काठमाडौँ- सिनेमा ‘नरसिंहाः अवतार’को शुभ मुहूर्त गरिएको छ। बिहीबार काठमाडौंको एनएफडीसी स्टुडियो बालाजुमा दिवाकर भट्टराईको निर्देशनमा बन्ने सिनेमाको मुहूर्त गरिएको हो।
मुहूर्तमा सिनेमाका निर्माता नरेन्द्र महर्जनले क्ल्याप हानेका थिए भने निर्माता-वितरक छविराज ओझाले नरिवल फुटाएका थिए। यस्तै वितरक करण श्रेष्ठले एक्सन-कट गरेका थिए। मुहुर्तपश्चात् आजैबाट सिनेमाको सुटिङ सुरु भएको छ।
कार्यक्रममा सिनेमाका मुख्य कलाकारहरु राजेश हमाल ,राज कटुवाल, नीति शाह, सनिशा भट्टराई र अर्जुन श्रेष्ठ लगायतको उपस्थित थिए।
निर्देशक भट्टराईले यो सिनेमाका लागि चुनौती रहेको बताए। ‘यो फिल्म मेरो लागि निकै च्यालेन्ज छ। राजेश दाइले धेरै स्क्रिप्टहरु नगरेर मेरो स्क्रिप्ट गर्नु नै मेरो लागि च्यालेन्ज हो। किनकी राजेश दाइलाई कन्भेन्स गर्नलाई नै मलाई ३ महिना लागेको थियो’, भट्टराईले भने।
निर्माता महर्जनले फरक तरिकाले निर्माण हुने भएकोले आफू यो सिनेमाको निर्माता बनेको बताए।
यसैगरी महानायक हमालले सिनेमाको कथा फरक हुनु र टिमअप राम्रो हुनु नै आफू सिनेमामा जोडिनुको कारण रहेको खुलाए भने सिनेमाका अर्का अभिनेता राज कटुवालले आफूले सानै बेलादेखि नै राजेश हमालको पोस्टरहरु कलेक्सन गर्दै आएको र अहिले आएर सँगै सिनेमा खेल्न पाउदा आफू निकै उत्साहित रहेको बताए।
त्यसैगरी अभिनेत्री नीति शाहले यो सिनेमा आफ्ना लागि निक्कै चुनौतीपूर्ण भएको र राजेश हमाल भएकै सिनेमा जोडिएको बताइन्।
‘मलाई राजेश हमालले पहिल्यैदेखी नै फिल्म खेल खेल भन्नुहुन्थ्यो, अहिले आएर उहाँसँगै काम गर्न पाउँदा एकदमै खुसी लागेको छ’, उनले भनिन्।
फिल्मकी अर्की नायिका सनिशा भट्टराईले आफ्ना बाबु राजेश हमालको फ्यान भएको उल्लेख गर्दै सँगै काम गर्न पाउँदा उत्साहित भएको प्रतिक्रिया दिइन्।
निर्माणपक्षले सिनेमा आगामी फागुन १४ गते शिवरात्रिमा रिलिज हुने जानकारी दिएको छ।
सिनेमामा महानायक राजेश हमाल, राज कटुवाल , नीति शाह, सरोज खनाल, सनिशा भट्टराई, दीपा शाही, प्रशान्त ताम्राकार, नीर शाह, रमेश चन्द सोडारी, प्रकाश कुँवरलगायतका कलाकारहरुको अभिनय रहनेछ।
क्रिएटिभ सिने आर्टको प्रस्तुति रहने यो सिनेमाका द्वन्द्व निर्देशक चन्द्र पन्त हुन्। यो सिनेमालाई निर्माता नरेन्द्र महर्जन, पशुराम बस्नेत र धुर्ब न्यौपानेले सयुक्त रुपमा निर्माण गर्दैछन्।
यो सिनेमालाई एप्पल इन्टरटेन्मेन्ट, एफडी कम्पनी र रिच इन्टरटेन्मेन्टले सयुक्त रुपमा वितरण गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
