काठमाडौं– जनकपुर उपमहानगरपालिकाको मेयर पद जनता समाजवादी पार्टीलाई दिएको विरोधमा नेपाली कांग्रेसका नगर सभापति मनोजकुमार साहले पदबाट राजीनामा दिएका छन्।
उनले आजकै मितिबाट आफू स्वतन्त्र भएको र स्वतन्त्र रुपमा निर्वाचन लड्ने बताएका छन्।
‘जसपाको उम्मेदवार नराम्रो मानिस आउने भएकाले हामीले सहयोग गर्दैनौं’, उनले भने, ‘यो नेपाली कांग्रेसको उर्वर क्षेत्र हो। तर, नेपाली कांग्रेसलाई पाखा लगाउने काम केन्द्रबाट भएको छ।’
उनले नगर सभापति र पार्टी सदस्यबाट अहिलेलाई राजीनामा दिएको पत्रकार सम्मेलनमार्फत् घोषणा गरे। वैशाख ११ र १२ गतेसम्म पनि पार्टीले निर्णय सच्चाएन भने आफू स्वतन्त्र उम्मेदवार उठ्ने उनले साहले घोषणा गरे।
‘आजबाट मैले नगर सभापति र साधारण सदस्यबाट राजीनामा दिएका छु’, उनले भने ‘हामीले अहिले केही समयका लागि राजीनामा दिएका छौं। तर, पार्टीले निर्णय नसच्चाएर हामी अलग नै हुन्छौं।’
जसपाको उम्मेदवार भ्रष्टाचार गर्ने मानिस आउने आरोप उनले लगाए। उनले सबै कार्यकर्ताको मत अनुसार आफूले राजीनामा दिएको बताए।
उनले पार्टीको नीति विपरीत काम गर्नेमाथि कारबाही हुने भनी गृहमन्त्री बालकृष्ण खाणले गरेको घोषणालाई पनि चुनौती दिए।
‘केन्द्रबाट कारबाही गर्ने कुरा छ। सक्ने भए गर्नु भए हुन्छ। तर, त्यसअघि नै मैले अहिले नै स्वतन्त्र हुने घोषणा गरेको हुँ’, उनले भने, ‘पार्टीमै नरहेपछि कसरी कारबाही हुने रहेछ हेरौंला।’
केन्द्रबाट भागबण्डा गर्दा उक्त उपमहानगरको मेयर जसपा र उपमेयर कांग्रेसले पाउने सहमति भएको छ। तर, कांग्रेसले दुवै पद आफूहरूले पाउनुपर्ने दाबी गरेको छ।
उनले मधेश नेपाली कांग्रेसको उर्वर भूमि भएको भन्ने तर, त्यसको केन्द्र जनकपुरधाम जसपालाई दिने निर्णय सच्याउनुपर्ने माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1776414047.png)
-1764146706.png)
