नेपाल लाइभ

नेपाल ट्रष्टको मातातीर्थ र थानकोटको १७० रोपनी जग्गा पनि व्यक्तिका नाममा [सूचीसहित]

काठमाडौं- काठमाडौंको मातातीर्थ र थानकोटस्थित ७७ वटा कित्ताका करिब १ सय ७० रोपनीभन्दा बढी नेपाल ट्रष्टको जग्गा व्यक्तिको नाममा सारिएको पाइएको छ।

नेपाल ट्रष्टले आफ्नो नाममा ल्याइसकेको जग्गा २०६९ भदौ २५ गतेको मन्त्रिपरिषदको निर्णयअनुसार मोहीका नाममा दर्ता गरिएको पाइएको हो।

नेपाल ट्रष्टको नाममा आउनुअघिदेखि नै आफूहरु पूर्वराजपरिवारका नाममा रहेको जग्गामा मोही रहेको तर पछि सरकारीकरण भएको दाबी गर्दै उनीहरुले दिएको निवेदन दिएका थिए।

सोही निवेदनका आधारमा तत्कालीन प्रधानमन्त्री डा बाबुराम भट्टराई नेतृत्वको सरकारले मोहीको नाममा दर्ता गर्ने निर्णय गरेको थियो।

मालपोत कार्यालयका कलंकीका सूचना अधिकारी नीलकण्ठ काफ्लेले मन्त्रिपरिषद्को‍ निर्णयअनुसार नै ट्रष्टको जग्गा व्यक्तिको नाममा सारिएको बताए।

मोही हक अनुसार सरकारको निर्णयमा उनीहरुकै नाममा जग्गा नामसारी गरिएको उनको दाबी छ।

कतिपय जग्गा नामसारी हुन बाँकी रहेको भए पनि अधिकांश जग्गा व्यक्तिको नाममा सरिसकेको उनको भनाइ छ।

२०६९ भदौ ११ गते मन्त्रिपरिषदमा ट्रष्टका नाममा रहेको सयौं रोपनी जग्गा व्यक्तिका नाममा ल्याउने प्रस्ताव आएको थियो।