काठमाडौं- ६ जनाको ज्यान जानेगरी भएको रुकुमको चौरजारी घटनाका अभियुक्त विरुद्ध आइतबार जिल्ला अदालतमा मुद्दा दायर भएपछि सोमबार थुनछेक आदेश शुरु भएको छ। सो घटनामा ३४ जना आरोपित छन्। सरकारी बकिलको कार्यालयले ३२ जनालाई आजन्म कैद सजाय र क्षतिपूर्ति माग गर्दै मुद्दा दायर गरेको छ भने दुई आरोपी नाबालक भएकाले उनीहरुको हकमा भने कम सजाय माग गरिएको छ ।
घटनामा परी नवराज विक, टिकाराम नेपाली, गणेश बुढामगर, लोकेन्द्र सुनार, सजिव विक र गोविन्द शाहीको ज्यान गएको थियो। प्रहरी अनुसन्धानमा ६ जनाले ज्यान जाने गरी भएको सो घटनाको अन्तरजातिय प्रेम देखिएको छ। अभियोग पत्रमा मृतक सबैको लासजाँच मुचुल्का र पोस्टमार्टम रिपोर्टको निष्कर्षसमेत उल्लेख छ। अभियोगपत्रमा उल्लेख भएको दुवै रिपोर्ट अनुसार मृतक सबैको शरिरमा गम्भीर चोट छन्। मृत्युको कारण भने पानीमा डुबेकाले उल्लेख छ।
प्रेमिका लिन गएका नवराज विकको लाशजाँच मुचुल्का र पोस्टमार्टम रिपोर्ट अनुसार उनको निधारमा १३×५ सेमीको निलडाम, बाँयातर्फ निधारमा १.५ सेमी खोस्रिएको दाग, टाउँकोमा २×०.५ सेमी काटिएको घाउ पाइएको थियो। त्यस्तै बाँया आँखीभौंमा १.५ सेमी. काटिएको घाउ, नाकमा बाहिरी निलडाम रहेको, नाकमा बालुवा रहेको,कानमा बालुवा रहेको, निधार कोतरिएको र सुन्निएको पाइएको उल्लेख छ। चोटको प्रकृति जोडले हिर्काउँला हुने देखिएको नेपाल लाइभलाई प्राप्त अभियोगपत्रमा उल्लेख छ। मृत्युको कारणमा भने पानीमा डुबेर उल्लेख गरिएको छ।
अर्का मृतक टिकाराम नेपालीको पोस्टमार्टम रिपोर्टमा टाउको र अनुहारमा जोडले हिर्काएको देखिएको उल्लेख छ। दुबै आँखाको आँखीभौंमा १×१ इन्चको काटिएको, बाँया कानबाट रगत जस्तो पदार्थ बगेको अभियोगपत्रमा उल्लेख छ। नाकको डाँडीमा घाउ,दुबै आँखीभौंमा काटिएको चारकिल्ला सहितको लाशजाँच मुचुल्कामा उल्लेख छ। उनको पनि मृत्युको कारण डुब्नु उल्लेख छ।
अर्का मृतक गणेश बुढामगरको लासजाँच मुचुल्कामा नाकको डाँडीका कोतरिएको,कानमा बालुवा रहेको,हत्केलाको छाला चाउरी परेको देखिएको अभियोगपत्रमा उल्लेख छ। निधारको भागमा निलडाम रहेको, भित्री भाग थिचिएको, निदार र नाकको डाँडीमा खोस्रिएको दाग रहेको मुचुल्कामा उल्लेख छ।
अर्का मृतक लोकेन्द्र सुनारको शरीरमा समेत जोडले हिर्काउँला भएका चोटहरु देखिएका छन्। उनको निधारमा २×२ से.मी.को खोस्रिएको दाग,दाहिने आँखीभौंको छेउमा १×०.२५ सेमीको काटिएको घाउ पाइएको अभियोगपत्रमा उल्लेख छ। अण्डकोष सुन्निएको,शरिरको ठाउँ–ठाउँको छाला खुईलिएको दाहिने हातको नाडीमा प्लाष्टिकको जाली(पासा) अल्झिएको पाइएको अभियोगपत्रमा उल्लेख छ। मृत्युको कारण डुब्नु उल्लेख छ।
अर्का मृतक सञ्जिव विकको मुचुल्कामा निधारमा २×१ से.मी.भएको खोस्रिएको दाग,बाँया आँखीभौंमा २×०.५ इन्च र दाँया आँखीभौंमा १×०.२५ इन्च चोट रहेको उल्लेख छ। टाउँकोको पछाडी १×०.५इन्चको काटिएको घाउ रहेको,अण्डकोष सुन्निएको लाशजाँच मुचुल्कामा उल्लेख छ। पोस्टमार्टम रिपोर्टमा मृत्युको कारण डुब्नु उल्लेख छ।
