काठमाडौं- दाङका कृष्णबहादुर बोहराको हत्यामा संलग्न भएको आरोपमा चितवनबाट पक्राउ परेका आमाछोरीलाई काठमाडौं ल्याइँदैछ। चितवनको टाँडीस्थित माधवपुरबाट पक्राउ परेकी कल्पना शाही र उनकी अन्दाजी १५ वर्षीया छोरीलाई काठमाडौं ल्याइदै गरेको प्रहरी स्रोतले नेपाल लाइभलाई जानकारी दिएको छ।
स्रोतका अनुसार पक्राउ परेकी शाही मोडलिङ क्षेत्रमा समेत काम गर्ने गरेको पाइएको छ। उनै शाहीको कोठामा हत्या गरेर बोहराको शव सुटकेश र जेब्रा झोलामा प्याक गरेर फ्ँयाकिएको प्रहरीको प्रारम्भिक अनुसन्धानले देखाएको छ।
शव प्याक गरेर फ्याँकिएको सुटकेशबाट अन्दाजी ५० मिटर टाढाको चार तले घरको तेस्रो तलमा शाही बस्थिन्। उनैको कोठामा हत्या भएको प्रहरीको प्रारम्भिक अनुमान छ। प्रहरी स्रोतका अनुसार पक्राउ परेकी महिलाले घटनामा आफ्नो संलग्नता रहेको स्वीकार गरिसकेकी छिन्।
आइतबार बिहान टाउको, खुट्टा र जीउ छुट्टाएको अवस्थामा दुई स्थानबाट शवका टुक्रा बरामद भएका थिए। तर उक्त शव कसको भन्ने प्रहरीले छुट्याउन सकेको थिएन। सोमबार दिँउसो भने उक्त शवको सनाखत भएको थियो।
बोहराको हत्या गरी टाउको र खुट्टा जेब्रा झोलामा हालेर फालिएको थियो भने शरीर सुटेकशमा प्याक गरेर फालिएको अवस्थामा भेटिएको थियो। आइतबार बिहान स्थानीयले झोलामा रगत लतपतिएको देखेपछि प्रहरीलाई खबर गरेका थिए।
भित्री वस्त्र मात्रै लगाएको र गुप्ताङ्गमा समेत नीलडाम भएको अवस्थामा शव भेटिएको थियो। जसकारण उक्त हत्याकाण्डमा यौन जोडिएको हुन सक्ने प्रहरीले अनुमान गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
