काबुल– अफगानिस्तानको गजनी शहरबाट तालिवान विद्रोहीलाई धपाउने क्रममा तीन दिनदेखि भइरहेका युद्धमा परी करिब ३ सय जनाको मृत्यु भएको अफगानिस्तानी रक्षा मन्त्रीले सोमबार बताएका छन्।
तालिवानी समूहले गजनीस्थित निर्वाचन कार्यालयमा आगलागी गरी काबुल–कान्दाहर राजमार्गलाई अवरुद्ध गर्ने प्रयासपछि भएका भीडन्तमा परी कम्तीमा १ सय सुरक्षाकर्मीले ज्यान गुमाएका रक्षामन्त्री तारिक शाह बरामीले काबुलमा गरेको पत्रकार सम्मेलनमा पुष्टि गरेका छन्।
‘उक्त भिडन्तमा विद्रोहीतर्फका १ सय ९४ लडाकूको मृत्यु भएको छ भने मृतकमध्ये ९५ जना तालिवानी लडाकू रहेका छन्।,’ रक्षामन्त्री बरामीले थपे। सरकारी फौज र विद्रोहीबीचको भीडन्तमा परी २० देखि ३० सर्वसाधारणको मृत्यु भएको पनि उनले जनाए।
मृतक विद्रोहीमध्ये १२ जना तालिवानी कमाण्डरस्तरका लडाकू रहेका रक्षामन्त्रीले दावी गरे। शुक्रबारबाट सुरु भएको सरकारी सुरक्षाकर्मी र विद्रोहीबीचको भीडन्तका क्रममा गजनी शहर र शहर वरपरका क्षेत्रको सञ्चार सञ्जाल प्राय अवरुद्ध बनेको छ। यस विषयमा स्थानीय अधिकारीहरूसँग गजनीको अवस्थाबारे गरिएको प्रश्नमा उनीहरूले कुनै प्रतिक्रिया दिन चाहेनन्।
विगत तीनदेखि भएका भीडन्तमा भएको मानवीय तथा अन्य भौतिक क्षतिबारेका सूचना पुष्टी गर्न कठीन रहेको उनीहरूले बताए।
गजनीको भीडन्तबारे तालिवानी समूहबाट कुनै आधिकारिक प्रतिक्रिया आएको छैन। तालिवानी समूहले करिब १७ वर्षदेखि सरकार विरुद्ध गर्दै आएको युद्धलाई स्थायी रूपमा अन्त्य गर्न तालिवानी समूहमाथि दवाव आइरहेका समय विद्रोहीले आफ्नो शक्ति कमजोर अवस्थामा नपुगेको पुष्टी गर्नका लागि उनीहरू उद्दत भएको पाइएको अफगानी सञ्चारमाध्यमहरूले जनाएका छन्।
सरकारले मुसलमानहरूको मुख्य पर्व इदका अवसरमा सरकार र तालिवान समूहले गत जुनमा गरेको युद्धविरामसँगै दुवै पक्षले युद्धविराम चाहेका भन्ने भनाइहरू आइरहेका समय तालिवान समूहले गजनीमा आक्रमण गरेको हो। इदका अवसरमा दुवै पक्षबाट भएको अस्थायी युद्धविरामबाट युद्धका कारण थकित बनेका अफगानी सर्वसाधारणले राहतको महशुस गर्दै प्रशंषा गरेका थिए।
गजनी शहर काबुल–कान्दहर राजमार्गमा पर्ने विद्रोही नियन्त्रित दक्षिण र सरकारको उपस्थिति रहेको क्षेत्रको मुख्य प्रवेशद्वार हो। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
