वासिङ्टन- अमेरिकी राष्ट्रपति डोनाल्ड ट्रम्प र भारतीय प्रधानमन्त्री नरेन्द्र मोदीबीच फोनवार्ता भएको छ। पछिल्लो समयमा अमेरिका र भारतले कोभिड १९ संक्रमणका विरुद्धमा गरिरहेको संघर्षबारे उनीहरूबीच कुराकानी भएको बताइएको छ।
भारत अमेरिकाको असल मित्रराष्ट्र भएको र कोरोनाविरुद्ध दुवै देशले सहकार्य गरिरहेको विषयमा कुराकानी भएको राष्ट्रपति ट्रम्पले सार्वजनिक गरेका हुन्। वासिङ्टनमा सम्वाददाताहरुसँग राष्ट्रपति ट्रम्पले भारतीय प्रधानमन्त्री नरेन्द्र मोदीसँग शुक्रबार साँझ नै फोनवार्ता भएको बताएका थिए।
'तपाईँहरुका प्रधानमन्त्री नरेन्द्र मोदी मेरा एक असल मित्र हुनुहुन्छ। हाम्रो आज मात्र पनि कुराकानी भएको थियो,' राष्ट्रपति ट्रम्पले भारतीय मूलका अमेरिकी नागरिकप्रति लक्षित गर्दै भने, 'भारत अमेरिकाको एक असल मित्र राष्ट्र हो। हामी दुवै देश यतिखेर कोभिडको महामारीका विरुद्धमा लडिरहेका छौँ। हामीले यस महामारीविरुद्धमा विजय प्राप्त गर्नका लागि एक आपसमा सद्भाव र शुभकामना पनि साटासाट गरेका छौँ।'
अमेरिकाले भारतसँग निकै नजकिको सम्बन्ध कायम गरेर सहमति र सहकार्य गरिरहेको पनि उनले बताए। राष्ट्रपति ट्रम्पले अमेरिकामा ठूलो संख्यामा भारतीय नागरिक बसिरहेको र उनीहरूको अमेरिकी नागरिकसँग असल सम्बन्ध पनि रहेको बताएका थिए।
कोभिडविरुद्धमा पनि अमेरिका र भारतले आपसमा मिलेर सहकार्यका साथ काम गरिरहेको बताएका ट्रम्पले भारतीय र अमेरिकी वैज्ञानिक मिलेर कोरोना भाइरसविरुद्धको खोप पत्ता लगाउने कार्यमा पनि लागिपरेको जानकारी गराए।
अमेरिकी राष्ट्रपति ट्रम्प यसैवर्षको फेबु्रअरीमा परिवारसहित भारतको भ्रमणमा आएका थिए। भारतीय प्रधानमन्त्री नरेन्द्र मोदीले पनि गत वर्ष अमेरिकाको भ्रमण गरेका थिए। कोभिड १९ को महामारी सुरु भएपछि पनि भारतले अमेरिकालाई केही औषधी सहयोग गरेको थियो।
यता भारत पनि पछिल्ला केही हप्तामा कोभिडको महामारीको चपेटामा परेको छ। यहाँ आजसम्म ८६ हजारभन्दा बढी संक्रमित भएका छन् । भारतमा २ हजार ७ सयभन्दा बढी मानिसको ज्यान गएको छ। उता अमेरिका यो महामरीबाट सबैभन्दा बढी प्रभावित भएको छ। अमेरिकामा ज्यान जाने नागरिकको संख्या ८८ हजार ५ सयभन्दा बढी छ। (रासस/एएनआई)
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।