काठमाडौं– २८ वर्षीय इन्की विलियम्स र २० वर्षका निको विलियम्स सहोदर दाजु–भाइ हुन्। कतारमा यसै नोभेम्बर २० देखि हुन गइरहेको विश्वकप फुटबलमा उनीहरू दुवै खेल्दैछन्। तर एउटै देशबाट भने होइन।
यी दुई दाजु–भाइ घानाबाट आएका बाबु–आमाबाट स्पेनमा जन्मिएका हुन्। यी दुवै स्पेनिस क्लब एथ्लेटिक बिल्बाओबाट खेल्छन्। दुवै फरवार्ड हुन्।
यसका बीच विश्वकपमा भने उनीहरू अलग–अलग देशबाट खेल्न गइरहेका छन्। दाजु इन्की आफ्ना बाबु–आमाको देश घानाबाट खेल्न गइरहेका छन् भने निको आफू जन्मिएको देश स्पेनबाट।
त्यसो त इन्कीले स्पेनको राष्ट्रिय टोलीबाट सन् २०१६ मा एक खेल खेलेका थिए। उनले बोस्निया एन्ड हर्जगोभिनाविरुद्ध एक मैत्रीपूर्ण खेल खेलेका थिए।
त्यसपछि उनले स्पेनको टोलीबाट खासै अवसर पाएनन्। यसैबीचमा उनलाई घानाको फुटबल संघले चासो देखायो।
विश्व फुटबल संघ (फिफा)को नियमअनुसार उनी घानाबाट खेल्न पाउने भए। त्यसपछि उनलाई गत जुलाईबाट घानाको टोलीमा बोलाइयो। त्यसपछि उनले घानाबाट दुईवटा मैत्रीपूर्ण खेल खेलिसकेका छन्।
यसैबीच, मुख्य प्रशिक्षक ओटो अड्डोले आगामी विश्वकपका लागि इन्कीलाई २६ सदस्यीय टोलीमा राखेका छन्।
यस्तै, स्पेनका मुख्य प्रशिक्षक लुइस इनरिकेले निकोलाई गत सेप्टेम्बरमा राष्ट्रिय टोलीमा बोलाएका हुन्। उनले स्पेनका लागि दुई खेल खेलिसकका छन्। कतार विश्वकपका लागि घोषणा गरिएको २६ सदस्यीय टोलीमा पनि निको परेका छन्। यससँगै दाजु–भाइ इन्की र निकोले फरक–फरक देशबाट विश्वकप खेल्ने निश्चित भएको छ।
आगामी विश्वकपमा घाना समूह ‘एच’मा परेको छ। जसमा पोर्चुगल, उरुग्वे र दक्षिण अमेरिका छन्।
यस्तै, स्पेन समूह 'ई' मा छ। जहाँ कोस्टारिका, जर्मनी र जापान छन्।
यदि, घाना र स्पेनले समूह पार गर्दै गएका इन्की र निकोले एक–अर्काविरुद्ध खेल्ने सम्भावना छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
