पोखरा- गण्डकी प्रदेशका मुख्यमन्त्री पृथ्वीसुब्बा गुरुङले अध्ययनबिना महिला र पुरुष बराबर हुन नसक्ने बताएका छन्। उनले भने, ‘महिला पनि नेता बन्न सक्छन्, तर त्यसको लागि आँट चाहिन्छ, अध्ययन चाहिन्छ।’ इतिहासमा नेताका श्रीमती, छोराछोरी जस्ता आफन्त मात्रै माथिल्लो तहमा भएको उनको भनाइ थियो।
बुधबार पोखरामा आयोजित ‘स्थानीय सरकारमा महिला सञ्चार माध्यमसंगको सहकार्यमा दुई दिवसीय कार्यशाला’ विषयक तालिमको उद्घाटन सत्रमा बोल्दै मन्त्री गुरुङले महिला र पुरुष अध्ययनले मात्रै बराबर हुने भनाइ राखेका हुन्।
महिलाले आफूलाई आइपर्ने कुनै पनि घटनाको प्रतिकार गर्न ‘हिरोइजम्’ देखाउन आवश्यक रहेको मुख्यमन्त्री गुरुङले औंल्याए। ‘महिलाहरुले आफूलाई पर्ने कुनै पनि प्रकारको हिंसाको लागि आफै प्रतिकार गर्नुपर्छ, त्यसको लागि तपाईंहरुले हिरोइजम् देखाउन आवश्यक छ,’ उनले भने। महिलाहरुलाई सक्षम बन्न पुरुषले पनि सोही अनुसार वातावरण गरिदिनुपर्ने र अवसरको सिर्जना गरिदिनुपर्ने उनले बताए।
समाजमा भ्रष्टाचार हटाउन महिलाको योगदान चाहिने मुख्यमन्त्री गुरुङको भनाइ थियो। ‘महिलाले चाहे जे पनि हुन्छ, त्यसको लागि महिला आफै जागरुक हुनुपर्छ,’ उनले भने, ‘तर अफसोस जहाँ पनि पुरुषको मात्र गन्ध भएकाले नियम, कानुन प्रभावकारी बन्न सकेको छैन।’
पुरुषलाई रोएर होइन, तर्कले जित्नुपर्छ : मन्त्री पुनमगर
गण्डकी प्रदेशका सामाजिक विकासमन्त्री नरदेवी पुनमगरले पुरुषलाई रोएर भन्दा तर्कले जित्न आवश्यक रहेको बताइन्। ‘अधिकाशं महिलाहरु समस्याको समाधान गर्नुको सट्टा उल्टै रोएर बस्ने गरेको छन्,’ उनले भनिन्, ‘यसरी भएन तार्किक क्षमताले पुरुषलाई जित्न आवश्यक छ ।’
महिलालाई सक्षम र आत्मनिर्भर बनाउन स्वरोजगार बनाउन जरुरी रहेको मन्त्री पुनमगरले औंल्याइन्। ‘महिलालाई सक्षम बनाउन मानव संसाधन विकास गर्नु एकदमै जरुरी छ,’ उनले भनिन्, ‘त्यसका लागि महिलामैत्री कानुन बनाउनु पर्छ, पाएको अधिकार उपयोग गर्ने क्षमता बृद्धि गर्नु पर्छ, महिलामाथि हुने विभेदको अन्त्य गर्नुपर्छ।’
कस्तुरीले आफ्नो पेटको बासना थाहा नपाए जस्तै महिलाहरुले पनि आफ्नो क्षमता थाहा नपाएको गण्डकी प्रदेशका सांसद रावीव पहारीले बताए। सक्षम बन्नका लागि सर्वप्रथम आफ्नो शक्ति पहिचान गर्न आवश्यक रहेको उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790058826.png)
-1790058103.png)
-1786602170.png)
-1789631269.jpg)
