भुटानलाई ७ गोल हान्दै बंगलादेश पुग्यो फाइनलमा

समाचार

नेपाल लाइभ आइतबार, कात्तिक ११, २०८१ १५:३७

काठमाडौं– तोहुरा खातुनको ह्याट्रिकसँगै बंगलादेश लगातार दोस्रोपल्ट साफ च्याम्पियनसिप २०२४ को फाइनलमा प्रवेश गरेको छ। त्रिपुरेश्वरस्थित दशरथ रंगशालामा आइतबार भएको पहिलो सेमिफाइनलमा भुटानमाथि ७-१ को फराकिलो जित निकाल्दै बंगलादेश उपाधिनजिक पुगेको हो।

अघिल्लो संस्करणको सेमिफाइनलमा पनि बंगलादेशले भुटानलाई नै पराजित गर्दै फाइनलमा स्थान बनाएको थियो। त्यो बेला बंगलादेशले ८-० को फराकिलो जित निकालेको थियो। दुई संस्करणको सेमिफाइनलमा मात्रै भुटानले बंगलादेशसँग १५ गोल खायो। त्यसमा एक गोल मात्रै फर्काउन सफल बन्यो।

बंगलादेशकी तोहुरा खातुनले ह्याट्रिक गरिन्। साविना खातुनले दुई गोल गर्दा ऋतु पोर्ना चक्मा र सेउली अजिम नाममा रह्यो। भुटानकी डेकी लाजोमले एक गोल फर्काइन्।

बंगलादेशले सातौं मिनेटमै सुरुआती अग्रता लियो। फरवार्ड तोहुराको पासमा रितुले बक्स नजिकैबाट गरेको लेफ्ट फुटेड प्रहार गोलमा परिणत भएको थियो। त्यसको पाँच मिनेटपछि बंगलादेशले अग्रता दोब्बर बनायो। रक्षक सेउली अजिमको पासलाई तोहुराले गोलमा परिणत गरेकी थिइन्। उनको लेफ्ट फुटेड फितलो प्रहारलाई संगीता मोङ्गरले बचाउन सकिनन्।

२४औं मिनेटमा भुटानले सुनौलो अवसरमा गोल गर्न सकेन। मिडफिल्डर डेकी याङ्दोनको थ्रु पासमा फरवार्ड नाङ्गेलको प्रहारलाई बंगलादेशकी गोलकिपर रुप्ना चक्माले सहजै नियन्त्रणमा लिइन्।

लगत्तै सवीनाले नै बंगलादेशको अग्रतालाई ३-० मा पुर्‍याइन्। उनले राइट साइडबाट मोनिका चक्माले प्रदान गरेको क्रसलाई सदुपयोग गर्दै वान टचमा गोल गरिन् ।

३५औं मिनेट तोहुराले विपक्षी रक्षक सुकमाया घलेलाई छक्याउँदै चलाखीपूर्ण ढंगबाट अर्को गोल थपिन्। त्यसको दुई मिनेटपछि नै सवीनाको दोस्रो गोलमा बंगलादेशले पाँच गोलको अग्रता लियो। सवीनाले यसपाली वान भर्सेस वानमा भुटानी गोलकिपर संगीतालाई बिट गरिन्।

४१औं मिनेटमा डेकी लाजोमले भुटानका लागि एक गोल फर्काइन्। ५८औं मिनेटमा तोहुराले ह्याट्रिक पूरा गरिन्। मसुरा प्रविनले निकाल्दिएको पासमा उनले अफ साइड बिट गर्दै बललाई जाली चुमाइन्।

७३औं मिनेटमा सेउलीले बंगलादेशको अग्रता ७-१ मा पुर्‍याइन्। सन्जिदा अख्तरको कर्नरमा आएको बललाई उनले हेडरमार्पत गोल गरेकी हुन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

प्रतिनिधि सभाका सचिव अधिकारीले दिए राजीनामा

सिनामंगलस्थित होटलमा दुई युवायुवती मृत अवस्थामा भेटिए

स्टार स्पोर्ट्सलाई एनपीएल प्रत्यक्ष प्रसारण दिने निर्णयमा क्यानलाई विज्ञापन बोर्डले सोध्यो स्पष्टीकरण