काठमाडौं- विद्यालय उमेरबाट नै फिल्म हेर्ने लत परेका प्रदीप भट्टराई अहिले फिल्म निर्देशकका रुपमा परिचित छन्। करिब १५ वर्षसम्म साना-ठूला पर्दा पछाडि रहेर काम गरेका भट्टराईले २०७३ मा फिल्म ‘जात्रा’ निर्देशन गरे।
हास्य कलाकारद्वय मदनकृष्ण श्रेष्ठ र हरिवंश आचार्यको छत्रछायामा हुर्केका भट्टराईको पहिलो निर्देशन रहेको फिल्म ‘जात्रा’लाई दर्शक तथा समीक्षकले जस दिए। परिणामतः भट्टराईले २०७५ मा अर्को फिल्म 'शत्रुगते' निर्देशन गरे। व्यावसायिक रुपमा दोस्रो फिल्म शत्रुगतेले पनि दर्शकको मन जित्यो। त्यसपश्चात् भट्टराई पहिलो फिल्म ‘जात्रा’को सिक्वेल ‘जात्रै जात्रा’ निर्माणमा जुटे।
ज्यानलाई सञ्चो भएपनि मन र मस्तिस्क बिसन्चो छ भट्टराईलाई आजभोलि। व्यस्तता बढेको छ। 'भएको एउटा ज्यानलाई अरु २/४ वटा कपी गरेर थप काम गर्न सके पनि हुन्थ्यो,' भट्टराइले रमाइलो किस्सा गरे। कार्य व्यस्तताको लामो सेड्युलसहितको बेलिविस्तार लगाए।
उनकै लेखन तथा निर्देशनमा बनेको फिल्म ‘जात्रै जात्रा’ रिलिजको संघारमा (जेठ-३) छ। फिल्मको फाइनल सम्पादन तथा प्रचारप्रसारको काम पनि धमाधम चलिरहेकै छ। मुख्य 'ड्राइभर'का रूपमा रहेका भट्टराई कला र क्षमताले भ्याएसम्म उत्कृष्ट फिल्म दर्शकमाझ पस्कन अहोरात्र खटाइमा छन्।
भट्टराईले यसअघि विपिन कार्की ‘फणीन्द्र’, रवीन्द्रसिंह बानियाँ ‘जोएस’, रवीन्द्र झा ‘मुन्ना’, वर्षा राउतलगायतका कलाकार लिएर ‘जात्रा’ निर्माण गरेका थिए। निम्नवर्गीय समाजको प्रतिनिधित्व गर्ने पात्रका कथा समावेश गरिएको फिल्ममा भविष्यका मिठा सपना देख्नेहरूको दैनिकी देखाइएको छ।
बिहान साँझ दुई छाक टार्नकै लागि संघर्षरत देखिएका छन्। तिनै मध्ये एक हुन् फणीन्द्र।बिहानै झिसमिसेमा पत्रिका बाँढ्न उठेका फणीन्द्र अर्डरमा आएका स्टेसनरी/पुस्तकको बोरा सटरभित्र राखेर काममा लाग्छन्। तर फणीन्द्र पुस्तकको बोरा नभएर लुटेर ल्याइएको २ करोड ८० लाखको बोरा सम्हाल्न पुग्छन्।
फणीन्द्रमा महत्वकांक्षाले जरो गाड्छ। मित्रताको हैसियतमा मुन्ना र जोएसको कानसम्म पुग्छ २ करोड ८० लाखको चर्चा। अनि सुरु हुन्छ वास्तविक ‘जात्रा’।
यही लुटिएको पैसाको खेलमा घुमेको छ करिब २ घन्टा ३० मिनेट लामो ‘जात्रा’। तर यसबीचमा दर्शकमाझ धेरै प्रकारका अनुत्तरित प्रश्न जन्मिन्छन्। यी नै प्रश्नहरुको समग्र उत्तर र समयअनुसार परिष्कृत गरी बनाइएको फिल्म ‘जात्रै जात्रा’ले दर्शकलाई 'फुल डोज' मनोरञ्जन दिने दाबी गर्छन् निर्देशक भट्टराई।
‘जात्रै जात्रा’मा पुराना कलाकारसँगै नयाँ कलाकार पनि थपिएका छन्। यसले पनि थप मनोरञ्जन दिन फिल्म सफल हुने अपेक्षा भट्टराईको छ। दयाहाङ राई, राजाराम पौडेललगायत पात्र जोडेका छन् भट्टराईले यस पटक। 'जात्रा'भन्दा थप सशक्त र मनोरञ्जनपूर्ण फिल्म बनाउनु पर्छ भन्ने लागेको छ भट्टराईलाई।
कर्ममा विश्वास राख्ने भट्टराई फिल्मको स्क्रिप्ट र निर्देशकीय पाटो बलियो हुनपर्ने तर्क राख्छन्। नेपाली सिने बजारमा वर्षमा एक सयको हाराहारीमा नेपाली फिल्म प्रदर्शनमा आउँछन्। तर ५ देखि ८ प्रतिशत फिल्मले मात्र लगानी सुरक्षित गर्ने यथार्थ पोख्दै उनी भन्छन्, 'नेपाली फिल्म बजार स्क्रिप्टमा चुकेको छ।'
‘दर्शकलाई बोलाएर होस् वा दयाले हलसम्म पुग्दैमा फिल्म सफल हुन सक्दैन। त्यसका लागि सिंगो फिल्म बलियो हुनु पर्दछ,' निर्देशक भट्टराईले थपे, 'दर्शक बाध्य भएर हलमा आउन सक्ने कथा र प्रस्तुति चाहिन्छ। तब मात्र फिल्म सफल मान्न सकिन्छ र फिल्म उद्योगको सफलता पनि त्यही हो।’
भिडियो अन्तर्वार्ता ‘कला संवाद’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
