काठमाडौं- इंग्ल्यान्डको मेरिलेबोन क्रिकेट क्लब (एमसिसी) सँगको प्रथम श्रेणी क्रिकेट अन्तर्गत तीन दिवसीय खेलमा नेपाल २ सय ८ रनले पराजित भएको छ। अहिलेसम्म पाँच प्रथम श्रेणी क्रिकेटमा नेपालको यो पहिलो हार हो। यसअघिका चार खेलमा दुई खेल जितेको नेपालले दुई खेल बराबरी गरेको थियो।
त्रिवि क्रिकेट मैदान कीर्तिपुरमा भएको खेलमा एमसिसीविरुद्ध दुवै इनिङमा नेपाली ब्याट्सम्यानहरु सम्हालिएर खेल्न सकेनन्। तेस्रो दिन ३ सय ९३ रनको लक्ष्य पछ्याएको नेपालले ४०.३ ओभरमा १ सय ८४ रन बनाउँदा सबै विकेट गुमाएको हो।
नेपालका लागि ओपनिङमा आएका ज्ञानेन्द्र मल्ल ६ रन बनाएर एलबिडब्ल्यु आउट भएका थिए। अर्का ओपनर राजु रिजाल ३१ रनमा आउट भए। शरद भेषावकरले १५ रन बनाए भने बिनोद भण्डारी, दिपेन्द्र सिंह ऐरी र पवन सर्राफ तीनैजना डकआउट भए। आरिफ शेखले १९ रन बनाए।
यस्तै सोमपाल कामीसँग ४८ रन साझेदारी गरेका करण केसी १८ रनमा आउट भए। एलबिडब्ल्यू आउट भएका उनी अम्पायरको निर्णयसँग असन्तुष्ट थिए। करण आउट भएपछि सोमपाललाई सन्दीप लामिछानेले साथ दिए। सन्दीप २१ रन बनाएर आउट भए।
सोमपाल कामीले ५१ रन बनाए। उनी प्रथम श्रेणी क्रिकेटमा अर्धशतक बनाउने चौथो नेपाली खेलाडी बने। यसअघि राजु खड्का, शरद भेषावकर र शक्ति गौचनले नेपालका लागि प्रथम श्रेणी क्रिकेटमा अर्धशतक बनाएका थिए।
बिहीबार दोस्रो दिन बिहान एमसिसीलाई ३ सय ६४ रनमा अलआउट गरेको नेपालले आफ्नो पहिलो इनिङमा १ सय ५३ रन मात्रै बनाउन सकेको थियो। दोस्रो दिनको खेल सकिनुअघि एमसिसीले दोस्रो इनिङमा २१ ओभर खेलेर २ विकेट जाँदा ९१ रन जोडेको थियो।
तेस्रो दिन शुक्रबार बिहान एमसिसीले थप ४ विकेट गुमाएर ९० रन जोड्दै दोस्रो इनिङमा १ सय ८१ रन बनाएर डिक्लिएर गरेको थियो। यसैले नेपालले ३ सय ९३ रनको लक्ष्य पाएको थियो।
.jpg)
पहिलो इनिङमा पनि नेपालको कमजोर ब्याटिङ
यसअघि आफ्नो पहिलो इनिङमा ४४.४ ओभर खेलेर नेपालले १ सय ५३ रन मात्रै बनाएको थियो। नेपालका लागि ओपनिङ ब्याटिङमा कप्तान ज्ञानेन्द्र मल्ल र राजु रिजाल नै आएका थिए। ज्ञानेन्द्र डकआउट भए भने राजु ८ रन बनाएर आउट भएका थिए। सुरुवातमा नै धरमराएको ब्याटिङ पछिसम्म सम्हालिन सकेन।
तेस्रो क्रममा ब्याटिङमा आएका शरद भेषावकर ४ रनमै आउट भए। दिपेन्द्र सिंह ऐरी १ रनमा, आरिफ शेख १०, बिनोद भण्डारी ३६, पवन सर्राफ २ र सोमपाल कामी २६ रनमा आउट भए। यस्तै करण केसी डकआउट भए।
नेपालका लागि सर्वाधिक रन बनाएका सन्दीप लामिछानेले अविजित ३८ रन बनाए। चार छक्का हानेका उनले एलेक्स थोम्पसनको ओभरमा लगातार तीन छक्कासमेत लगाएका थिए।
