काठमाडौं- श्वासप्रश्वासको समस्याले उपचारका लागि अस्पताल भर्ना भएका कोरोना संक्रमित एक पुरुषको आइतबार मृत्यु भएको छ।
पाल्पा स्थायी घर भई हाल मध्यपुरथिमि नगरपालिका–१ लोकन्थलीमा आफ्नै घरमा बसोबास गर्दै आएका ७७ वर्षीय पुरुषको लोकन्थलीस्थित समिट अस्पतालमा आइतबार मृत्यु भएको वडाध्यक्ष सुरज खड्काले जानकारी दिए। संक्रमितका परिवारलाई भने घरभित्र छुट्टै बस्न आग्रह गरिएको जानकारी दिँदै उनले एक सातामा सबैको पिसिआर परीक्षण गरिने बताए।
श्वासप्रश्वास समस्या बढेपछि भदौ ११ गते अस्पताल भर्ना गरिएका पुरुषको सोही दिन स्वाब सङ्कलन गरी पिसिआर परीक्षण गर्दा १३ गते आएको रिपोर्टमा संक्रमण पुष्टि भएको जनस्वास्थ्य कार्यालयका प्रमुख कृष्ण मिजारले जानकारी दिए।
संक्रमण पुष्टि भएका पुरुषको आइतबार दिउँसो उपचारका क्रममा सोही अस्पतालमा मृत्यु भएको हो। मृतकको शव नेपाली सेनाको वीर दल गणको शव व्यवस्थापन टोलीले पशुपतिस्थित विद्युतीय शवहाद गृहमा व्यवस्थापन गरिएको गणका गणपति कर्नेल शिव पौडेलले जानकारी दिए।
यसअघि उच्च रक्तचाप र मधुमेहलगायतको औषधि सेवन गरिरहेका कोरोना भाइरस संक्रमित भक्तपुर नगरपालिका–१ दूधपाटीका संक्रमित ६५ वर्षीय पुरुषको गए राति होम आइसोलेसनमा मृत्यु भएको थियो।
श्वासप्रश्वासमा समस्या भएपछि यही भदौ ११ गते पिसिआर परीक्षण गरेको र १२ गते आएको रिपोर्टमा संक्रमण पुष्टि भएपछि अस्पताल जान भनिए पनि परिवारले होम आइसोलेसनमा राख्ने बताएपछि संक्रमित घरमै बसेको जिल्ला स्वास्थ्य कार्यालयका प्रमुख मिजारले जानकारी दिए। भक्तपुरमा हालसम्म चार महिला र चार पुरुष गरी आठ संक्रमितको मृत्यु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
