बंगलादेशमा नोबेल विजेता युनुसको नेतृत्वमा अन्तरिम सरकार गठन गर्न प्रस्ताव

विश्व

नेपाल लाइभ मंगलबार, साउन २२, २०८१ ०८:०१

काठमाडौं-बंगलादेशमा आन्दोलनलत पक्षले अन्तरिम सरकारको नेतृत्व नोबेल पुरस्कार विजेता मुहम्मद युनुसले गर्नुपर्ने प्रस्ताव गरेका छन् । उनीहरुले अन्तरिम सरकारको खाकासमेत तयार पार्दै युनुसको प्रस्ताव गरेका हुन् ।

आज बिहान सवा चार बजे जारी गरिएको एक भिडियो सन्देशमा आन्दोलनका संयोजकहरु नहिद इस्लाम, आसिफ महमुद र अबु बकर मजुमदारले अबको २४ घण्टाभित्र अन्तरिम सरकारको पूर्ण खाका तयार पारिने बताएका हुन् ।

बंगलादेशी प्रधानमन्त्री शेख हसिनाले पद त्याग गरेर देश छाडिसकेपछि पनि रातभर प्रदर्शन र हिंसा जारी रहेका कारण आन्दोलनका संयोजकहरुले राति नै नयाँ अन्तरिम सरकारबारे आफ्नो धारणा राखेका हुन् । यसअघी हिजो राति नै राष्ट्रपति मोहम्मद शाहबुद्दीनले अन्तरिम सरकार बनाउन आफ्नो अनुमति जनाएका थिए ।

सेना, नेभी, एयर फोर्स, विभिन्न राजनीतिक पार्टी र समाजका प्रतिनिधिहरुसँग गरिएको छलफलपछि राष्ट्रपति भवनमा सो निर्णय लिइएको बंगलादेशी सञ्चारमाध्यमहरुले जनाएका छन् । शेख हसिनाले देश छाडे पश्चात प्रदर्शन झनै उग्र भएको अवस्थामा शान्ति, सुरक्षा र कानुनको पालना गराउने जिम्मेवारी हालका लागि सेनालाई दिइएको छ ।

हसिना विदेश पलायन भएको केही घण्टापछि नै राष्ट्रपति शाहबुद्दीनले जेलमा रहेकी पूर्व प्रधानमन्त्री खालेदा जिआ र विरोधका क्रममा थुनिएका सम्पूर्ण विद्यार्थीहरुलाई रिहा गर्न आदेश दिएका थिए ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

पार्टीभित्र कसैलाई काखा र कसैलाई पाखा गरियो : डा कोइराला

पाकिस्तानमा आक्रमणमा १६ सैनिकको मृत्यु, ८ घाइते

जर्मनीमा क्रिसमसमा भएको आक्रमणमा परी पाँच जनाको मृत्यु, २०० भन्दा बढी घाइते