नेपालले प्रथम श्रेणी क्रिकेटको इतिहासमा एमसिसीविरुद्धको १ सय ५३ रन नै पहिलो इनिङमा अलआउट हुँदाको सबैभन्दा कम रन हो।
एमसिसीले आफ्नो पहिलो इनिङमा ३ सय ६४ रन बनाएको थियो। बुधबार पहिलो दिनको खेल सकिँदा ६ विकेटको क्षतिमा ३ सय ११ रन बनाएको एमसिसीले बिहीबार बिहान ४ विकेट गुमाएर ५३ रन जोडेको थियो।
नेपालका लागि करण केसी र सन्दीप लामिछानेले तीन–तीन साथै सोमपाल कामी र शरद भेषावकरले दुई–दुई विकेट लिएका थिए। पहिलो दिन बलियो अवस्थामा रहेको एमसिसीलाई दोस्रो दिनको बिहानी शत्रमा नेपाली बलरहरुले दबाबमा राख्न सकेका थिए।
त्यसअघि पहिलो दिन टस जितेर फिल्डिङ रोजेको नेपालले पहिलो दिनको खेल सकिँदा एमसिसीको ६ विकेट लिएको थियो। ८६ ओभरको खेल सकिँदा खराब प्रकाशका कारण अम्पायरले पहिलो दिनको खेल सकिएको घोषणा गरेका थिए।
पहिलो इनिङमा एमसिसीका विल भ्यान्डर्सपरले ५३ रन बनाएका थिए। यस्तै एड योङले १५, माइल्स ह्यामन्डले ५२, टम वेस्ट्लीले ३९, विल रोड्सले ७३ र बिली गोल्डम्यानले १० रन बनाएका थिए।
(1).jpg)
१० जना खेलाडीको प्रथम श्रेणी डेब्यू
यसअघि नेपालले सन् २००५ मा युएईविरुद्ध प्रथम श्रेणी क्रिकेटमा प्रतिस्पर्धा गरेको थियो। त्यसबेला टोलीमा रहेका शरद भेषावकर मात्रै एमसिसीसँग खेलेको टोलीमा समावेश थिए।
शरदबाहेक १० जना खेलाडीको एमसिसीविरुद्धको खेल नै राष्ट्रिय टिमबाट प्रथम श्रेणीमा डेब्यू खेल हो। यसअघि नेपालले २००४ र २००५ मा खेलेका चार प्रथम श्रेणी खेलमा शरद टोलीमा थिए।
नेपाली टोलीमा रहेका सोमपाल कामीसँग भने प्रथम श्रेणी क्रिकेटको अनुभव छ। उनले सन् २०१५–०१६ मा श्रीलंकामा क्लब क्रिकेट खेल्दा सारकेन्स स्पोर्टस क्लबबाट दुई प्रथम श्रेणी खेल खेलेका थिए। त्यसमा २६ ओभर बलिङ गरेका उनले ३ विकेट पनि लिएका थिए। एमसिसीसँग सोमबार भएको एकदिवसीय खेलमा टिमबाहिर रहेका उनलाई प्रथम श्रेणीमा समावेश गरिएको हो।
शरद र सोमपालसँगै टोलीमा कप्तान ज्ञानेन्द्र मल्ल, दिपेन्द्र ऐरी, आरिफ शेख, पवन सर्राफ, बिनोद भण्डारी, करण केसी, ललित राजबंशी, राजु रिजाल र सन्दीप लामिछाने रहेका छन्।
पूर्वकप्तान पारस खड्कासँग प्रथम श्रेणी क्रिकेटमा दुई खेलको अनुभव भए पनि उनी अहिले टोलीमा समावेश थिएनन्। सोमबार एमसिसीविरुद्धको एकदिवसीय खेलमा पनि पारस टोलीमा थिएनन्।
.jpg)
प्रथम श्रेणीमा शरदको सर्वाधिक रनको कीर्तिमान
एमसिसीसँगको खेलमा पहिलो इनिङमा ४ र दोस्रो इनिङमा १५ रन बनाएका शरद भेषावकर नेपालका लागि प्रथम श्रेणी क्रिकेटमा सर्वाधिक रन बनाउने खेलाडी हुन्।
