धनगढी- स्वास्थ्य तथा जनसंख्या मन्त्रालयले कोरोना संक्रमितको संख्याबारे गलत जानकारी दिँदा सुदूरपश्चिम प्रदेशमा त्रास फैलन थालेको छ। सोमबार दिउँसो ४ बजेको नियमित बिफ्रिङका क्रममा मन्त्रालयका प्रवक्ता विकास देवकोटाले अछाम जिल्लामा थप एक संक्रमित फेला परेको जानकारी दिएका थिए। ‘अछाम जिल्ला अस्पतालमा उपचाररत मेल्लेख गाउँपालिकाका ३२ वर्षीय व्यक्तिमा कोरोना पुष्टि भएको छ,’ प्रवक्ता डा देवकोटाले भनेका थिए।
डा देवकोटाले व्याख्या गरेका संक्रमित ८ गतेदेखि नै सेती प्रादेशिक अस्पतालमा उपचाररत छन्। आइतबारमात्र स्वास्थ्य तथा जनसंख्या मन्त्रालयका प्रवक्ता देवकोटाले नै ‘सेती प्रादेशिक अस्पतालमा गरिएको पिसिआर परिक्षणमा अछामका एक युवामा कोरोना संक्रमित पुष्टि भएको’ बताएका थिए।
सोमबार मन्त्रालयले गरेको नियमित ब्रिफिङका कारण अछाम जिल्लामा त्रास फैलिएको छ। जिल्लामा त्रास फैलिएपछि स्वास्थ्य कार्यालय अछामका प्रमुख झनक ढुंगानाले अछामका अस्पतालमा कोही पनि कोरोना संक्रमित नरहेको बताएका छन्।
‘जिल्ला अस्पताल अछाममा मेल्लेख गाउँपालिकाका कसैलाई पनि आइशोलेसन राखिएको छैन,’ उनले सबैलाई त्रास दिने अभिव्यक्ति नदिन आग्रह र्दै भने, ‘हालसम्म अछाममा कोरोना भाइरसका संक्रमित भेटिएका छैनन्।’
आइतबार पुष्टि भएका अछामका संक्रमितको अहिले सेती प्रादेशिक अस्पतालको आइसोलेसनमा राखी उपचार भइरहेको छ। उनको स्वास्थ्य अवस्था सामान्य रहेको सेती प्रादेशिक अस्पतालले जानकारी दिएको छ।
यस्तै, आइतबार बिहान स्वास्थ्य तथा जनसंख्या मन्त्रालयले फेसबुक पेजमा प्रदेशको कोरोना संक्रमितको संख्या गलत राखेको थियो। मन्त्रालयले संक्रमितको संख्या गलत दिएपछि सुदूरपश्चिममा त्रास समेत फैलिएको छ।
मन्त्रालयले जारी गरेको रिपोर्टमा सुदूरपश्चिममा १४ जना कोरोना संक्रमित रहेको जनाएको थियो। मन्त्रालयका अनुसार सुदूरपश्चिममा कोरोना संक्रमितको संख्या सबैभन्दा बढी बैतडीमा ७ जना, त्यसपछि डडेल्धुरामा ५ जना रहेको उल्लेख थियो। कैलाली र कञ्चनपुरमा एक/एक जना संक्रमित रहेको मन्त्रालयले उल्लेख गरेको थियो।
तर, सो समयमा प्रदेशको कैलालीमा ७, बैतडीमा ५, डडेल्धुरा र कञ्चनपुरमा एक/एक जना कोरोना संक्रमितको पुष्टि भएको थियो। यता, प्रदेशको सामाजिक विकास मन्त्रालयले नियमित जारी गरेको प्रेस विज्ञप्तिमा प्रदेशमा १५ जना कोरोना संक्रमित रहेको पुष्टि गरेको छ। मन्त्रालयका अनुसार प्रदेशमा पा“च जना निको भएर घर फर्किसकेका छन् भने अन्य १० जनाको आइसोलेसनमा राखी उपचार भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
-1786513116.png)
