काठमाडौं- पञ्चायतकालदेखिका चर्चित नेता कमल थापाको बहुदल कालमा पनि रजगज कायमै रह्यो। ‘मण्डले’देखि 'मुसा'सम्मका अनेक शब्दावलीले उनलाई निशाना बनाइयो, तर राजनीतिमा उनी सधैं चर्चित भइरहे। बहुदलकालका मन्त्री थापा, दोस्रो जनआन्दोलनताका गृहमन्त्री थिए। त्यतिबेला उनी आन्दोलनकारीको तीव्र आक्रोशको केन्द्रमा थिए। तर, गणतान्त्रिक सरकारमा पनि उनलाई सत्ता सहयात्री बनाउन दलहरु पछि परेनन्।
उनै थापाको संसदीय प्रतिस्पर्धा भने खासै सुखद छैन। २०४८ देखिका सबै निर्वाचनमा उनी उम्मेदवार बनेका छन्। उनले अधिकांश निर्वाचनमा हार बेहोरेका छन्। दुईटा निर्वाचनमा भने उनी दुई निर्वाचन क्षेत्रबाट प्रतिस्पर्धामा उत्रिएका थिए। यी निर्वाचनमा उनी पाँच पटक एमाले उम्मेदवारसँग पराजित भएका छन्। तर, यसपटक भने उनलाई एमाले नै हात थाम्दैछ। थापा एमालेकै चुनाव चिह्न सूर्यबाट प्रतिस्पर्धामा उत्रिँदैछन्। उनी मकवानपुर- १ बाट उम्मेदवार बन्दैछन्।
कतिसम्म भने, एमालेले मकवानपुर- १ का लागि मकवानपुरका इन्चार्ज रामेश्वर रानालाई उम्मेदवार बनाउने निर्णयसमेत गरिसकेको थियो। त्यसै अनुसार तयारी पनि सुरु भएको थियो। तर, ओलीले शनिबार अघिल्लो निर्णयलाई बेवास्ता गर्दै राप्रपा नेपालका अध्यक्ष कमल थापालाई सूर्य चिह्नमा प्रतिस्पर्धामा उत्रिन दिने गरी सहमति गरे।
थापाले एमालेसँग सहकार्य गरेर चुनाव लड्न पाउनु आफ्ना निम्ति खुसीको कुरा भएको बताएका छन्। आइतबार मकवानपुर- १ का लागि उम्मेदवारी दर्ता गराएपछि उनले भने- ‘राष्ट्रियता र लोकतन्त्रको पक्षमा निरन्तर सक्रिय रहेको पार्टी नेकपा एमालेसँग सहकार्य गरेर चुनाव लड्न पाउनु मेरा निमित्त खुसीको कुरा हो। र साथसाथै चुनावमा विजयलाई सुनिश्चत गर्नका निमित्त मैले नेकपा एमालेकै चुनाव चिह्न सूर्यबाट प्रतिस्पर्धा गर्दैछु।’
देशमा गणतन्त्रको चाहना उच्च रहेको २०६३ देखि नै थापाले राजतन्त्र र हिन्दू राज्यलाई आफ्नो मूल मुद्दा बनाउँदै अघि बढेका थिए। पछिल्लो समय उनले राजतन्त्र पुनःस्थापनालाई अजेन्डामा राखेका छैनन्। तर, उनको मूल परिचय यी दुई अजेन्डासँग जोडिएको र दक्षिणपन्थी नेताको रुपमा स्थापित छ। तर, एमालेले पार्टीको घोषित सिद्धान्तसँग मेल नखाने थापा जस्ता व्यक्तिलाई आफ्नै पार्टीबाट उम्मेदवार बनाएको भन्दै पार्टीभित्रै असन्तुष्टि छ। घनश्याम भुसाललाई टिकट नदिइएको र थापालाई दिइएको भन्दै एमालेप्रति आफ्नै कार्यकर्ताले समेत सामाजिक सञ्जालमार्फत् व्यंग्य गरेको पढ्न सकिन्छ।
थापालाई टिकट दिइएकोमा असन्तुष्ट बनेका मकवानपुरका एमालेका कार्यकर्ताले आइतबार पार्टी कार्यालयमा तालाबन्दीसमेत गरेका छन्। उनीहरुले हेटौँडा सानोपोखरामा रहेको जिल्ला पार्टी कार्यालयमा तालाबन्दी गरेका हुन्।
