काठमाडौं– नक्कली भ्याट बिल प्रकरणमा भाटभटेनी सुपर मार्केटसहित चार कम्पनीको मुद्दा सोमबार पुन: पेशीमा चढेको छ।
प्रधानन्यायाधीश चोलेन्द्र शमशेर राणाले उक्त मुद्दाको पेशी आफू र न्यायाधीश बमकुमार श्रेष्ठको इजालासमा तोकेका छन्।
पछिल्लो पटक चैत १८ गते उक्त मुद्दाको पेशी अदालत आफैले रहस्यमय रुपमा सारेको थियो।
प्रधानन्यायाधीश राणा आफैले चासो दिएर अन्तिम सुनुवाइका लागि राखेको पेशी स्थगित भएको थियो। यसअघि निरन्तर सुनुवाइ गरी किनारा गर्ने भनिएको मुद्दा पेशी सूचीबाट एकाएक हटेको थियो।
आज उक्त मुद्दा दुई थानपछि पेशीमा रहेको छ।
भाटभटेनी, अरुण इन्टरकन्टिनेटल, शंकर ग्यास र महेश बानियाँको मुद्दा एकै साथ सुनुवाइ हुँदै आएको छ। उनीहरुले राजस्व न्यायाधिकरणवाट हारेकाले सर्वोच्चको फैसलामा चलखेल गरिरहेका छन्।
भाटभटेनी लगायतका कम्पनीहरुले मुद्दाको पेशी हटाउन चलखेल गर्दै आएका छन्। नक्कली बिलमार्फत करिब ६ अर्ब रुपैयाँ बराबर ठगी गरेको प्रकरणमा भाटभटेनी मात्र होइन देशका प्रतिष्ठित व्यापारिक घरानासमेत मुछिएका थिए। भाटभटेनीले त ३६ वटा विभिन्न फर्मबाट नक्कली बिल खरिद गर्ने गरेको रहस्य खुलिसकेको छ।
२०५४ सालदेखि चलिरहेको विवाद छिट्टै किनारा लाग्ने आशा गरिए पनि पटकपटक सर्दै आएको छ।
नक्कली बिलबिजक बनाएर ठूलो परिमाणमा मूल्य अभिवृद्धि कर (भ्याट) छली भएको प्रकरणले करिब ८ वर्षअघि राजस्व क्षेत्रमा ठूलो कम्पन सिर्जना गरेको थियो। आन्तरिक राजस्व विभागले करिब एक वर्ष लगाएर गरेको अनुसन्धानले झुट्टा एवं नक्कली भ्याट बिजक बनाई ६ अर्ब रुपैयाँभन्दा बढीको कर छली गरिएको ‘सनसनीपूर्ण’ तथ्य सार्वजनिक तत्कालीन समयमा भएको थियो।
उक्त प्रकरण हाल पनि विचाराधीन मुद्दाको रुपमा सर्वोच्चमा रहेको छ।
व्यापारीको यो चलखेलका कारण यो मुद्दाले किनारा पाउन अझै केही समय लाग्ने देखिएको छ। व्यापारीहरुले छलेको राजस्व तिर्नेभन्दा वर्षौंसम्म अल्झाएर मिनाह गराउने चलखेलका कारण हालसम्म असुल हुन सकेको छैन। सुरुमा व्यापारीहरुले विभागको निर्णयविरुद्ध प्रशासनिक पुनरावलोकन गरेका थिए। त्यसलगत्तै उनीहरु राजस्व न्यायाधिकरण पुगे। न्यायाधिकरणबाट समेत उनीहरुले आफ्नो पक्षमा आदेश नभएपछि मुद्दा सर्वोच्चमा पुर्याका हुन्।
र याे पनि:
नक्कली भ्याट बिल प्रकरण-२ : भाटभटेनीले ३६ फर्मबाट खरिद गर्थ्यो नक्कली बिल
नक्कली भ्याट बिल प्रकरण-१ : सर्वोच्चमा विचाराधीन मुद्दा प्रभावित पार्न व्यापारीको चलखेल
भ्याट छलीको नयाँ शैली, यी हुन् २४ कम्पनी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![एसीसी प्रिमियर कप : नेपाल र ओमान एउटै समूहमा, वैशाख ५ बाट प्रतियोगिता सुरु [भिडियाे]](https://nepallive.net/uploads/posts/500X300/nepal sport thumbs .jpg.00_00_00_00.Still0011679584814.jpg)
![भारतीय कांग्रेसका नेता राहुल गान्धीलाई २ वर्षको जेल सजाय [भिडियाे]](https://nepallive.net/uploads/posts/500X300/rahul gandi thumbs.jpg.00_00_00_00.Still0011679584250.jpg)
![सर्वोच्च अदालतको चक्करमा करोडौं गुमेपछि भाडामा लाग्यो काठमाडौं प्लाजा [भिडियाे]](https://nepallive.net/uploads/posts/500X300/kathmandu plaza bhada ma lagyo thumbs .jpg.00_00_00_00.Still0011679583355.jpg)
