पोखरा विश्वविद्यालयको उपकुलपति नियुक्तिमा राजनीतिक खिँचातानी

समाज

पोखरा विश्वविद्यालयको उपकुलपति नियुक्तिमा राजनीतिक खिँचातानी१० महिनादेखि उपकुलपतिसहितका पदाधिकारी नियुक्ति नहुँदा शैक्षिक तथा प्रशासनिक काम ठप्प, विद्यार्थी आन्दोलनमा

प्रजु पन्त बिहीबार, साउन १५, २०७७ १२:३९

काठमाडौं-लकडाउन खुलेसँगै मुलुकभरका विश्वविद्यालयहरुले धमाधम परीक्षा लिने तयारी गरिरहँदा पोखरा विश्वविद्यालयका विद्यार्थी भने आन्दोलित भएका छन्। १० महिनादेखि रिक्त रहेको उपकुलपतिलगायतका पदाधिकारी नियुक्ति नहुँदा आफूहरुको भविष्य अन्योलमा परेको भन्दै विद्यार्थीहरु आन्दोलनमा उत्रिएका हुन्। प्रधानमन्त्री केपी ओली, शिक्षामन्त्री गिरिराजमणि पोखरेल र नेकपा अध्यक्ष पुष्पकमल दाहाल ‘प्रचण्ड’ बीचको खिँचातानीले उपकुलपति नियुक्ति हुन सकेको छैन।

२०७६ असोज ५ गते तत्कालीन उपकुलपति र असोज ६ गते रजिस्ट्रारको पदावधि सकिएपछि दुवै पद रिक्त छन्। त्यतिमात्र होइन, विश्वविद्यालयमा अन्य ७ पद रिक्त छन्। ४ वटा संकायमध्ये व्यवस्थापनबाहेक तीन वटामा डिन छैनन्। परीक्षा नियन्त्रकको पद बैशाखदेखि रिक्त छ भने ३ वटा स्कुलका निर्देशक छैनन्।

व्यवस्थापन संकायका डिन हरिबहादुर खड्काका अनुसार पदधिकारी नहुँदा विश्विद्यालयको प्रशासनिकदेखि शैक्षिक कार्यक्रमहरु ठप्प भएका छन्। ‘पदधिकारी नहुँदा विश्वविद्यालयमा सबै काम रोकिएका छन्,’ डिन खड्काले भने, ‘नीतिगत काम भएको छैन। पढाइलेखाइ ठ्प्प छ। परीक्षा भएको छैन। सभा भएको छैन। दिक्षान्त समारोह भएको छैन। निमार्णका काम रोकिएका छन्।’

बैशाख २४ गते परीक्षा नियन्त्रक भरतराम ढुगांनाको पदावधि सकिएपछि पोखरा विश्वविद्यालयको स्थगित परीक्षा हुने–नहुने र्टुंगो छैन। विश्विद्यालयले भदौ अन्तिम साता परीक्षा गर्ने भनेर सूचना निकाले पनि त्यतिन्जेलसम्म उपकुलपति नियुक्ति नभए परीक्षा हुन नसक्ने डिन खड्काले बताए। ‘विद्यार्थीहरु पढ्दै गरुन् भनेर भदौमा परीक्षा सञ्चालन हुने सूचना त विश्वविद्यालयले निकालेको छ,’ डिन हरिबहादुर खड्काले भने, ‘उपकुलपति नियुक्ति नभए परीक्षा हुन्न।’

नेपाल विद्यार्थी संघले सोमबार माइतिघरमा आन्दोलन गर्दै तत्काल उपकुलपतिलगायतका पदाधिकारी नियुक्तिको माग गरेको छ। ‘अन्य विश्वविद्यालयका विद्यार्थीहरु पढिरहँदा हामीले भने पढ्न पाएका छैनौं,’ नेविसंघ नेता नवराज त्रिपाठीले भने, ‘१० महिनादेखि पदाधिकारी नियुक्ति नगरेर सरकारले हामीलाई अन्याय गरेको छ।’

अर्को संगठन अनेरास्ववियुले पनि पदाधिकारी नियुक्तिको माग गर्दै साउन १३ गते प्रधानमन्त्री एवं विश्वविद्यालयका कुलपतिलाई ज्ञापनपत्र बुझाएको छ। अनेरास्ववियु पोखरा इन्जिनियरिङ कलेजका अध्यक्ष सुन्दर गिरी र सचिव केशवकान्त तिवारीको हस्ताक्षर रहेको ज्ञापनपत्रमा पदाधिकारी नहुँदा विद्यार्थीको भविष्यसमेत अन्योलमा परेको उल्लेख गरिएको छ।

त्रिपक्षीय रस्साकस्सी
विश्वविद्यालयमा उपकुलपति नियुक्तिका लागि गठित सिफारिस समितिले कुलपति एवं प्रधानमन्त्रीसमक्ष नाम सिफारिस गर्ने व्यवस्था छ। उपकुलपति नियुक्त भएपछि विश्वविद्यालयको कार्यकारी परिषदले रजिस्ट्रार नियुक्त गर्छ। तर प्रधानमन्त्रीले चाहेको व्यक्ति सिफारिस नभएकाले उपकुलपति नियुक्ति हुन नसकेको स्रोतको दाबी छ।

मन्त्रालय स्रोतका अनुसार प्रधानमन्त्री केपी शर्मा ओली प्राध्यापक यादवराज लामिछानेलाई उपकुलपति बनाउन चाहन्छन्। शिक्षा, विज्ञान तथा प्रविधिमन्त्री गिरिराजमणि पोखरेलले पेस गरेको ३ जनाको सिफारिसमा भने लामिछानेको नाम छैन। शिक्षामन्त्रीले भने देवराज अधिकारीलाई उपकुलपति बनाउन चाहेको स्रोतको दाबी छ।

प्रधानमन्त्री र शिक्षामन्त्रीको रस्साकस्सी चलिरहेका बेला नेकपा अध्यक्ष पुष्पकमल दाहाल भने प्राध्यापक केशरजंग बराललाई दोहो¥याउन चाहन्छन्। बराल यसअघि पनि पोखरा विश्विद्यालयमा उपकुलपति रहिसकेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।