अन्तिममा लास भेटिएका मृतक गोविन्द शाहीको लाश पूरै सुन्निएको, शरीरमा रहेका लुगाहरु खोल्न नसकिने भएको रिर्पोटमा उल्लेख छ। पत्तीको सहायताले उक्त लुगाहरु काटी शरीरबाट हटाउँदै खोली लाशलाई ओल्टाई पल्टाई गरी हेर्दा मृतक लाशको शरीर पुरै सुन्निएको र कडा दुर्गन्ध आईरहेको लाशजाँच मुचुल्कामा उल्लेख छ। पुरै शरीर सडीगलेको,सुन्निएको,मलद्धारबाट दिशा जस्तो पदार्थ निस्केको,छाला खुईलिएको प्रतिवेदनमा उल्लेख छ।
पक्राउ आरोपी,घाइते र प्रत्यक्षदर्शीको बयानसँगै लाशजाँच मुचुल्का र शव परीक्षण प्रतिवेदनमा ब्लन्ट फोर्स समेत प्रयोग भएको कारणबाट घाउँचोट लागेको तथ्य स्थापित भएको र उनीहरुको मृत्यु प्रतिवादीहरुले वारदात मितिमा प्रहार गरेका चोट समेतबाट भएको अभियोगपत्रमा उल्लेख छ।
अभियोगपत्रमा उल्लेख भएको पोस्टमार्टम रिपोर्टको विवरण
मृतकको शरीरमा देखिएको घाउ चोटहरुको परीक्षण रिपोर्ट हेर्दा मृतक लोकेन्द्र सुनारको टाउको, दायाँ र बाँयाँ खुट्टामा ब्लन्ट फोर्स प्रयोग भएको उल्लेख छ। तर उनको रिपोर्टमा संभवत डुबेर मरेको हुन सक्ने लेखिएको छ।
निज मृतक लोकेन्द्र सुनारको लास जाँच मुचुल्कामा निधारमा २x२ सेमिखोस्रिएको, दाहिने आँखीभौंको छेउमा १x०.२ सेमी काटिएको, मलद्वारबाट दिसा निस्किएको भन्ने समेत व्यहोरा उल्लेख भएको देखिन्छ ।
मृतक सन्जु भन्ने सन्जिव विकको शव परीक्षण प्रतिवेदनको निष्कर्षमा आँखीभौं लगयतका शरीरको माथिल्लो भागमा समेत चोट भएको उल्लेख छ। यसका साथै पानीमा डुबेका कारण पनि मृत्यु भएको हुन सक्ने व्यहोरा उल्लेख भएको पाइन्छ।
उनको घाँटी सुन्निएको निधारमा २.१ सेमीको चोट भएको खोस्रिएको, बायाँ आखि भौमा १x०.२५ इन्च काटिएको घाउ रहेको भन्ने समेत व्यहोरा उल्लेख भएको देखिन्छ।
नवराजको शव परीक्षण प्रतिवेदनको निष्कर्षमा तीन ठाउँमा चोट देखिएको उल्लेख छ। पाखुरा कुहिनो र टाउकोमा चोट लागेको छसमेत उल्लेख छ। तर मृत्युको कारण भने डुबेकाले पनि हुन सक्ने लेखिएको छ।
विकको लासजाचँ मुचुल्कामा निधारमा १३x५ सेमीनिलडाम निधारमा बायाँ तर्फ १.५ सेमी खोस्रिएको, टाउकोमा २x०.५ सेमी, बायाँ आखीभौँमा १.५ सेमी काटीएको घाँउ भन्ने समेत व्यहोरा उल्लेख छ।
टिकाराम नेपालीको शव परीक्षण प्रतिवेदनमा धेरै स्थानमा ब्लन्ड फोर्स प्रयोग भएको उल्लेख छ। टाउको, अनुहार, घाँटीमा समेत चोट पटक भएको देखिएको उल्लेख भएको पाइन्छ । निज मृतक टिकाराम नेपालीको लास जाचँ मुचुल्कामा कानबाट रगत जस्तो पदार्थ बगेको दुवै आखाको आखीभौँमा खोस्रिएको, १x१ इन्च काटिएको भन्ने समेत व्यहोरा उल्लेख छ।
मृतक गणेश बुढा मगरको शव परीक्षण प्रतिवेदनमा निज मृतक गणेश बुढा मगरको लास जाँच मुचुल्कामा नाक कोतरिएको निधारको भागमा निलडाम रहेको थिचिएको भन्ने समेत व्यहोरा उल्लेख भएको देखिन्छ। मृतक गोविन्द शाहीको शव परीक्षण प्रतिवेदनअनुसार अनुहार निलोरातो सुन्निएको, नाक खुम्चिएको जस्तो सुन्निएको, कानमा रगत जस्तो र बालुवा भरीएको सुन्निई निलो रातो, अघिल्तिरको तलको एक र माथिको एक दाँत दवेको समेत उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
