काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगार प्रवर्धन बोर्डको कार्यकारी निर्देशकमा राजन श्रेष्ठलाई नियुक्त गरेको छ।
मन्त्रालयद्वारा गठित सिफारिस समितिको सिफरिसका आधारमा साउन २० मा बसेको मन्त्रिपरिषद् बैठकले बोर्डको कार्यकारी निर्देशकमा श्रेष्ठलाई नियुक्त गर्ने निर्णय गरेको थियो।
उनी यसअघि मन्त्रालयअन्तर्गत स्विस सरकारको सहयोगमा सञ्चालित सामी परियोजनामा कार्यक्रम अधिकृत थिए।
श्रम मन्त्रालयबाट मंगलबार नियुक्तपत्र लिएका श्रेष्ठले बुधबारदेखि कार्यभार सम्हालेका छन्।
बोर्डका प्रमुख कार्यकारीका लागि ५ जनाको आवेदन परेको थियो। प्रतिस्पर्धामा सबैलाई पछि पार्दै श्रेष्ठ पहिलो नम्बरमा छनोट भएका थिए।
मन्त्रालयले कार्यकारी निर्देशकका लागि स्नातक तह उत्तीर्ण गरी सरकारी वा गैरसरकारी क्षेत्रमा ७ वर्षभन्दा धेरै काम गरेको अनुभव भएका व्यक्तिले प्रतिस्पर्धा गर्न पाउने व्यवस्था छ।
करिब दुई साताअघि सिफारिस गरिएका श्रेष्ठको झन्डै चार वटा मन्त्रिपरिषद् बैठकपछि मात्र नियुक्तिको निर्णय भएको हो।
गत वैशाखमा तत्कालीन बोर्डका कार्यकारी प्रमुख रघुराज काफ्लेको समयावधि सकिएपछि कार्यकारीको पद रिक्त थियो। बोर्डका कार्यकारी पदको कार्यकाल ४ वर्षको हुन्छ। बोर्डमा कार्यकारी प्रमुख खुल्ला प्रतिस्पर्धाबाट छनोट गरिन्छ।
वैदेशिक रोजगार ऐन, २०६४ को दफा ३८ मा बोर्डको गठन सम्बन्धी व्यवस्था छ। वैदेशिक रोजगार व्यवसायलाई प्रवर्धन गर्ने, सुरक्षित, व्यवस्थित र मयार्दित बनाउने तथा वैदेशिक रोजगारमा जाने कामदार र वैदेशिक रोजगार व्यवसायीको हकहित संरक्षण गर्ने जिम्मेवारी बोर्डका कार्यकारी निर्देशकलाई हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
