अटो

पठाओको ठगी : ट्याक्सी उपभोक्ताबाट एक सय अतिरिक्त शुल्क असुल्दै

शिव बोहरा शुक्रबार, साउन २४, २०७६ ११:००

काठमाडौं- एप्लिकेसनमार्फत मोटरसाइकलमा यात्रु बोक्दै आएको पठाओले ट्याक्सी सेवासमेत सुरु गरेको छ। कम्पनीले आफ्नो एपबाट ट्याक्सी बुक गरे एक सय रुपैयाँ अतिरिक्ति शुल्क यात्रुसँग असुल्ने भएको छ।

पठाओ एपमार्फत ट्याक्सी बुक गर्नेले मिटरमा उठेको रकमभन्दा एक सय रुपैयाँ बढी अतिरिक्त शुल्क तिर्नुपर्ने व्यवस्था कम्पनीले गरेको छ। यसले यात्रु उपभोक्तालाई सो एपमार्फत ट्याक्सी प्रयोग गर्दा महँगो हुने देखिएको छ।

आजबाट सुरु भएको पठाओको ट्याक्सी सेवा लिने उपभोक्ताले थप एक सय रुपैयाँ सेवा शुल्क दिनुपर्ने पठाओकी मार्केटिङ म्यानेजर सुरक्षा हमालले बताइन्। ‘एप्लिकेसनबाट हामीले सेवाग्राहीलाई विभिन्न सुविधा दिन्छौं,’ हमालले भनिन्, ‘त्यही सेवा उपलब्ध गराएबापत एक सय रुपैयाँ अतिरिक्त लिइने हो।’

उपत्यकामा एपमा आधारित ट्याक्सी सेवा सारथी तथा इजीट्याक्सी नेपालले समेत उपलब्ध गराउँदै आएका छन्। तर ती कम्पनीहरुले एप्लिकेसन प्रयोग गरेबापत उपभोक्ताबाट मिटरमा उठेको भन्दा अतिक्ति शुल्क लिने गरेका छैनन्। तर पठाओले भने ट्याक्सी मिटरमा उठेको भन्दा एक सय रुपैयाँ बढी शुल्क लिने बताएको छ।

पछिल्लो समय काठमाडौंका ट्याक्सीहरु मिटरमा जान राजी हुने गरेका छन्। ट्राफिक प्रहरीको सक्रियताले उपभोक्ता मिटरमा ट्याक्सी चढ्न पाउने अवस्था आएको हो। मिटरमा नजाने ट्याक्सीको नम्बरसहित सामाजिक सञ्जालमार्फत ट्राफिक प्रहरी जानकारी गराउने चलन बढेको देखिन्छ। कतिपयले फोन नै गरेर ट्राफिकलाई गुनासो गर्न थालेपछि ट्याक्सी चालक मिटरमा जान राजी हुन थालेका हुन्।

पठाओले भने मिटरमा जाने तथा केही सुविधा दिइएको भन्ने बहानामा यात्रु/उपभोक्तासँग एक सय रुपैयाँ अतिरिक्त शुल्क लिने भएको हो।

पठाओले विगतदेखि अवैध रुपमा मोटरसाइकललाई भाडामा प्रयोग गर्ने एप प्रयोग गर्दै आएको छ। यो विषय हालसम्म पनि विवादित रहेको छ। यातायात व्यवस्था विभाग र ट्राफिक प्रहरीले भाडामा निजी सवारी प्रयोग गर्नु कानुनविपरीत भएको भन्दै बन्द गर्न लागेको बेला प्रधानमन्त्री केपी शर्मा ओलीको ठाडो निर्देशनमा कारबाही रोकिएको थियो।

केन्द्र सरकारले यातायात ऐन नबनाएको भए पनि प्रदेश ३ सरकारले बनाएको प्रदेश यातायात ऐनले घुमाउरो भाषामा गैरव्यवसायिक सवारीलाई भाडामा प्रयोग गर्न रोक लगाएको छ। यस्ता सवारी भाडामा प्रयोग गर्ने हो भने रुट पर्मिट लिनुपर्ने व्यवस्था गरिएको छ, जुन असम्भवप्रायः छ।