महेन्द्रनगर- सुदूरपश्चिम प्रदेश सरकारले समुदायस्तरमा समेत कोरोना परीक्षणका लागि स्वाब संकलन सुरु गरेको छ। सुदूरपश्चिम प्रदेश स्वास्थ्य निर्देशनालयका निर्देशक डा गुणराज अवस्थीले प्रदेशका नौवटै जिल्लाका स्वास्थ्य कार्यालयलाई समुदायस्तरमा कोरोना परीक्षणका लागि निर्देशन दिइएको बताए।
'कोरोना पोजेटिभ भएर होम क्वारेन्टिनमा बसेका संक्रमितका घरका कम्तीमा दुई सदस्यको पनि कोरोना परीक्षण गर्न निर्देशन दिएका छौँ', उनले भने, 'सोहीअनुसार जनस्वास्थ्य कार्यालयले स्वाब संकलन सुरु गरिसकेका छन्।'
शुक्रबार साँझसम्म सुदूरपश्चिमका नौवटै जिल्लामा गरी ४० हजार ५३७ को पिसिआर विधिबाट कोरोना परीक्षणका लागि स्वाब संकलन गरिएको निर्देशनालयले जनाएको छ। जसमध्ये चार हजार ७६० जना कोरोना पोजेटिभ देखिएका छन्। 'यहाँ अहिलेसम्म समुदायस्तरसम्म कोरोना फैलिसकेको छै,' निर्देशक डा अवस्थीले भने, 'संक्रमित अधिकांश बाहिरबाट आएर क्वारेन्टिनमा बसेका हुन्।' संक्रमित देखिएकामध्ये ७० प्रतिशत बिरामी निको भएर घर फर्किसकेको अवस्था रहेको छ।
हालसम्म सुदूरपश्चिममा तीन हजार ९३८ जना संक्रमित कोरोना जितेर घर फर्किसकेको निर्देशनालयले जनाएको छ भने कोरोना संक्रमणबाट कैलालीमा चार, बझाङ र बाजुरामा दुई/दुई र अछाममा एक गरी नौ जनाको मृत्यु भइसकेको छ। निर्देशक डा अवस्थीले समुदायमा पनि कोरोना परीक्षण गर्न निर्देशन दिएबमोजिम डोटी जिल्लामा समुदायका ४५० जनाको कोरोना परीक्षण भइसकेको बताए।
'डोटीका बढी संक्रमित स्थानीय तहमा समुदायका ४५० जनाको कोरोना परीक्षण गर्दा सबैको नेगेटिभ रिपोर्ट आएको छ,' उनले भने, 'अन्य जिल्लामा पनि संक्रमित व्यक्तिका घरका अन्य सदस्यको पनि परीक्षणको काम चलिरहेको छ।' सुदूरपश्चिम प्रदेशमा हाल कैलालीको धनगढी, डडेल्धुरामा पिसिआर विधिबाट कोरोना परीक्षणको काम भइरहेको छ भने बैतडी जिल्लामा पनि परीक्षणको दायरा बढाउन प्रदेश सरकारले पिसिआर पुर्याएको छ।
जिल्ला अस्पताल बैतडीले भने आगामी भदौ दोस्रो साताबाट परीक्षण सुरु गर्ने गरी मेशिन जडानको काम सुरु हुने जनाएको छ। त्यसैगरी कोभिड–१९ डडेल्धुराका सम्पर्क व्यक्ति हरिप्रसाद भट्टले पालिकासित समन्वय गरेर समुदायस्तरमा परीक्षण गर्ने तयारी भइरहेको बताए। 'यहाँको प्रयोगशालाबाट अन्य पहाडी जिल्लाको समेत कोरोना परीक्षण भइरहेको छ' उनले भने, 'यहाँ दैनिक औसतमा १५० जनाको कोरोना परीक्षण हुँदैछ।'
त्यस्तै कञ्चनपुरस्थित कोभिड–१९ का सम्र्पक व्यक्ति सिद्धराज भट्टले यहाँ परीक्षणका लागि संकलन गरिएकामध्ये ५०० को रिपोर्ट आउँनै बाँकी रहेको बताए। 'समुदायस्तरमा पनि सम्भावित लक्षण देखिए र संक्रमितको सम्पर्कमा आएकालाई प्राथमिकतामा राखेर परीक्षण गर्ने भन्ने निर्देशन छ,' उनले भने, 'रिपोर्ट ढिलो आउँदा समस्या भइरहेको छ।'
भारतबाट आएर कञ्चनपुरका क्वारेन्टाइनमा बसिरहेका २०२ जनाको स्वाब संकलन बाँकी रहेको उनले बताए। 'भिटिएम पनि हामीसित थोरै सङ्ख्यामा छ', उनले भने, 'पालिकासित समन्वय गरेर स्वाब संकलन भइरहेकै छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
