काठमाडौं- विश्व्यापी महामारीका रुपमा फैलिरहेको कोभिड–१९ को संक्रमण लकडाउन सकिएपछिको एक महिनामा निकै उच्च गतिमा वृद्धि भएको छ। मृत्युदर र संक्रमणदर जुन गतिमा बढिरहेको छ, त्यसको तुलनामा निको हुने दर भने निकै न्यून छ। एक महिनाअघि निको हुने दर कुल संक्रमितको ६९ दशमलव ३४ प्रतिशत थियो। एक महिनापछि निको हुने दर ५९ प्रतिशतमा झरेको छ।
सरकारका प्रवक्ता डा युवराज खतिवडाले गत साउन ५ को मन्त्रिपरिषद्को निर्णयअनुसार साउन ६ गते रातिदेखि लकडाउन हटेको घोषणा गरेका थिए। उक्त घोषणा गरेको आइतबार एक महिना पूरा भएको छ।
यही एक महिनाले विगतका सबै महिनाको भन्दा संक्रमण र मृत्युदरमा नसोचेको परिणाम दिएको छ। स्थिति जटिलतातर्फ गइरहेकाले नागरिकले उच्च सावधानी अपनाउन जरुरी रहेको जनस्वास्थ्य विज्ञले बताएका छन्।
सन् २०१९ डिसेम्बर ३१ मा चीनको वुहानमा देखिएको कोभिड–१९ नेपालमा विसं २०७६ माघ ९ गते त्यहीँबाट आएका एक नेपालीमा देखा परेको थियो। त्यसपछि चैत १० गते तेस्रो मुलुकबाट आएका दोस्रो नेपालीमा देखिएको थियो। त्यसपछि संक्रमण फैलिन नदिन सरकारले चैत ११ देखि लकडाउन जारी गरेको थियो। क्रमशः संक्रमण वृद्धि हुँदै वैशाख अन्तिम सातादेखि तीन अङ्कमा संक्रमण देखिन थालेको थियो।
असारमा केही कमी देखिएपछि सरकारले चार महिना लामो लकडाउनलाई साउन ६ गतेदेखि अन्त्य गरेको थियो। लकडाउन अन्त्य भएर गतिविधि चलायमान हुँदा मुलुकका सबै जिल्लामा मानिसहरु बिनासावधानी घुलमिल भए। त्यसैको परिणाम अहिले देखिन थालेको छ।
अहिले एकैदिन ११ जनासम्मको मृत्यु भएको र एकै दिन एक हजार बढी नयाँ संक्रमित भेटिएका छन्।
एक महिनाको कोभिड–१९ संक्रमण विश्लेषण
| शीर्षक |
साउन ६ को अवस्था |
भदौ ६ को अवस्था |
| कुल संक्रमित |
१७ हजार ९९४ |
३१ हजार ११७ |
| सक्रिय संक्रमित |
५ हजार ४७७ |
१२ हजार ६२९ |
| एक दिनमा नयाँ संक्रमित |
१५० |
६३४ |
| निको भएको |
१२ हजार ५१७ |
१८ हजार ३५० |
| एक दिनमा मृत्यु भएका |
२ |
९ |
प्राप्त तथ्याङ्क विश्लेषण गर्दा साउनअघि भएको कुल मुत्युभन्दा पछिल्लो एक महिनामै तीन गुणा बढीले मानिसको मृत्यु भएको छ। साउन ६ गतेसम्म कोभिड–१९ संक्रमित ४२ जनाको मृत्यु भएको थियो। साउन ६ देखि भदौ ६ सम्म एक महिनाका अवधिमा मात्रै १०४ जनाले ज्यान गुमाए। शनिबारसम्म संक्रमितमध्ये १४६ को मृत्यु भइसकेको स्वास्थ्य तथा जनसङ्ख्या मन्त्रालयले जनाएको छ।
यही महिनामा संक्रमण दर पनि उच्च भएको छ। अन्य महिनाको कुल संक्रमितभन्दा एकै महिनामा दोब्बरले संक्रमित थपिएका छन्। त्यसदिन कुल १७ हजार ९९४ संक्रमित रहेकामा मन्त्रालयले एक महिनापछि सोही दिन अर्थात् भदौ ६ गते सार्वजनिक गरेको विवरणमा कुल संक्रमित १३ हजार १२६ थपिएर ३१ हजार ११७ जना पुगेका छन्।
साउन ६ कुल १५० नयाँ संक्रमित भेटिएका थिए भने भदौ ६ गते नयाँ संक्रमित ६३४ जना भेटिए। त्यसबेला काठमाडौं उपत्यकामा नगण्य संक्रमित रहेकामा अहिले दैनिक १५० देखि २०० को हाराहारीमा नयाँ बिरामी भेटिँदै आएका छन्। त्यसमा पनि ८० देखि ९० प्रतिशत काठमाडौं जिल्लाका छन्।
अघिल्लो महिना साउन ६ गते सक्रिय संक्रमित ५ हजार ४७७ रहेकामा एक महिनापछि सोही दिन सक्रिय संक्रमित १२ हजार ६२९ रहेको विवरणमा उल्लेख छ।
प्राप्त विवरणले लकडाउन हटाइएपछिको संक्रमणले नसोचेको गति लिएको प्रष्टै बताउँछ। लकडाउन हटाइएपछि मानिसले कोभिड–१९ सर्न सक्छ भन्ने ख्यालै नगरी लापरवाही गर्दा जोखिम उच्च रुपमा वृद्धि भइरहेको विपद् जोखिम व्यवस्थापनविज्ञ कृष्ण देवकोटा बताउँछन्। उनले नागरिक आफैंले उच्च सावधानी अपनाउनुपर्ने र स्वास्थ्य मापदण्डलाई पूर्ण कार्यान्वयन नगर्ने हो भने स्थिति भयावह हुने चेतावनी दिए।
लकडाउन हटाइए पनि कोभिड–१९ संक्रमण केही घटे पनि रोकिएको थिएन। त्यसबेला सीमितमात्रै परीक्षण गरिएको थियो। बन्द खुल्यो भनेपछि सबै क्षेत्र चलायमान भयो। सीमा क्षेत्रमा अलि बढी संक्रमण थियो। त्यहाँका मानिसहरु हरेक क्षेत्रमा खुला रुपमा पुगे र भारतबाट आएका मानिससमेत जिल्ला जिल्लामा भित्रिए। यसबाट संक्रमण बढ्न सहयोग गरेको देवकोटा बताउँछन्।
स्वास्थ्य मन्त्रालयका प्रवक्ता डा जागेश्वर गौतम यो समय सकेसम्म घरबाटै ननिस्कने र अत्यावश्यक कामका लागि निस्किएमा पनि भीडभाडमा नजाने, मास्क लगाउने, साबुनपानीले राम्ररी हात धुने र दुई मिटरभन्दा बढीको भौतिक दूरी कायम गर्ने गर्दा संक्रमणबाट जोगिन सक्ने बताउँछन्।
मुलुकभर नै संक्रमण बढ्न थालेपछि अहिले जिल्लाजिल्लामा निषेधाज्ञा जारी गरिएको छ। अत्यावश्यकबाहेकका गतिविधिमा रोक लगाइएको छ, जसका कारण आधा मुलुक नै ठप्प हुन पुगेको छ। सरकारले निषेध आदेश जारी गरे पनि सर्वसाधरणले स्वास्थ्य मापदण्ड ख्याल नगर्ने हो भने स्थिति जटिल हुनेतर्फ स्वास्थ्यकर्मीले सचेत गराएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
