काठमाडौं- गएको साउन १२ गते अस्ट्रेलियामा नेपालको टी २० विश्वकप खेल्ने सपना तुहिएको थियो। सिंगापुरविरुद्धको नमीठो हारसँगै। हार राम्रो त हुँदैन तर सोचेभन्दा धेरै नराम्रो भइदिनु पनि पीडादायी हुन्छ।
नेपाली क्रिकेटमा यस्ता आरोह अवरोह भइरहन्छ। यो प्रसंग आइसिसी टी-२० विश्वकपका लागि एसियाको फाइनल छनोटको हो। जहाँ सिंगापुर टिमले उत्सव मनाइरहँदा नेपाली खेलाडीले भने पाइसकेको मेडल पनि फिर्ता गर्नु परेको थियो।
कमजोर टिमहरुसँग हारेको इतिहासलाई साक्षी राख्दै फेरि एउटा सपना बुनेर नेपाली टिम थाइल्यान्ड पुगेको छ। टी-२० एसिया कपको पहिलो खुड्किलोको रुपमा रहेको एसिसी पूर्वी क्षेत्रीय छनोट प्रतियोगिता च्याम्पियन हुने नेपालको लक्ष्य छ।
यो लक्ष्य सोच्दै गर्दा नेपाली खेलाडीमा सिंगापुरमा ब्यहोरेको हारको झझल्को पक्कै पनि आइरहेको हुनुपर्छ। चाहे त्यो कतारविरुद्धको चार विकेटको हार होस् या, सिंगापुरविरुद्धको ८२ रनको।
शनिबारदेखि सुरु हुने पूर्वीक्षेत्रीय छनोटमा तुलनात्मक रुपमा नेपाल भन्दा आयोजक राष्ट्र थाइल्यान्ड, हङकङ, मलेसिया र सिंगापुर कमजोर टिमहरु हुन्। तर क्रिकेटमा कमजोर टिम भनेर आँक्नु बलियो मानिएको टिमका लागि धेरै घातक हुन्छ।
उद्घाटन खेलको दिन नै नेपालले मलेसियासँग प्रतिस्पर्धा गर्नेछ। मलेसिया बलियो टिम त होइन तर उसले नेपालमाथि सधैँ राम्रो खेल्दै आइरहेको छ।
थाइल्यान्ड प्रस्थान गर्नु अघि नेपाली टिमका कप्तान ज्ञानेन्द्र मल्लले टिम च्याम्पियन बन्ने लक्ष्य रहेको बताएका थिए।
‘हाम्रो लक्ष्य च्याम्पियन बन्ने नै हो। राम्रो तयारी छ। कुनै पनि टिमलाई कमजोर छैन। क्रिकेट हो जे पनि हुन सक्छ। तर हामीले आफ्नो खेल खेल्यौं भने च्याम्पियन हुन्छौं’, प्रस्थान गर्नु अघि कप्तान ज्ञानेन्द्रले भने।
विगतलाई पनि हेरौं
धेरै आत्मविश्वास पनि कुनै बेला घातक नै सावित हुन्छ। आइसिसी टी-२० विश्वकपका लागि एसियाको फाइनल छनोटमा नेपाली क्रिकेट टिमलाई यस्तै भएको थियो।
सिंगापुरमा भएको यो प्रतियोगितामा आयोजकसँगै नेपाल, कतार, कुवेत र मलेसिया थिए। आफूभन्दा कमजोर टिम भएको कारण च्याम्पियन बन्दै विश्वकप छनोटमा पुग्ने नेपाललाई पूर्ण विश्वास थियो।
हुन पनि नेपालभन्दा सबै कमजोर टिम नै थिए। सोचे पनि सबैले यहि। तर नेपाल आफ्नो पहिलो खेलमा नै कमजोर मानिएको कतारसँग नै चार विकेटले स्तब्ध बन्न पुग्यो।
टस जितेर ब्याटिङ गरेको नेपालले २० ओभरमा १ सय २२ रन बनाउँदा सबै विकेट गुमायो। दीपेन्द्रसिंह ऐरीले ३४, तत्कालिन कप्तान पारस खड्काले २८, ज्ञानेन्द्र मल्लले २३ र सोमपाल कामीले ११ रन बनाउनुबाहेक अन्य खेलाडीले दोहोरो अंक समेत छुन सकेनन्। खराब ब्याटिङ रहेको नेपालको ओपनिङ भने राम्रो थियो। तर मध्यक्रमका कुनै पनि ब्याट्सम्यान जम्न सकेनन्।
