काठमाडौं-दाङका कृष्णबहादुर बोहराको हत्यामा संलग्न महिलालाई प्रहरीले सार्वजनिक गरेको छ। हत्यामा चितवनको कालिका नगरपालिका-७ घर भई टोखा नगरपालिका-१० नवज्योति मार्ग बस्ने कल्पना मुडभरी (पौडेल) भएको पाइएको छ। साधारण लेखपढ गर्ने ३७ वर्षीया पौडेलले मोडलिङ तथा टेलिश्रृंखलामा समेत अभिनय गरेको पाइएको छ । उनीसँगै उनकी १५ वर्षीया छोरीलाई पनि प्रहरीले पक्राउ परेको छ । उनले हत्यापछि शव व्यवस्थापन गर्न सहयोग गरेको प्रहरीले जनाएको छ।
नवज्योति मार्गमा रातो प्लाष्टिकले बेरेको, बोराको नाम्लोसहित कालो रंगको सुटकेशभित्र टाउको र खुट्टा बिनाको पुरुषको शव आइतबार फेला परेको थियो। तत्काल तालिम प्राप्त जोजो नामको 'ट्रयाकर डग' परिचालन गर्दा टाउको र खुट्टा पोको पारी फालेको अवस्थामा अन्दाजी ३०० मिटर पूर्व उत्तर रहेको स्वर्गद्वारी मार्गको खाली जमीनको कुनामा फेला परेको थियो।
त्यसपछि सिद्धेश्वर मन्दिर नजिक गएर जोजो रोकिएको थियो। जोजोले दिएको उक्त क्लुलाई आधार बनाएर सिद्धेश्वर मन्दिर नजिकका करिब १५ सय घरमा खानतलासी गर्दा सोमबार घटनास्थल फेला परेको महानगरीय प्रहरी परिसर काठमाडौंका प्रमुख एसएसपी श्यामलाल ज्ञवालीले जानकारी दिए।
अभियुक्तलाई सार्वजनिक गर्दै प्रहरी
‘कुकुरले सिद्धेश्वरसम्म लोकेट गरेपछि पक्कै यतै वरपर घटनास्थल हुुनुपर्छ भनेर हामीले घर खानतलासी गरेका थियौं । नभन्दै शव भेटिएको करिब ५० मिटरको दुरीमा रहेको घरको तेस्रो तला नै घटनास्थल भएको पत्ता लाग्यो’ एसएसपी ज्ञवालीले भने।
पक्राउ परेपछि ती महिलाले बाहिर प्रहरी छ्यापछ्याप्ती भएको र कुकुरसमेत परिचालन गरेको थाहा पाएपछि डरले रुँदै कोठामा बसेको बताएकी छिन्। ‘एक छोरी र एक छोरालाई सँगै लिएर ढोका लगाएर रुँदै बसेँ। कुकुर मै भएको ठाउँमा पो आउँछ कि भन्ने डर लाग्यो’ पक्राउ परेकी महिलाको बयान उद्धृत गर्दै एसएसपी ज्ञवालीले भने।
हत्याको कारण यौनसम्बन्ध रहेको, पटक-पटक सेक्सुअल ह्यारेसमेन्ट गरेको, नांगो फोटो, भिडियो बनाइ सञ्जालमा हाल्ने गरेकाे पाइएको प्रहरीले जनाएको छ ।
'बाथरुमको ढोकाको डिललाई अचानो बनाएर घाँटी काँटे'
घटना हुने दिन शनिबार बोहरा आफू बसेको गेष्टहाउस सञ्चालकलाई केही दिन नआउने बताउँदै दिउँसो ५ बजे निस्किएका थिए। मृतक घटनाको दिन आफू बसेको गोंगबुको होटलबाट बा ७२ प ५६४४ नं को स्कुटी प्रयोग गरी ती महिलाको कोठामा गएका थिए। ती महिला र बोहराको फेसबुकमार्फत् ३/४ वर्ष पहिलादेखि चिनजान भएको थियो । बोहरालाई कल्पनाले दही, चिउरा, मासु र भोड्का खान दिएकी थिइन्। दहीमा भने कल्पना आफैँले खाँदै आएको डिप्रेशनको औषधि मिसाएर दिएकी थिइन्।
अभियुक्तबाट बरामद सामग्री
उक्त औषधि र रक्सीको नसाले लठ्ठीएपछि हम्मरले अण्डकोषमा हानेर बोहराको हत्या भएको पाइएको परिसरका प्रवक्ता सोमेन्द्रसिंह राठौरले जानकारी दिए । त्यसपछि ती महिलाले सलले बोहराको घाँटीसमेत थिचेकी थिइन् ।
