानको सफाइ अभियान घर, टोल सफाइ अभियान शुरु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
