काठमाडौं– सरकारले पोखरामा निर्माण भइरहेको पोखरा क्षेत्रीय अन्तर्राष्ट्रिय विमानस्थल निर्माणको कामा तोकिएकै सयममा सम्पन्न गर्न लक्ष्य लिएको छ। विमानस्थलको निर्माण सम्पन्न गरिसक्ने समय सन् २०२१ को जुलाईसम्म रहेको छ। सरकारले पनि सन् २०२१ को जुलाईसम्ममा निर्माणको काम सम्पन्न गरी सञ्चालनको तयारी गर्ने बताएको हो।
सोही अनुरुप अर्थमन्त्री युवराज खतिवडाले आगामी आर्थिक वर्ष २०७७/०७८ को बजेट प्रस्तुत गर्दै पोखरा क्षेत्रीय अन्तर्राष्टिय विमानस्थलको कामलाई निरन्तरता दिने आवश्यक रुपैयाँ विनियोजन गरेको उनले जनानकारी दिए।
यसका लागि पनि अन्तर्राष्ट्रिय विमानस्थलका लागि विनियोजन भएको रकमबाट नै काम हुने उनले जानकारी दिए। यो विमानस्थल निर्माणको काम चिनियाँ ठेकेदारले गर्दै आएको छ।
पोखरा क्षेत्रीय अन्तर्रा्ष्ट्रिय विमानस्थल निर्माण गरी पर्यटन उद्योगको प्रबर्द्धन गर्ने सरकारी लक्ष्य छ। सन् २०११ मा आयोजना शुरु भएता पनि नेपाल सरकार र चीन सरकारबीच २०१७ मार्चमा ऋण सम्झौता भई सन् २०२१ सम्म सम्पन्न गर्ने लक्ष्य सहित काम थलानी भएको थियो।
यो आयोजनाको कुल अनुमानित लागत २१ अर्ब ६० करोड रहेको छ। आर्थिक वर्ष २०७५/७६ मा नै यो आयोजनको धावनमार्ग ट्याक्सी वे र एप्रोन निर्माण गर्ने कार्य सम्पन्न भएको थियो। अहिले विमानस्थल भित्र बन्ने टर्मिनल भवन र अन्य १४ वटा भवनहरू निर्माण अन्तिम चरणमा पुगेका छ।
चालु आर्थिक वर्षमा जग्गा अधिग्रहणसहित विमानस्थल निर्माण कार्यको लागि ८ अर्ब विनियोजन गरिएको थियो। अहिलेसम्म विमानस्थल निर्माणमा ५५ प्रतिशत काम भइरहेका छ। देशभर लक डाउन भएपनि विमानस्थल निर्माणको काम भने निरन्तर नै छ।
विमानस्थल आयोजनाका प्रमुख विनेश मुनाकर्मीका अनुसार लक डाउनका कारण भारतीय सिमेन्ट आउन नसकेपछि विमानस्थलको निर्माण कार्यमा केही दिनदेखि नेपाली सिमेन्ट सिमेन्ट प्रयोग भइरहेको छ। तर, विमानस्थल निर्माण गरिरहेको चिनियाँ कम्पनीले रन–वे, पार्किङ(वे तथा भवनको मुख्य संरचनामा भने भारतीय ५३ ग्रेडको सिमेन्ट नै प्रयोग गरेको थियो।
उनका अनुसार अहिले पहिले नै निर्माण भएको भवनको संरचनमा प्लाष्टर गर्नेदेखि मार्वल राख्ने, टायल हाल्ने काम भइरहेको छ। साथै झ्यालहरुमा सिसा हाल्ने काम पनि भइरहेको उनले नेपाल लाइभसँग बताए।
लकडाउन अगाडि नै आएको उपकरण जडानदेखि फिनिसिङको काम भइरहेको छ। कतिपय उपकरण भने भारतको कलकत्ता, चीनको केरुङमा रोकिएको छ। उक्त सामान र प्राविधिकहरू समेत आउन नसक्दा केही उपकरण जडानमा केही समस्या आएको छ।
विमानस्थल निर्माणमा अहिले ढल र पानीको पाइपहरू फिटिङको काम पनि भइरहेको छ। तर, पाइप फिटिङका लागि आवश्यक नट बुल्ट भने समस्या रहेको छ। कतिपय पाइप लाइनमा नै रोकिएका कारण चिनियाँ निर्माण कम्पनीले नेपाली पाइप जडान गर्न अनुमति मागेको थियो। तर, सम्झौतामा एकैथरीको मात्रै पाइप जडान गर्नुपर्ने भनेर उल्लेख भएका कारण नेपाली पाइप भने जडान गर्न दिएएको छैन।
‘लकडाउनसँगै घर गएका नेपाली कामदार काममा नफर्कंदा समेत काममा असर परको छ,’ उनले भने, ‘तर, काम नै ठप्प हुने अवस्था भने छैनन्।’ निर्माणमा अहिले पनि २ सय ५० चिनियाँ कामदार र ९० जनाको हाराहारीमा नेपाली रहेका छन्। विमानस्थल निर्माणको सबैभन्दा गाह्रो काम सकिसकेको छ।
विमानस्थलको निर्माणमा ५५ प्रतिशत काम पूरा भएको बताइएको छ। विमानस्थल आयोजना कार्यालयका अनुसार रन–वे निर्माण, जहाज पार्किङ–वेलगायत १४ वटै भवनको निर्माण भइरहेको छ।
फिनिसिङ र उपकरण जडानको काममा बढी जोड दिइएको मुनाकर्मीले बताए। सरकारले सन् २०२१ को जुलाईभित्रै निर्माण सम्पन्न गरी विमानस्थल सञ्चालनको तयारी गर्ने योजना अगाडि सारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
