प्रतिकात्मक तस्बिर
काठमाडौं– प्युठानमा सत्तारुढ दल नेपाल कम्युनिस्ट पार्टीका दुई समूहबीच झडप भइरहेका बेला प्रहरी पुगेपछि भाग्ने क्रममा एक जनाको ज्यान गएको छ। झडपमा परी गम्भीर घाइते एक जनालाई उपचारका लागि काठमाडौं ल्याइएको छ।
प्युठान नगरपालिका-४ जुम्री बजारमा दुई समूहबीच शुक्रबार साँझ कुटाकुट भएको थियो। दुई पक्षबीच भएको झगडा साम्य पार्न प्रहरी आइसकेपछि भागभाग भएको थियो। भाग्ने क्रममा दिपक थापाको ज्यान गएको छ। थापासहित भागेका बसन्त चन्द भने बाँच्न सफल भएका छन्।
प्युठानको सरुमारानी गाउँपालिकाको दरभाङमा राप्ती नदी तरेर चन्दले ज्यान जोगाएका थिए। उनीसँगै भागेका थापाको नदीले बगाएर थापाको ज्यान गएको हो। थापाको शव आइतबार दिउँसो भेटिएको छ। चन्द र थापाको विरुद्धमा विगतमा समेत प्रहरीमा उजुरी परेको जिल्ला प्रहरीका कार्यालय प्युठानका इन्सपेक्टर विष्णुप्रसाद पौडेलले जानकारी दिए। मृतक थापा माण्डवी गाउँपालिकाका अध्यक्ष तथा प्युठान नेकपाका नेता श्रीधर रोकाका निकट व्यक्ति भएको बताइएको छ।
शुक्रबार साँझ नै कुटपिटबाट गम्भीर घाइते दिनेश खड्कालाई उपचारका लागि काठमाडौं ल्याइएको छ। करिब २५ जनाको समूहमा रहेका दुई पक्षबीच आर्थिक तथा राजनीतिक विषयले विवादले उग्र रुप लिएपछि कुटाकुट भएको बताइएको छ। विवादपछि कुटाकुट गर्ने दुवै समूह नेकपा निकटका भएको बताएको छ।
इन्स्पेक्टर पौडेलले घटनाको थप अध्ययन भइरहेको बताए। राजनीतिक आबद्धताको कुरा उठेको बताउँदै इन्स्पेक्टर पौडेलले अनुसन्धानकै क्रममा रहेको बताए। कुटाकुटमा संलग्न केही ठेक्कापट्टामा समेत संलग्न रहेको बताइएको छ। छलफलका लागि बसेका दुई पक्षले मदिरा सेवन गरेको समेत बताइएको छ।
शुक्रबार नियन्त्रणमा लिइएका होटल सञ्चालकलाई प्रहरीले आइतबार छोडेको छ। विवादमा संलग्न भक्त बहादुर केसी प्रहरीको नियन्त्रणमै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778588614.png)
-1764146706.png)
