काठमाडौं– राष्ट्रिय खेलकुद परिषद (राखेप) ले राष्ट्रिय तथा अन्तर्राष्ट्रिय पदक विजेता खेलाडीलाई सम्मान गर्ने नीतिअनुरुप यो वर्ष साढे ६ सय बढीलाई नगद पुरस्कार प्रदान गरेको छ। नगद पुस्कार स्वरुप राखेपले ७५ लाख ३५ हजार रुपैयाँ खेलाडीलाई वितरण गरेको छ । ओलम्पियनको एक वर्षको भत्ता जोड्दा नगद पुरस्कारको कुल रकम १ करोड १ लाख रुपैयाँ रहेको छ।
राखेपले यो वर्षदेखि ओलम्पियनलाई आजीवन मासिक भत्ता दिन सुरु गरेको छ। सन् १९६४ को टोकियो ओलम्पिकदेखि सहभागी भएका ८० ओलम्पियनलाई मासिक ३ हजार रुपैयाँका दरले भत्ता उपलब्ध गराउन थालिएको हो। राखेपले हालसम्मका ओलम्पियनलाई साउन महिनादेखि आजीवन मासिक भत्ता उपलब्ध गराउन थालेको हो। ८० ओलम्पियनलाई जनही मासिक ३ हजार रुपैयाँका दरले रकम उपलब्ध गराइएको हो। ओलम्पियनका लागि मासिक कूल २ लाख ४० हजार रुपैयाँ भत्ताको प्रदान गरिनेछ भने बार्षिक बजेट २८ लाख ८० हजार रुपैयाँ रहेको छ।
यस्तै राखेपले एसियाली खेलकुदका पदक विजेतालाई पनि २०७४ मंसिर देखि २०७५ असारसम्म ८ महिनाको एक पदकका लागि ५ हजारका दरले रकम प्रदान गरेको छ। एसियन गेम्समा पदक जित्ने ८ जनालाई जम्मा ४ लाख ४० हजार रुपैयाँ प्रदान गरिएको छ।
पहिलो दक्षिण एसियाली खेलकुद (साग) देखि १२ औं सागका स्वर्ण विजेतालाई पनि पुरस्कृत गरिएको छ। साग ९४ स्वर्णधारीलाई एक स्वर्णका लागि मासिक ५ हजारका दरले कुल ४० लाख रुपैयाँ वितरण गरिएको छ। २०७४ मंसिरदेखि २०७५ असारसम्म जम्मा ८ महिनाको मासिक ५ हजारका दरले दिनु पर्ने पुरस्कार वितरण गरिएको हो।
यस्तै गत आर्थिक वर्ष स्वदेश र विदेशमा भएका विभिन्न अन्तर्राष्ट्रिय प्रतियोगिताका पदक विजेतालाई पनि नगद पुरस्कार प्रदान गरिएको छ। गत आर्थिक वर्षमा ४ सय १२ खेलाडीले अन्तर्राष्ट्रिय पदक जितेका छन् । गत वर्षको अन्तर्राष्ट्रिय पदक जित्ने खेलाडीलाई जम्मा १९ लाख २५ हजार रुपैयाँ प्रदान गरिएको ।
राखेपको आयोजनामा भएको राखेप च्याम्पियनसिपका विभिन्न खेलका उत्कृष्ट पुरुष र महिला खेलाडीलाई पुरस्कृत भएका छन्। गत माघको पहिलो साता सम्पन्न भएको एक महिने प्रतियोगितामा विभिन्न ३० खेल समावेश थिए। ३० खेलकै उत्कृष्ट पुरुषरमहिला खेलाडीले जनही १५ हजार नगद पाए। तेक्वान्दोको हकममा भने ग्योरोगी र पुम्सेमा छुट्टै उत्कृष्ट पुरुष÷महिला खेलाडी चयन गरिएकोले चारैलाई जनही ७ हजार ५ सय नगद पुरस्कार दिइयो। यो पुरस्कारको कुल रकम ९ लाख ३० हजार रुपैयाँ हुन आउछ।
राखेपका सदस्यसचिव केशवकुमार विष्टले खेलाडीलाई सम्मान गर्न सधैँ सकारात्मक भएको बताए। ‘यति धेरै संख्यामा खेलाडी नगदसहित सम्मान भएको पहिलो पटक हो। हामी यसलाई अझ ब्यापक बनाउँछौं,’ उनले भने, ‘अन्य खेलाडीलाई पनि नगद पुरस्कार दिन पनि हामी छलफल गरिरहेका छौं । सबै पदक विजेतालाई सम्मान गर्ने हाम्रो लक्ष्य हो ।’
प्रतियोगिता, खेलाडी र नगद रुपैयाँ
ओलम्पियन – ८० जना – मासिक ३ हजार – मासिक २ लाख ४० हजार, बार्षिक २८ लाख ८० हजार रुपैयाँ
एसियल खेलकुद– ८ जना– मासिक ५ हजार ८ महिनाको – ४ लाख ४० हजार रुपैंयाँ
साग खेलकुद– ९४ जना – मासिक ५ हजार ८ महिनाको – ४० लाख रुपैयाँ
अन्तर्राष्ट्रिय पदक विजेता – ४१२ जना– १९ लाख २५ हजार रुपैयाँ
राखेप च्याम्पियनसिप– ६२ खेलाडी– ९ लाख ३० हजार रुपैयाँ
जम्मा – ६५६ खेलाडी– १ करोड १ लाख रुपैयाँ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772456563.png)
-1764146706.png)
