तस्बिर–अल जजिरा
काठमाडौं– मंगलबार अपराह्न राजधानीको केन्द्र र जनप्रतिनिधिको सर्वोच्च स्थान संसद् भवनको ठीक साम्मुन्ने प्रेम आचार्यले आत्मदाह गरे। उनको आत्मदाहले अरब क्रान्तिका नायक मानिएका मोहम्मद बौउजीजीलाई सम्झाएको छ। आत्मदाह गर्दै करिब ८० प्रतिशत शरीर जलेका प्रेमको बुधबार बिहान कीर्तिपुर बर्न अस्पतालमा निधन भइसकेको छ।
संसद्का सामुन्ने र देशका कार्यकारी प्रमुख प्रधानमन्त्री पुष्पकमल दाहाल प्रचण्डको सवारी अघि प्रेमले आत्मदाह गरेको दृश्यले राज्य संयन्त्रको र राज्यका अनेक कमजोरीरीका कारण आम मानिस मृत्युको बाटो रोज्न बाध्य हुनेपरेको सार्वजनिक बहस हुन थालेको छ।
प्रेमले स्वयंले आत्मदाहअघि सामाजिक सञ्जाल फेसबुकमा करिब ६ हजार माथि शब्दमा आफूले उक्त बाटो रोज्नुबारे उल्लेख गरेका छन्। इलाम स्थायी ठेगाना रहेका आचार्यले काठमाडौंमा विभिन्न व्यवसाय गरेको उल्लेख गरेका छन्। तर, आफूले गरेको व्यवसायले चरम आर्थिक संकट झेल्दा राज्यबाट र सरोकारवाला निकायबाट असहयोग पाएको र जसका कारण आफू मानसिक बिमारीसमेत हुन पुगेको लेखेका छन्।
उनको स्टाटसको गुदी कुरा राज्य र अन्य संयन्त्र निकम्मा हुनाले मानिस आत्मदाह–आत्महत्यासम्म गर्छ भन्ने देखिन्छ। प्रेमको आत्मदाहले अरब क्रान्तिको बीउ रोपेका ट्यूनिसीयाका मोहम्मद बौउजीजीको आत्मदाहलाई स्मरण गराएको हो।
किन गरे बौउजीजीले आत्मदाह?
सन् २०१० को अन्त्यतिर ट्यूनिसियाका सडक व्यापारी मोहम्मद बौउजीजीले स्थानीय सरकारको व्यवहारले आजित भएर आत्मदाह गरेका थिए। २६ वर्षीय बौउजीजीको आत्मदाहले राज्यविरुद्ध आन्दोलनको यस्तो उभार ल्यायो कि करिब २४ वर्षदेखि सत्तामा रहेका तत्कालीन राष्ट्रपति जीने अल अबदीन बीन अली सन् २०११ को जनवरीमै देश छोडेर भाग्नुपर्यो।
सोही वर्षको अक्टोबरमा ट्यूनिसियामा निर्वाचन भयो र सन् २०१४ मा नयाँ प्रजातान्त्रिक संविधान जारी भयो। त्यस पछि सन् २०१९ को मध्यमा नियमित निर्वाचनको माध्यमबाट नयाँ सरकारलाई सत्ता हस्तान्तरण भएको छ।
ट्यूनिसियाको सर्वसत्तावादविरुद्धको उक्त आन्दोलनलाई ‘जस्मिन रिभोलुसन (क्रान्ति)’ पनि भनिन्छ। ट्यूनिसियाबाट सुरु भएको अरब क्रान्ति इजिप्ट, यमन, बहराइन, लिबिया, सिरीया, हुँदै अरु देशहरुमा पनि पुगिसेकेको छ। अरब राज्यहरुमा जनताबाट निर्वाचित तर सत्तामा गएर तानाशाही बनेका लिबियाका शासक महोमम्द गद्दाफीको तत्कालीन समयमै पतन भइसकेको छ।
त्यस्तै, सिरियाका शासक बसर अल असद पनि निकै कमजोर अवस्थामा सत्ताकै बागडोरमा रहेका छन्। असदका पिता नै जनताबाट निर्वाचित भएका थिए। उनी १९७१ बाट सत्तामा थिए। छोरा असद पनि करिब २ दशक ज्यादा समयबाट सत्तामा छन्।
किन तुलना हुँदै छ प्रेमको बौउजीजीसँग?
प्रेमको आत्मदाहलाई अरबका तानाशाहलाई पतनको बाटोमा लाने क्रान्तिका नायक मानिएका बौउजीजीसँग तुलना गर्नुको अर्थ नेपालमा मौलाएको भ्रष्टाचार रहेको लेख्छन् सत्ताधारी दलका नेता तथा राष्ट्रिय जनमत पार्टीका अध्यक्ष सिके राउत।
टुइटरमा स्टाटस राख्दै राउत लेख्छन्, ‘म आचार्यजीको आत्मदाह मोहम्मद बौउजीजीको आत्मदाहले ल्याएको अरब क्रान्ति जस्तै भ्रष्टाचार, नेतातन्त्र र कर्मचारीतन्त्रको विरुद्धमा नेपालमा क्रान्ति ल्याउने हो कि, भन्न सकिन्न तर गरेर खान चाहने सोझासाझाहरूका लागि यो देश बाँच्नै नसक्ने सीमासम्म पुगेकै हो?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
