काठमाडौं- विश्वका दुई ठूला सवारी उत्पादक कम्पनी एक अर्कामा गाभिन सहमत भएका छन्। इटालीको फियाट क्राइसलर अटोमोटिभ्स र फ्रान्सको ग्रुप पिएसएबीच मर्ज हुने सहमति भएको हो। मर्ज भएर बन्ने कम्पनीमा दुवै एफसिए र पिएसएको समान ५०/५० प्रतिशत हिस्सा हुने गरी सहमति भएको छ।
यी दुई कम्पनीको मर्ज भएपछि विश्वको चौथो ठूलो सवारी उत्पादक कम्पनी बन्ने छ। मर्जको अन्तिम प्रक्रिया आगामी वर्षको पहिलो त्रैमाससम्ममा टुंगिने एफसिएका अध्यक्ष जोन इलकानले बताएका छन्।
दुई कम्पनीबीच मर्ज हुने विषयमा विगत केही महिनायता कुरा भइरहेको थियो। हालै सार्वजनिक भएको एक रिपोर्ट अनुसार दुई कम्पनी मर्ज हुने प्रारम्भिक सहमति जुटेको अन्तर्राष्ट्रिय सञ्चार माध्यमहरुले लेखेका छन्।
तर एफसिएको गृह देश इटालीमा भने मर्जको विषयमा आलोचना भइरहेको छ। त्यस्तै एफसिएको पुँजी तथा डेविडेन्टको विषयमा समेत विवाद रहेको छ। कोरोना भाइरसका कारण इटालीमा हजारौं नागरिकको ज्यान भइसकेको छ। यस्तो अवस्थामा मर्जको डिल भएकोमा समेत इटलीमा कम्पनीले आलोचना खेप्नु परिरहेको छ।
हाल एफसिए एक्लै विश्वको आठौं ठूलो सवारी उत्पादक हो। यो कम्पनीमा इटालीका विभिन्न दुई समुहको सेयर समेत रहेको छ। एफसिए २०१४ मा इटालियन–अमेरिकन मल्टिनेसनल कर्पोरेसनको रुपमा स्थापना भएको थियो। एफसिए अन्तर्गत फियाट, जिप, मासेराती, फरारी, राम ट्रक, अबार्थ, अफारोमियो, डजलगायत ब्रान्डका सवारीसाधन उत्पादन हुँदै आएको छ।
फ्रान्सेली कम्पनी ग्रुप पिएसए युरोपको तेस्रो कार उत्पादक हो। कम्पनीले २०१८ मा युरोपमा ३८ लाखभन्दा धेरै कार बिक्री गरेको थियो। ग्रुप पिएसए अन्तर्गत विभिन्न ब्रान्डका मोटरसाइकल सहित प्युजो र सिट्रोन ब्रान्डका कार उत्पादन हुँदै आएको छ।
दुई कम्पनीबीच २०१९ को डिसेम्बरमा भएको प्रारम्भिक छलफलमा ५० अर्ब डलर बन्ड्रिङ सहितको मर्ज गर्ने कुरा भएको थियो। कोरोना भाइरसका कारण विश्वका सबै क्षेत्र जस्तै अटोमोबाइल समेत राम्रैसँग प्रभावित भएको छ।
एफसिए र पिएसएको मर्जले विश्व अटोमोबाइल बजारमा ठूलै तरङग ल्याउने देखिन्छ। दुई कम्पनी मर्ज भएर आउँदा चौथो ठूलो सवारी उत्पादन त हुने नै छन्। त्योभन्दा बढी बजारलाई कति प्रभावित पार्छन भन्ने चासो धेरैलाई भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763193988.png)