सामान्य चुनौती पछ्याएको कतारले १९.२ ओभरमा लक्ष्य भेटाउँदा नेपाली बलरको पनि केही सिप चलेन। त्यसअघि नेपालको जितमा बलरले पाउँदै आएको जस पनि खेर गयो। त्यसपछि मलेसिया र कुवेतविरुद्ध समान ७-७ विकेटको जित हात पारेको नेपाल सिंगापुरविरुद्ध ८२ रनको फराकिलो हार ब्यहोर्दा विश्वकप बाटो त्यहिँ समाप्त भयो।
१ सय ९२ रनको लक्ष्य सिंगापुरको पिचमा घरेलु टोलीविरुद्ध नेपाली खेलाडीका लागि एउटा पहाड थियो। जिते विश्वकप छनोटमा प्रवेश, हारे लक्ष्य त्यहिँ अन्त्य।
जवाफी ब्याटिङ थालेको नेपालले १५ ओभरमै अलआउट हुँदा १ सय ९ रन मात्रै बनाउन सक्यो। नेपालका लागि ज्ञानेन्द्र मल्लले ३९ र दीपेन्द्रसिंह ऐरीले २३ रन बनाउन बाहेक अन्य खेलाडी सस्तैमा पेविलियन फर्किए। त्योभन्दा अघि अष्ट्रेलियन मुलका सिंगापुरे खेलाडी टिम डेभिडले ७७, रोहन रंगराजनले ४९ र मनप्रित सिंहले ४२ रन बनाए।
नेपालको स्तर कस्तो?
‘नेपालको खेल कहिले असाध्यै राम्रो देखिन्छ कहिले असाध्यै नराम्रो’ भर्खरै नेपाली टिमको प्रशिक्षकबाट बिदा भएका उमेश पटुवालको यो भनाई नेपाली टिमलाई ठ्याक्क सुहाउँदो छ।
नेपालले बेलाबखत चमत्कार नै गर्छ भने बेलाबखत एकदिवसीय मान्यता कसरी पायो भनेजस्तो लाग्छ। सन् २०१४ को टी-२० विश्वकपमा अफगानिस्तानमाथि ९ रनको जित होस् या, अन्य प्रतियोगितामा नेपालले गरेको प्रदर्शन।
पूर्वी क्षेत्रीय प्रतियोगितामा नेपाल नै सबैभन्दा बलियो टिम हो। यद्यपि यहि प्रतियोगिताको टिम हङकङले भने २०२० को टी-२० विश्वकप खेल्दैछ। तर उसको प्रदर्शन पछिल्लो समयमा नाजुक छ। केही दिन अघि मात्रै मलेसियालाई पाँच खेलको टी-२० सिरिज सुम्पिएको छ।
के अब मलेसिया बलियो टिम हो त? तर त्यसो पनि होइन। हङकङ क्रिकेट यतिबेला पतनमा छ। पूर्वकप्तान बाबर हायत र अंशुमान रथ हङकङ टिममा छैनन्। यी दुबै यस्ता खेलाडी हुन् जसले हङकङलाई विश्वकपसम्म डोर्याएका हुन्।
नेपाली क्रिकेट टिमका पूर्वकप्तान विनोद दास पनि हङकङ बलियो नभएको विश्लेषण गर्छन्। ‘पछिल्लो समयमा हङकङको क्रिकेट अलिकति खस्किएको छ तर हामी सजक भने हुनु पर्छ। भर्खरै ५ खेलको सिरिज हारेर आएको छ। त्यसैले नेपाललाई हङकङ खासै गाह्रो नहोला।’
प्रतियोगिता हो, जे पनि हुन सक्छ। पूर्व अनुमान लगाउनुको तुक खासै नहोला। यसको राम्रो उदाहरण हो, ओमान। ओमानले २०२० मा अष्ट्रेलियामा हुने विश्वकप खेल्दैछ। तर एसिया कपको लागि पश्चिम क्षेत्रीय छनोटबाटै बाहिरियो। ओमानको खराब प्रदर्शन रहँदा युएई विजेता र कुवेत उपविजेता बन्दै एसिया कप छनोटमा प्रवेश गरेका छन्।