बोहरा मरिसकेपछि बाथरुमको ढोकाको डिललाई अचानो बनाएर घाँटी र खुट्टा काटेको कल्पनाले प्रहरीसमक्ष बयान दिएकी छिन्। उनले यसरी बोहराको हत्या गरुन्जेल उनका एक छोरा र एक छोरी भने अर्कै कोठामा थिए। एक पटक छोराछोरी कल्पना भएको कोठामा प्रवेश गर्न खोज्दा समेत उनले नआउन भनेकाे उनका छोराछोरीले बताएका छन् । यसरी उनले बोहराको हत्या गर्दा रातिको साढे ९ बजिसकको अनुसन्धानबाट खुलेको छ।
खुट्टा र टाउको छुट्याएपछि झोलामा प्याक गरेर कल्पना एक्लैले फालेकी थिइन्। त्यसपछि बाँकी शरीर सुटकेशमा हालेर फ्याँक्ने क्रममा उनले १५ वर्षीया छोरीको सहयोग लिएको पाइएको छ ।
६ हजार तिरेर चितवन
हत्या गरेको रात र भोलिपल्ट दिउँसो उनी कोठामै बसेकी थिइन्। त्यसपछि भने उनले चितवनमै चिनेका एक एम्बुलेन्स ड्राइभरलाई फोन गरेर आफू चितवन जान लागेको र गाडी कता छ जान मिल्ने भए जाउँ भनेकी थिइन् । चितवनको उक्त एम्बुलेन्स त्यसबेला बिरामी लिएर काठमाडौं आएको र फर्कन लागेको पाइएकाले कल्पना एक छोरा र छोरीलाई साथै लिएर उक्त एम्बुलेन्समार्फत् चितवन लागेकी थिइन् । उक्त एम्बुलेन्सलाई भाडा स्वरुप ६ हजारसमेत दिएको पाइएको छ।
अभियुक्त कल्पना मुडभरी (पौडेल)लाई पक्राउ गर्दै प्रहरी
बोहराको परिवारसँग थिएन राम्रो सम्बन्ध
हत्या गरिका ४५ वर्षीय बोहराको परिवारसँग खासै राम्रो सम्बन्ध नभएको पाइएको छ । उनी परिवारबाटे छुट्टिएर विगत केही वर्षदेखि काठमाडौं एक्लै बस्दै आएका थिए। इराक, अफगानिस्तान, टर्की, भारत र विभिन्न खाडी मुलुकसमेत गएका बोहराले दुई वटा बिहे गरेका थिए। उनकी कान्छी श्रीमती र उनका छोराछोरी भने भारतमै छन्। जेठी श्रीमतीसँग पनि उनको राम्रो सम्बन्ध रहेको नपाइएको प्रहरीले जनाएको छ। बोहराको आर्थिक अवस्थासमेत राम्रो नभएको पाइएको छ ।
उता हत्या आरोपमा पक्राउ परेकी महिलाको समेत श्रीमानसँग राम्रो सम्बन्ध नरहेको पाइएको छ। गत वर्ष जेठी छोरीको बिहेमा समेत श्रीमान नआएको र सम्बन्ध राम्रो नभएकाले आ-आफ्नै सुर गर्न थालेको बयान कल्पनाले दिएकी छिन्। श्रीमानले पैसा नदिएको भन्दै कल्पनाले आफ्नो छोरीको बिहे गर्ने बेला घरेबटीसँग २ लाख रुपैयाँ ऋण लिएको बताएकी छिन्। त्यसैगरी एक वर्षदेखि कोठा भाडासमेत नतिरेको उनको भनाइ छ ।
सम्बन्धित समाचार
गोंगबु हत्या : चितवनमा पक्राउ परेकी महिला मोडलिङ क्षेत्रमा काम गर्ने, आमाछोरीलाई नै काठमाडौं ल्याइँदै
गोंगबु हत्या : चितवनबाट एक महिला पक्राउ, आइतबार पक्राउ परेका ४ महिलालाई छाडियो
गोंगबु हत्या : मृतकको पहिचान खुल्यो
टोखा हत्या : टाउको-खुट्टा झोलामा, शरीर सुटकेशमा [अपडेट]
टोखामा सुटकेशभित्र शव फेला
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
