पाेखरा- कोरोनाको उच्च जोखिमलाई ध्यानमा राखी बिहीबारदेखि लागू भएको जोरबिजोर प्रणाली गण्डकी प्रदेशमामा लागू नहुने भएको छ। सरकारले २०० जनाभन्दा बढी सक्रिय संक्रमित रहेका जिल्लामा यो नियम लागू गर्ने निर्णय गरेको थियो।
गण्डकी प्रदेशका सबै ११ जिल्लामा २०० को संख्यामा सक्रिय संक्रमित नभएका कारण जोरबिजोर प्रणााली लागू नहुने भएको हो। प्रदेश स्वास्थ्य निर्देशनालयका निर्देशक विनोदविन्दु शर्माले प्रदेशको कुनै पनि जिल्लामा २०० को हाराहारीमा सक्रिय संक्रमित नरहेको जानकारी दिए।
निर्देशक शर्माका अनुसार हालसम्म २६ हजार ३८ जनाको स्वाब सङ्कलन गरिएको छ। तीमध्ये २४ हजार ४७२ को नेगेटिभ रिपोर्ट आएको छ। गण्डकीमा बिहीबारसम्म कोरोना संक्रमितको संख्या एक हजार ५६६ पुगेको छ। संक्रमितमध्ये एक हजार ३६२ निको भएका छन्। पछिल्लो २४ घण्टामा ३१५ को कोरोना परीक्षण भएको छ भने हालसम्म चार जनाको कोरोनाका कारण मृत्यु भएको छ।
त्यसैगरी क्वारेन्टाइनमा एक हजार ११ रहेका छन् भने आइसोलेसनमा २११ छन्। प्रदेशमा हालसम्म भारतबाट १२ हजार २९१ र तेस्रो मुलुकबाट पाँच हजार १०४ जना आएको तथ्याङ्क छ।
प्रदेशभर बिहीबार बिहान ११ जनामा कोरोना पुष्टि भएको छ। देशका विभिन्न तीन प्रयोगशालामा गरिएको परीक्षणमा चार जिल्लाका ११ जनामा कोरोना पोजेटिभ देखिएको हो। पोजेटिभ देखिने जिल्लामा कास्कीमा एक, पर्वतमा एक, गोरखामा ६ र नवलपुरमा तीन संक्रमित थपिएको स्वास्थ्य निर्देशनालयले जनाएको छ। कास्कीका एक संक्रमित पोखरा महानगरपालिका–४ का २२ वर्षे पुरुष रहेका छन्।
जनस्वास्थ्यको मापदण्डानुसार २०० जनाभन्दा बढी सक्रिय कोरोना संक्रमित रहेका जिल्लामा बिहीबारदेखि सवारी साधनमा जोरबिजोर प्रणाली लागू गर्न गृह मन्त्रालयलये निर्देशन दिएको छ। मन्त्रालयका अनुसार २०० जनाभन्दा बढी सक्रिय संक्रमित रहेका जिल्लामा बेलुका ९ देखि बिहान ५ बजेसम्म आवागमनमा समेत रोक लगाइएको छ।
कास्कीका प्रमुख जिल्ला अधिकारी ज्ञानप्रसाद ढकालले कास्की जिल्लामा पनि २०० जना सक्रिय कोरोना संक्रमित नभएकाले जोरबिजोर लागू नहुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
