जेनेभा– संयुक्त राष्ट्रसङ्घका पूर्व महासचिव कोफी अन्नानको शनिबार भएको निधनप्रति विश्वभरबाट दुःख व्यक्त गरिएका शोक सन्देशहरू प्राप्त भएका कोफी अन्नान फाउन्डेसनले शनिबार जानकारी गराएको छ।
संयुक्त राष्ट्रसङ्घ प्रमुख एन्टोनियो गुटेर्रेसले शनिबार एक विज्ञप्ति जारी गरी राष्ट्र सङ्घका पूर्व महासचिव अन्नानको निधनप्रति गहिरो दुःख व्यक्त गर्दै अन्नानले एक असल परिणामका लागि जीवनभर प्रतिवद्ध रहँदै समानताका लागि निरन्तर काम गरेको स्मरण गरे।
‘धेरै रूपबाट कोफी अन्नान संयुक्त राष्ट्रसङ्घ हुनुहुन्थ्यो। उहाँले राष्ट्र सङ्घलाई नयाँ शहस्राव्दीमा अतुलनीय उचार्इमा पुर्याउनुभएको थियो।,’ गुटेर्रेसले भने, ‘अन्य साथीहरूलाई जस्तै कोफी अन्नानलाई एक असल साथी भन्न पाउँदा मलाई गर्वको महशुस हुन्छ।’
यसैबीच, घानाका राष्ट्रपति नाना आकुफो अड्डाले अन्नानको मृत्युले घाना स्तब्ध भएको भन्दै उनको सम्मानमा घाना तथा यसका कुटनीतिक नियोगहरूमा हक हप्ता आधा झण्डा झुकाएर शोक मनाउने बताए।
अमेरिकामा भएको सेप्टेम्बर ११ को घटनाले विश्व विक्षिप्त बनेका समय राष्ट्रसङ्घको प्रमुखका रूपमा जिम्मेवारी सम्हालेका अन्नानले विश्वलाई शान्तिका लागि एक सक्षम नेतृत्व प्रदान गरेका राष्ट्रपति नानाले स्मरण गरे।
अन्नानले केन्यामा निर्वाचनपछि देखिएको राजनीतिक सङ्कटलाई सन् २००७ मा सफलतासाथ सम्पन्न गर्न महत्वपूर्ण भूमिका खेलेका थिए।
फाउन्डेसनका उप प्रमुख, नर्वेका पूर्व प्रधानमन्त्री तथा विश्व स्वास्थ्य सङ्गठनका पूर्व प्रमुख ग्रो हार्लेम ब्रन्टल्याण्डले अन्नानको मृत्युपछि एक विज्ञप्ति जारी गरी कोफीले विश्वका लाखौँलाख मानिसको जीवन सुधारका लागि काम गरेका बताएका छन्।
‘आज उहाँको निधनप्रति शोक व्यक्त गर्दै गर्दा हामीले यो सङ्कल्प गर्छौँ कि आगामी दिनमा उहाँले देखाएको बाटो र मूल्यमान्यताप्रति इमान्दार रूपले काम गर्नेर्छौँ। हाम्रो लागि यही नै उहाँप्रतिको सच्चा सम्मान हुनेछ।’, विज्ञप्तिमा भनिएको छ।
उत्तर एटलान्टिक सन्धि संगठन (नेटो) प्रमुख तथा नर्वेली पूर्व प्रधानमन्त्री जेन्स स्टोलटेनबर्गले पनि अन्नानले कुनै व्यक्ति एकै समयमा ठूलो मानवीय सहयोगी र बलियो नेता बन्नसक्छ भन्ने देखाएर हामीबाट बिदा भएको बताए। ‘शनिबार राष्ट्र सङ्घ र विश्वले आफ्नो महान व्यक्तिलाई गुमाएको छ।,’ स्टोलटेनबर्गले भने।
राष्ट्रसङ्घका मानवअधिकार मामिला हेर्ने उच्च नियोगका जेयद राद अल हुसेनले पनि अन्नानको निधनबाट आफु स्तब्ध भएको बताएका छन्। उनले भनेका छन्,‘कोफी मानवीयता, इमान्दारिता र दयाका उत्कृष्ट उदाहरण हुनुहुन्थ्यो। उहाँको निधनबाट विश्वलाई अपुरणीय क्षति पुगेको छ। उहाँ हजारौँको साथी र लाखौँको नेता हुनुहुन्थ्यो।’
रूसी राष्ट्रपति भ्लादिमिर पुटिनले पनि शनिबार नै राष्ट्रसंघ पूर्व प्रमुख अन्नानको निधनप्रति दुःख व्यक्त गर्दै राष्ट्रसंघ प्रमुख गुटेर्रेसलाई एक शोक सन्देश पठाएका छन्। पुटिनले सन्देशमा लेखेका छन्, ‘मैले यस घडीमा अन्नानकोे विवेक र शाहस र एकदम जटील अवस्थामा पनि सहज निर्णय दिनसक्ने क्षमताको प्रशंसा गर्न चाहन्छु। उहाँलाई रूसी नागरिकहरूले सधैँ स्मरण गरिरहनेछन्।’
त्यस्तै, बेलायती प्रधानमन्त्री थेरेसा मेले अन्नान एक विशिष्ठ विश्वनेता तथा राष्ट्रसङ्घका सुधारक रहेको भन्दै अन्नानको स्मरण गरेकी छिन्। त्यस्तै पूर्व प्रधानमन्त्री टोनी ब्लेयरले अन्नान आफ्नो ‘एउटा असल’ साथी भएको बताएका छन्। ‘हामीले उहाँको शान्त र प्रतिवद्ध सोचलाई कहिल्यै बिर्सिने छैनौ। नत उहाँको सङ्घर्षशील भावनालाई हामीले बिर्सन सक्नेछौँ।,’ उनले भने।
भारतीय प्रधानमन्त्री नरेन्द्र मोदीले ट्विटरमार्फत अन्नानको निधनप्रति दुःख व्यक्त गरेका छन्। उनले लेखेका छन्, ‘नोबेल पुरस्कार विजेता व्यक्तित्व तथा राष्ट्रसङ्घका पूर्वमहासचिव कोफी अन्नानको निधनबाट हामी अत्यन्त मर्माहित भएका छौँ। विश्वले एक उत्कृष्ठ अफ्रिकी कूटनीतिज्ञ र मानव कल्याणका लागि काम गर्ने विश्व नेता मात्र होइन अन्तर्राष्ट्रिय शान्ति र सुरक्षाका लागि विवेकको नेतृत्वलाई पनि गुमाएको छ।’ रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
