प्रतीकात्मक तस्बिर
महोत्तरी- महोत्तरीका मुख्य सबैजसो सडकको अवस्था बिग्रेको छ। यसपालि मध्य असारसँगै सुरु भएको वर्षा साउन मध्यसम्मै रहँदा त्यससँगैको बाढीले गर्दा जिल्लाका सबैजसो सडकमा खाल्डाखुल्डी बढ्दै गएर जताततै पोखरीजस्तै बनेपछि यस्तो अवस्था बनेको हो।
बर्दिवास–रामगोपालपुर–जलेश्वर, सम्सी–जलेश्वर, बर्दिवास–रौजा–जलेश्वर र सम्सी–लोहारपट्टी–जनकपुरसहितका मुख्य सडक बाढीले ठाउँठाउँ भत्काएर सवारी साधन चल्न नसक्ने भएका छन्। खाल्डैखाल्डा बढेका र सबैमा फोहर पानी जमेपछि यी सडकमा साइकल, मोटरसाइकलजस्ता साना दुई पाङ्ग्रे साधन चल्न छाडेको पनि एक महिना हुन लागेको छ।
असार अन्तिम साताको ६ दिनसम्मको र साउन पहिलो साताको तीन दिने मुसलधार वर्षाले जिल्लाका सडक खाल्डा र पोखरी बनेका हुन्। यी सबै सडक हुलाकी मार्गअन्तर्गत स्तरोन्नतिको काम थालिएका सडक हुन्।
यद्यपि काम थालिएको दुई वर्ष नाघ्दा पनि परिणाममुखी नतिजा भने नदेखिँदा सर्वसाधारणमा सडक बन्ने आश मरेको छ। यीबाहेक पूर्वपश्चिम राजमार्गको अवस्था पनि अत्यन्त नाजुक छ। पूर्वमा रातु नदीको पुलदेखि पश्चिममा बाँके नदीको पुलसम्मको महोत्तरीमा पर्ने राजमार्ग क्षेत्रमा सयौँ संख्यामा ठूलठूला खाल्डा बनेका छन्। सडक भत्कन थालेसँगै तत्काल मर्मतसम्भारकाे काम नगरिँदा सडकको दूरावस्था बढेको हो।
अचेल राजमार्गका यी असंख्य खाल्डाखुल्डीले दुर्घटनाकाे जोखिम निकै बढाएको जिल्ला ट्राफिक प्रहरी कार्यालय बर्दिवास महोत्तरीका प्रमुख तथा प्रहरी निरीक्षक कैलाश खत्री बताउँछन्।
राजमार्गमा खाल्डाखुल्डीले बढाएको दुर्घटना जोखिम टार्न ट्राफिक प्रहरीले बजारचोक क्षेत्रमा खाल्डा बनेका ठाउँमा ‘ट्राफिक कोण’ बनाएको छ। दिनहुँ खाल्डा पर्दै र बढ्दै जाँदा ‘ट्राफिक कोण’ पनि कति ठाउँ राख्ने भन्ने समस्या बढेको खत्री बताउँछन्।
राजमार्गका पुलको अवस्था अत्यन्त नाजुक बन्दै गएको छ। पूर्वमा धनुषासँगको साँधको रातु पुलदेखि पश्चिममा सर्लाहीसँगको सीमा बाँके नदीको पुलबीचमा सानाठूला गरी १५-१६ वटा पुल छन्। सबैजसो पुलमा कालोपत्रे उधिनिएर खाल्डैखाल्डा बढेका छन्। रातु, रातुछहरा, भब्सी, अटाबे, जङ्घा, गणन्ता, ढुङ्ग्रे, टुटेश्वर, ढोलनखोला, मरहा, खयरमारा र बाँके नदीलगायतका पुल जीर्ण भएका छन्।
पुलको कालापत्रे उप्केर ठाउँठाउँमा भ्वाङ परेका छन् । यीमध्ये जङ्घामा तीन वर्ष पहिले पुलको मर्मतसम्भार र रातुमा दुई वर्ष पहिलेमात्र नयाँ पुल प्रयोगमा आएको हो । अहिले सबैभन्दा बढी भ्वाङ रातु पुलमै परेका छन् । राजमार्गको यात्रा जोखिमपूर्ण भए पनि विकल्प नभएपछि सडक यात्रु यो जोखिम मोलेरै यात्रा गर्ने गरेका बर्दिवास उद्योग वाणिज्य सङ्घका महासचिव भवनाथ खतिवडा बताउँछन्। रातुमा नयाँ पुल निर्माण भएर प्रयोगमा आएको केही दिनभित्रै पुलमाथि खाल्डाखुल्डी बढेपछि निर्माण चरणमै कमसल सामग्री प्रयोग गरिएको यस भेगका सर्वसाधारणको गुनासो छ।
पछिल्ला केही दिनयता मौसम सफा भए पनि राजमार्ग र अन्य सडक मर्मतसम्भारको काम नथालिँदा सर्वसाधारणमा निरासा बढेको छ। राजमार्ग र अन्य मुख्य हुलाकी मार्गमा स्थानीय तहले काम छुने गरेको छैन। यी सबै सडकको मर्मतसम्भार डिभिजन सडक कार्यालय मुजेलिया (जनकपुरधाम)को जिम्मेवारीभित्र रहेको हुँदा सो कार्यालयलाई निरन्तर घच्घच्याई रहिएको बर्दिवास नगरपालिकाका प्रमुख विदुरकुमार कार्की बताउँछन्। नगरपालिका कार्यालय छेउमैै राजमार्गमा पोखरी जत्रा खाल्डा बन्दा पनि नगर नेतृत्व मुकदर्शक बनेको भन्दै बर्दिवासका स्थानीय भने असन्तुष्ट देखिएका छन्।
यसैबीच डिभिजन सडक कार्यालय मुजेलियाले आफ्नो कार्यक्षेत्रका सबै सडकको निर्माण र मर्मतसम्भारको काम थाल्न राम्रो मौसम कुरेको जनाएको छ। 'दुई-तीन दिनदेखि मौसममा सुधार हुने छाँट देखिएको छ', डिभिजन प्रमुख विनोदकुमार महुवार (यादव)ले भने, 'अब काम सघनरुपले अघि बढाइने छन्।'
पानी परी रहँदा सडक निर्माण र मर्मतसम्भारका काम नहुने भएको हुँदा राम्रो मौसम पर्खदा काममा ढिलाइ भएको डिभिजन प्रमुख महुवारको स्वीकारोक्ति छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
