कोरोना अपडेट

कोरोनाका केस सबैभन्दा बढी अमेरिकामा भेटिनु 'सम्मानको ब्याज' : ट्रम्प

नेपाल लाइभ बुधबार, जेठ ७, २०७७ १४:२८

न्युयोर्क- अमेरिकी राष्ट्रपति डोनाल्ड ट्रम्पले अमेरिकामा सबैभन्दा बढी कोरोना भाइरस संक्रमित भेटिनु आफूहरूको सम्मानको कुरा भएको बताएका छन्। सोमबार राष्ट्रपतिको कार्यालय ह्वाइट हाउसमा आयोजित क्याबिनेट मिटिङमा राष्ट्रपति ट्रम्पले विश्वकै सबैभन्दा बढी कोरोना भाइरस संक्रमित अमेरिकामा भेटिनु पनि आफूहरूका लागि सम्मानकै कुरा भएको बताएका हुन्।

'हाम्रोमा धेरै नै कोरोना संक्रमित भेटिएका छन,' उनले भने, 'यो विषय मलाई त्यति नराम्रो हो जस्तो लाग्दैन। किनभने यसको अर्थ हामीले धेरै नै बढी परीक्षण गरेका छौं भन्ने पनि हुन्छ।' बढी परीक्षण भएका कारण बढी संक्रमित भेटिएको र यो कुरा स्वभाविकै भएको उनको तर्क छ। 'त्यसैले मलाई लाग्छ- यो त सम्मानको ब्याज हो। वास्तवमै सम्मानको ब्याज,' उनले थपे।

जोन्स होप्किन्स विश्वविद्यालयका अनुसार अमेरिकामा हालसम्म करिब १५ लाख मानिसमा कोरोना भाइरसको संक्रमण भेटिएको छ। यसमध्ये करिब ९२ हजार मानिसको मृत्युसमेत कोरोना भाइरस संक्रमणबाट भएको छ। अमेरिकापछि दोस्रो स्थानमा रहेको रुसमा करिब ३ लाखभन्दा बढी मानिस कोरोना भाइरसबाट संक्रमित भएका छन्।

मंगलबारसम्म अमेरिकामा १ करोड २६ लाख मानिसको कोरोना परीक्षण गरिएको त्यहाँको रोग नियन्त्रण केन्द्रले जानकारी दिएको छ।

अमेरिकी राष्ट्रपति डोनाल्ड ट्रम्पले गरेको बढी परीक्षणको दाबी संख्यात्मक आधारमा अन्य देशभन्दा धेरै देखिए पनि जनसंख्याको अनुपातका आधारमा हेर्ने हो भने गलत ठहर हुन्छ। यस्तो अनुपातमा हिसाब गर्ने हो भने अमेरिकाभन्दा बढी परीक्षण गर्ने राष्ट्रहरू पनि छन्। अक्सफोर्ड विश्वविद्यालयको सहयोगमा प्रकाशन गरिएको तथ्यांकले प्रति एक हजार व्यक्तिको परीक्षणको कुरा गर्ने हो भने अमेरिका १६औं स्थानमा रहेको छ। यस्तो अनुपातमा अमेरिका दक्षिण कोरियाभन्दा अगाडि त छ तर आइल्यान्ड, रुस र क्यानडाभन्दा पछाडि छ।