न्युयोर्क- एप्पल कम्पनी बजार मूल्य १० खर्ब अमेरिकी डलर पुग्ने निजी क्षेत्रको पहिलो कम्पनी बनेको छ।
बिहीबार वाल स्ट्रिटमा एप्पलको प्रतिसेयर मूल्य २०७ दशमलब ३९ अमेरिकी डलर कायम भएको छ। अमेरिकाको क्यालिफोर्नियामा प्रधान कार्यालय रहेको सूचना प्रविधि कम्पनी एप्पलको पहिलो त्रैमासिकमा आम्दानी बढेको विवरण सार्वजनिक भएलगत्तै सेयर मूल्यले नयाँ उचाइ छोएको हो।
यो ऐतिहासिक सफलता खासगरी सन् २०११ यता प्रमुख कार्यकारीका रुपमा नियुक्त भएका टीम कूकका लागि विशेष महत्वको छ। एप्पलका संस्थापक स्टिभ जब्स गम्भीर बिरामी भएपछि
प्रमुख कार्यकारीको पदमा नियुक्त भएका उनीमाथि कम्पनीलाई प्रतिस्पर्धी बनाउन चौतर्फी दबाब थियो। एप्पलका संस्थापक जब्सको अक्टोबर २०११ मा निधन भएको थियो।
स्टिभ जब्सको निधनपछि, विश्लेषकहरु र अरु उद्योग क्षेत्रका जानकारहरुले जब्सले झैं कुकले नयाँनयाँ र विशिष्ट प्रविधि भित्र्याउने कुरामा शंका व्यक्त गरेका थिए।
तर, कुक ठोस वित्तीय नतिजासँगै विस्तारै लगानीकर्ताबाट स्याबासी बटुल्न सफल भए र एप्पलका उत्पादनहरु उनले चीन र अरु विदेशी बजारमा विस्तार गर्न सक्षम भए।
सन् २००७ मा राज्य सञ्चालित कम्पनी पेट्रोचाइनाले मात्र १० खर्ब डलरको बजार मूल्यको सीमारेखा पार गरेको थियो, तर त्यसयता यसको बजार मूल्य लगातार खस्केको थियो।
'हो, मलाई एप्पलको सफलताप्रति गर्व छ, तर अंक मात्र पनि केही होइन भन्ने बुझ्नु आवश्यक छ,' कम्पनीका सहसंस्थापक वज्नियाकले याहू फाइनान्सलाई बताए।
अमेरिकी प्रविधि कम्पनीहरुले फैलिँदो बजारमा आफ्नो प्रभावलाई राम्रैसँग स्थापित गरेका छन् र अहिले सेयर मूल्यका आधारमा पाँच उत्कृष्ट कम्पनीमा पहिचान बनाएका छन्। एप्पलको पछिपछि एमेजोन, गुगल, माइक्रोसफ्ट र फेसबुक छन्।
विश्व बैंकको सन् २०१६ को तथ्याङ्क अनुसार, १० खर्ब डलर भनेको इन्डोनेसियाको झन्डै वार्षिक कूल गार्हस्थ्य उत्पादन बराबर हो, र बेल्जियमको भन्दा दोब्बर हो।
अमेरिकी सेयर बजारको मुख्य परिसूचक डाउले पनि पहिलोपटक २५ हजार विन्दु पार गरेको छ। '१० खर्ब डलरको उचाई छुनु भनेको मनोवैज्ञानिक कुरा हो र यसले बजारमा वृद्धि र आकार दुवैमा कम्पनीको प्रभाव बलियो छ भन्ने सन्देश दिन्छ,' एस एन्ड पि डाउ जोन्सका वरिष्ठ विश्लेषक होवार्ड सिल्भरब्लास्टले बताए।
सन् २००७ मा स्टिभ जब्सले आइफोनको पहिलो मोडेल सार्वजनिक गरेयता हालसम्म एप्पलले एक अर्बभन्दा बढी मोबाइल सेट बिक्री गरिसकेको छ। सेयर पुनः खरिद गर्न एप्पलले अर्बौं डलर खर्च गरेका कारण पनि एक खर्ब डलरको बजार मूल्य कायम गर्न मद्दत पुगेको बताइन्छ।
एप्पलले मोबाइलको हार्डवेयर र सफ्टवेयरमा नियन्त्रण गर्ने विशिष्ट प्रविधि अपनाएको छ र मोबाइल प्रयोगकर्ताले एप स्टोरबाट आफूलाई चाहिएका एप्सहरु डाउनलोड गर्नुपर्छ, जसका कारण राजश्वमा थप वृद्धि भएको छ।
पछिल्लो पटक अमेरिका–चीन व्यापार विवाद, बौद्धिक अधिकार तथा प्रविधिमा आएका नयाँनयाँ चुनौतीका कारण कम्पनीले सङ्घर्ष गर्नु परेको छ। एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