नेपालको लागि चुनौती दिने टिममा सिंगापुर छ। पछिल्लो भेटमा सिंगापुरसँग हारेको कारण नेपाललाई अलिक गाह्रो हुने प्रशिक्षक विनोद दासको विश्लेषण छ।
‘सिंगापुर बलियो नै छ। अन्तिम पटक पनि हामीलाई हराएको छ। त्यो हिसाबले अलिकति सजक हुनु पर्छ। मलेसिया जहिले पनि राम्रो टिम हुन्छ। भनौं न हाम्रै लेभलको टिम मान्नु पर्छ। हामीसँगै क्रिकेटमा विकास गरेको टिम हो। तर नेपालको अहिलेको प्रदर्शन हेर्दा यो प्रतियोगिता जित्न खासै गाह्रो नहुनु पर्ने हो’, विनोद दास भन्छन्।
युवा खेलाडीको भर
नेपाली क्रिकेट टिममा अधिकांश युवा खेलाडी छन्। पूर्वकप्तान पारस खड्का, कप्तान ज्ञानेन्द्र मल्ल, विनोद भण्डारी, भुवन कार्की र करण केसी बाहेक ९ खेलाडी उस्तै उमेरका छन्।
उपकप्तान दीपेन्द्रसिंह ऐरी, आरिफ शेख, सन्दीप लामिछाने, अविनाश बोहरा, कुशल मल्ल, सुशन भारी, पवन सर्राफ, सन्दीप जोरा र किशोर महतो करिब उस्तै देखिन्छन्। त्यसैले यो पटक युवा टिममा निकै भरोसा गरिएको छ।
विशेषगरी कुशल मल्ल र पवन सर्राफमध्ये एकले अग्रपंक्तिमा ब्याटिङको जिम्मा पाउने छन्। तर ओपनिङमा पारस र ज्ञानेन्द्र आए मध्यक्रम धान्ने जिम्मा युवा खेलाडीको हुनेछ। यस्तो अवस्थामा दीपेन्द्र, आरिफ, कुशल, सन्दीप जोरा र पवनको मुख्य भूमिका हुने छ भने फिनिसिङ लाइनमा विनोद र करणले सम्हाल्ने छन्।
बलिङतर्फ फास्ट बलर करणबाहेक युवा खेलाडीलाई नै विश्वास गरिएको छ। पहिलो पटक टिममा परेका किशोर महतो र अविनाश बोहरा तिब्रगतिका बलर हुन् भने सन्दीप लामिछाने, सुशन भारी र भुवन कार्की स्पिनरको भूमिकामा छन्। त्यसो त कुशल र पवन पनि राम्रा स्पिनर हुन्।
प्रशिक्षक विनोद दासले यु-१९ टिममा हेरेका अधिकांश खेलाडीले सिनियर टिमबाट खेल्दैछन्। प्रशिक्षक दासलाई कुन खेलाडीको प्रदर्शन कस्तो? राम्रोसँग थाहा छ। त्यसैले उनलाई युवा खेलाडीमाथि भरोसा पनि उत्तिकै छ।
प्रशिक्षक दास भन्छन्, ‘नेपाली टिम राम्रो छ। कुशल र पवनले राम्रो गर्ने छन्। उनीहरु दुबै टी-२० का लागि राम्रा खेलाडी हुन्। दबाब नलिइ खेल्ने छन्।’
प्रशिक्षक उमेश पटुवाल राजीनामा दिएर फर्किएपछि नेपाली टिमको प्रशिक्षकमा पुनः फर्किएका जगत टमाटाले सबै खेलाडी राम्ररी बुझेका छन्। हरेक प्रतियोगितालाई नजिकबाट नियालिरहेका उनको कसलाई कुन भूमिकामा प्रस्तुत गर्ने भन्ने योजना सफल हुने अनुमान भने गर्न सकिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
