फाइल फोटो
काठमाडौं- प्रधानमन्त्री केपी शर्मा ओलीले आफूले जुत्ता लगाउँदा केहीलाई पीर परेको बताएका छन्।
आइतबार मदन भण्डारीको जन्मजयन्तीको अवसरमा प्रधानमन्त्री निवास बालुवाटारमा आयोजित कार्यक्रममा उनले आफ्नो सम्बन्धमा पनि विरोध भइरहेको बताए। 'तपाईंहरुले देखिरहनुभएको छ, मैले खुट्टामा जुत्ता लगाएको छु। केहीलाई असाध्यै पीर परेको छ। सहिनसक्नु भएको छ', उनले भने।
प्रधानमन्त्री ओलीले आफूलाई गाईभैंसी चराउने गोठालो भएको, कहिलेकहिले चप्पल लगाउँथ्यो, कहिलेकहिले खाली खुट्टा कुद्थ्यो र यो गाईभैंसी चराएर खालि खुट्टा हिँड्नुपर्ने मान्छे हो भनेर चित्रित गर्ने गरिएको बताए। 'केहीलाई यसले जुत्ता लगाएर प्रधानमन्त्रीको कुर्सीमा बस्न मिल्ने हो भन्ने पीर छ', उनले भने।
उनले आफू शासक नभएको बरु सेवक भएको बताए। 'हामी शासक होइनौं। शासक बन्ने इच्छा पनि छैन। म शासक बन्न जन्मिएको मान्छे पनि होइन। देशको सेवा गर्न जन्मिएको हो। मैले राजनीति थाल्दा र राजनीतिक जीवन अघि बढाउँदा कहिल्यै पनि शासकको परिकल्पना गरिनँ। जेलमा हुँदा समेत यस देशको सेवा गरिरहेको छु भन्ने ठान्थें। सही मान्यतामा अडेको छु र सही मान्यताका लागि लडेको छु र त्यसै कारणले जेलमा छु भन्ने मलाई लाग्थ्यो। म आज पनि आफूलाई देश र जनताको सेवक ठान्दछु।'
प्रधानमन्त्री ओलीले आफूले प्रधानमन्त्री भएकोमा कतिपयलाई पीर लागेको बताए। 'केहीलाई पीर छ। थुप्रै बुद्धिजीवीले भनिरहेका हुन्छन्- त्यो चप्पल लगाएर हिँड्थ्यो। भूमिगत हुँदा मैले भेटेको थिएँ, चप्पल लगाएर हिँड्थ्यो। आज जुत्ता लगाएर हिँड्थे। काठमाडौंमा साइकलमा हिँड्थ्यो। त्यो हेर्दाहेर्दै माननीय सांसद, मन्त्री र प्रधानमन्त्री भयो। यो सुहाउने कुरा हो?', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