एमसिसीसँगको खेलमा पहिलो इनिङमा ४ रनमा आउट हुँदा नै शरद अहिलेसम्म प्रथम श्रेणीमा नेपालका लागि सर्वाधिक रन बनाउने खेलाडी बनेका थिए।
जतिबेला कप्तान ज्ञानेन्द्र मल्ल डकआउट भएपछि ब्याटिङमा आएका शरदले यसअघि नेपालका लागि प्रथम श्रेणीमा सर्वाधिक रन बनाउने शक्ति गौचनको कीर्तिमान तोडेका हुन्।
यसअघि नेपालले २००४ र २००५ मा खेलेका चार प्रथम श्रेणी खेलमा शरद टोलीमा थिए। जसमा ६ इनिङमा शरदले ३४ को एभरेजमा १ सय ७० रन बनाएका थिए। शक्ति गौचनले शरदभन्दा १ रन बढी बनाएर नेपालका लागि प्रथम श्रेणीमा सर्वाधिक १ सय ७१ रनको कीर्तिमान राखेका थिए। एमसिसीविरुद्ध १९ रन जोडेसँगै शरदको रन १ सय ८९ पुगेको छ।
(1).jpg)
प्रथम श्रेणी क्रिकेटमा पहिलो हार
नेपाल अहिले १४ वर्षपछि प्रथम श्रेणी क्रिकेटमा फर्किएको हो। एमसिसीविरुद्धको हार प्रथम श्रेणी क्रिकेटमा नेपालको पहिलो हारसमेत हो। यसअघि नेपालले सन् २००४ र २००५ मा खेलेका चार प्रथम श्रेणी खेलमा दुई खेल जितेको थियो भने दुई खेल बराबरी गरेको थियो।
सन् २००९ मा एमसिसीसँगै नेपालले तीन दिवसीय खेल खेलेको भए पनि त्यसलाई प्रथम श्रेणीको मान्यता दिइएको थिएन।
नेपालले पहिलो पटक २००४ को मार्च २५ देखि २७ मा आइसिसी इन्टरकन्टिनेन्टल कप अन्तर्गत सारजाहमा युएईविरुद्ध पहिलो प्रथम श्रेणी खेल खेलेको थियो। जसमा खेल बराबरी भएको थियो। त्यसबेला नेपालको कप्तानी राजु खड्काले गरेका थिए।
दोस्रो खेल सन् २००४ कै अप्रिल २३ देखि २५ सम्म नेपालले त्रिवि मैदान कीर्तिपुरमा आइसिसी इन्टरकन्टिनेन्टल कप अन्तर्गत नै मलेसियाविरुद्ध प्रथम श्रेणी खेल खेलेको थियो। त्यसबेला प्रथम श्रेणीमा पहिलो जित निकालेको नेपालले मलेसियालाई ९ विकेटले हराएको थियो।
नेपालको प्रथम श्रेणी क्रिकेटको तेस्रो खेल आइसिसी इन्टरकन्टिनेन्टल कप अन्तर्गत नै हङकङविरुद्ध सन् २००५ को अप्रिल ३० देखि मे २ सम्म त्रिवि मैदान कीर्तिपुरमा नै भएको थियो। बराबरी भएको उक्त खेलमा नेपाली टिमको कप्तानी बिनोद दासले गरेका थिए।
नेपालले प्रथम श्रेणीमा खेलेको चौथो खेल पहिलो खेलकै विपक्षी यु्एईविरुद्ध थियो। आइसिसी इन्टरकन्टिनेन्टल कप अन्तर्गत नै २००५ को मे ७ देखि ९ सम्म त्रिवि मैदान कीर्तिपुरमा खेल भएको थियो। नेपालले १ सय ७२ रनले जितेको खेलमा कप्तान उनै बिनोद दास थिए।
यसैले पारस खड्काको कप्तानीपछि नेपाली राष्ट्रिय टिमको कप्तान बनेका ज्ञानेन्द्र मल्ल प्रथम श्रेणी अन्तर्गतको खेल हार्ने पहिलो कप्तान भएका छन्। यअसघि गएको सोमबार एमसिसीसँगको एकदिवसीय खेलमा भने उनैको कप्तानीमा नेपाल ५ विकेटले विजयी भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
