लय लिएको मोटरसाइकल र कार बिक्रीमा फेरि 'ब्रेक'

अटो

शिव बोहरा बिहीबार, भदौ ४, २०७७ १२:४०

काठमाडौं-सरकारले कोरोना भाइरसको संक्रमण न्यूनीकरण गर्न चैत ११ देखि गरेको लकडाउन असार २ दखि खुकुलो बनाएको थियो। तीन महिनायता ठप्प रहेको सवारी बिक्री असारबाट लयमा फर्कँदै थियो। साउनमा पनि उत्साहजनक रहेको सवारी बिक्रीमा बिहीबारदेखिकाे निषेधाज्ञाले ब्रेक लागेको छ।

उपत्यकासँगै देशका विभिन्न सहरहरू आंशिक वा पूर्णरूपमा बन्द अवस्थामा छन्। यस्तो अवस्थामा सवारी बिक्री हुन नसक्ने व्यवसायीहरूको भनाइ छ। यातायात व्यवस्था कार्यालय साना/ठूला सवारी एकान्तकुनामा लकडाउन खुकुलो भएपछिको पहिलो महिना अर्थात् आर्थिक वर्ष २०७६/७७ को असारमा १ हजार ३ सय ८४ वटा सवारीसाधन दर्ता भएका थिए।

त्यस्तै गत आवको सोही अवधिमा उक्त कार्यालयमा १ हजार ७ सय ४१ वटा सवारीसाधन दर्ता भएको तथ्यांक छ। चालु आर्थिक वर्षको साउनमा असारको तुलनामा सवारी बिक्री बढी भएको कार्यालयले जनाएको छ। यद्यपि साउन २ गतेबाट कार्यालयले सेवा बन्द गरेका कारण तथ्यांक भने आउन सकेको छैन।

चैत ११ देखि लकडाउन भएको र असार १ देखिमात्र सवारी दर्ता खुलेको अवस्थामा पनि कार जिप भ्यानको दर्ता भने अघिल्लो वर्षको सामान्य अवस्थामा भन्दा लकडाउन खुलेपछि धेरै दर्ता भएको थियो। बस, ट्रकलगायत ठूला सवारीको बिक्री न्यून भए पनि बागमती प्रदेशमा कारको बिक्री भने उत्साहजनक नै थियो।

त्यस्तै लकडाउन खुकुलो भएपछि यातायात व्यवस्था कार्यालय मोटरसाइकल, बागमती प्रदेशमा आव २०७६/७७ को अन्तिम महिना असारमा अर्थात् लकडाउन खुकुलो भएपछि ६ हजार ५४ वटा मोटरसाइकल तथा स्कुटर दर्ता भएको कार्यालयले जनाएको छ। दुईपांग्रे सवारी दर्ता लकडाउन खुकुलो भएपछिको पहिलो महिनामा उत्साहजनक देखिएको हाे।

आर्थिक वर्ष २०७५/७६ को असारमा ७ हजार २ सय ९६ वटा मोटरसाइकल दर्ता भएका थिए। कोरोना भाइरसका कारण सवारीसाधनको बिक्री उल्लेख्य रुपमा गिरावट आउने अनुमान व्यवसायीहरुले गरेका थिए। तर, कोरोनाको संक्रमण जोखिम कायमै रहेको र सार्वजनिक सवारीसमेत नचलेकाले कामकाजीहरुले दुईपांग्रे सवारी रोजेकाले बिक्री बढेको व्यवसायीहरुको भनाइ छ।

अटोमोबाइलसँगै अन्य व्यवसाय पनि लकडाउन खुलेपछि सहज हुँदै थियो। तर पुनः उपत्यकालगायत देशका विभिन्न ठाउँमा गरिएको निषेधाज्ञाले अवस्था जटिल बन्ने नाडा अटोमोबाइल्स एसोसिएसन अफ नेपालका अध्यक्ष कृष्णप्रसाद दुलालले बताए। 'कोभिडको चेन टुटाउन सरकारले बन्द गरेको हुन सक्छ। तर बन्द समस्याको समाधान होइन,' उनले भने, 'सचेत भएर काम गर्दै अर्थतन्त्र चलायमान बनाउनु पर्ने हो। बन्द मात्र गरिरहँदा व्यवसायीसँगै सरकार पनि संकटमा गर्ने देखिन्छ।' अब अटोमोबाइल व्यवसाय लयमा फर्कन समय लाग्ने उनको भनाइ छ।

दुई पांग्रे सवारीको बिक्री संख्याबाट उत्साही व्यवसायी पुनः निरास हुने अवस्था आएको छ। गएको सारको तुलनामा साउनमा दुई पांग्रे सवारी बिक्रीमा उल्लेख्य सुधार भएको व्यवसायीहरूले बताएका छन्।

नेपाली बजारमा दुई दर्जन बढी ब्रान्डका मोटरसाइकल तथा स्कुटर बिक्री हुँदै आएका छन्। लकडाउनपछि १ सय ५० सिसी सेगमेन्टका मोटरसाइकल र स्कुटरको धेरै माग आएको व्यवसायीहरुको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।