रियाद : साउदी अरबका केही ठाउँमा भीषण वर्षा र हिमपात भएको छ। देशको अल-जौफ मरुभूमिमा भीषण हिमपात भएको छ। यो क्षेत्रको इतिहासमा पहिलो पटक हिमपात भएको हो।
सुक्खा मौसमका लागि परिचित ठाउँमा हिमपात हुनुलाई अनौठो मानिएको छ। सामान्यतया उक्त क्षेत्रमा भीषण वर्षा र असिना परेपछि यो हिमपात भएको हो। यसलाई यो क्षेत्रको मौसममा ठूलो परिवर्तन मानिएको छ।
साउदी प्रेस एजेन्सीका अनुसार अल-जौफमा हिमपातको चिसो स्याँठले सुक्खा ठाउँमा पहिले कहिल्यै नदेखेको दृश्य देखिएको छ। यो घटनाले मौसमविद्हरू आश्चर्यमा परेका छन्। साउदी अरबले गत हप्तादेखि असामान्य मौसमको सामना गरिरहेको छ।
अल-जौफका केही भागमा बुधवार भीषण वर्षा र असिनाले क्षति पुर्याएको थियो। यसपछि उत्तरी सीमा, रियाद र मक्का क्षेत्रमा पनि पानी परेको थियो। मौसममा आएको यो परिवर्तनका कारण तबुक र अल बहा क्षेत्र पनि प्रभावित भएका छन्।
यसपछि सोमबार अल जौफको पहाडी क्षेत्रमा हिमपात भएको थियो। यहाँ परेको हिउँको तस्बीरले सामाजिक सञ्जालमा मानिसको ध्यान तानेको छ।
युएईको मौसम तथा जलवायु विज्ञान केन्द्र (एनसीएम) ले अरब सागरदेखि ओमानसम्म फैलिएको न्यूनचापीय प्रणालीका कारण भीषण असिना परेको जनाएको छ। यसले यस क्षेत्रमा आर्द्रताले भरिएको हावा ल्यायो, जुन सामान्यतया सुक्खा हुन्छ। जसका कारण साउदी अरब र संयुक्त अरब अमीरात (युएई)मा मेघगर्जन, असिना र वर्षा भइरहेको छ।
साउदी अरबमा हिमपात दुर्लभ हो तर वर्षौँदेखि मौसममा परिवर्तन भइरहेको छ। केही वर्षअघि अरब मरुभूमिमा तापक्रममा नाटकीय गिरावट आएको थियो र यो माइनस २ डिग्री सेल्सियस पुगेको थियो। यसका लागि जलवायु परिवर्तनको व्यापक प्रभावलाई जिम्मेवार मानिन्छ। पश्चिम एसिया जलवायु सम्बन्धी प्रभावहरूको लागि सबैभन्दा कमजोर क्षेत्रमध्ये एक हो।
बदलिँदो वायुमण्डलीय अवस्थाका कारण मरुभूमिमा हिमपात जस्ता असामान्य घटना भइरहेको विज्ञहरू बताउँछन्। यो वर्षको शुरुमा साउदी अरबको राजधानी रियादमा भीषण वर्षापछि ठूलो बाढी आएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