२०४८ पछि मकवानपुरमा थापाको मुख्य प्रतिस्पर्धा नै एमालेसँग भएको पाइन्छ। २०४८ मा उनी मकवानपुर- १ बाट प्रतिस्पर्धी बनेका थिए। तर, एमाले उम्मेदवारसँग पराजित भए। एमाले उम्मेदवार कृष्णप्रसाद दाहालले १४ हजार १४८ मत पाएका थिए। राप्रपा (थापा)का उम्मेदवार थापाले भने ९ हजार ८२५ मत मात्रै पाए। कांग्रेस उम्मेदवार अशोक श्रेष्ठले ४ हजार ६४ मत पाएका थिए।
२०५१ मा भएको मध्यावधि निर्वाचनमा थापाले नयाँ जुक्ति लगाए। सो निर्वाचनमा उनी दुई निर्वाचन क्षेत्रबाट उम्मेदवार भए, मकवानपुर- १ र मकवानपुर- २ बाट। १ बाट विजयी भए, २ मा पराजित भए। १ मा उनले २०४८ का विजेता दाहालसँग बदला लिन सफल भएका थिए।
मकवानपुर- १ मा राप्रपा उम्मेदवारको रुपमा थापाले १६ हजार ७५३ मत पाए। एमालेका कृष्णप्रसाद दाहालले १५ हजार ८२ मत पाए। स्वतन्त्र उम्मेदवार ओमु टेम्पा लामाले ५ हजार ५११ मत पाए।
सोही निर्वाचनमा मकवानपुर- २ मा भने थापा एमाले उम्मेदवार विरोध खतिवडासँग पराजित भएका थिए। खतिवडाले १६ हजार १५४ पाउँदा राप्रपाका उम्मेदवार थापाले ११ हजार ८७८ मत मात्रै पाए। स्वतन्त्र उम्मेदवार विश्वराज उप्रेतीले ४ हजार ८६६ मत पाए।
२०५६ को निर्वाचनमा पनि थापाले २०५१ कै रणनीति अपनाए। मकवानपुरकै दुई क्षेत्रबाट उम्मेदवार बनेका थापा दुवैतिर पराजित भए।
मकवानपुर- १ मा थापा पुरानै प्रतिस्पर्धी एमाले कृष्णप्रसाद दाहालसँग पराजित भएका थिए। दाहालले २० हजार ४४२ मत पाउँदा राप्रपाका थापाले १५ हजार ९८५ मत पाएका थिए। कांग्रेसबाट उम्मेदवार बनेका ओमु टेम्पा लामाले ८ हजार ७७३ मत मात्रै पाए।
त्यस्तै, मकवानपुर- ३ मा पनि थापा एमाले उम्मेदवारसँगै पराजित भए। एमाले उम्मेदवार वीरबहादुर लामाले १४ हजार ४७४ मत पाउँदा राप्रपाका थापाले १२ हजार २९३ मत मात्रै पाए। कांग्रेसका उदयमोहन श्रेष्ठले ६ हजार ६६१ मत पाए।
२०६४ मा सम्पन्न संविधान सभाको पहिलो निर्वाचनमा थापा मकवानपुर- ३ बाट प्रतिस्पर्धामा उत्रिए। तर, चौथो हुन पुगे। सो क्षेत्रमा तत्कालीन नेकपा माओवादीका उम्मेदवार प्रह्लाद लामिछाने विजय भए। माओवादीका लामिछानेले १८ हजार ५१४, एमालेका अनन्त प्रसाद पौडेलले १३ हजार १६३, कांग्रेसका रामचन्द्र अर्यालले ७ हजार ६९९ र राप्रपा नेपालका थापाले ३ हजार ८५३ मत पाए।
२०७० मा सम्पन्न संविधान सभाको दोस्रो निर्वाचन भने समानुपातिकतर्फबाट सभासद बनेका थिए।
२०७४ मा थापा मकवानपुर- १ बाटै प्रतिस्पर्धामा उत्रिए। थापाका लागि प्रतिस्पर्धी थिए, परिचित कृष्णप्रसाद दाहाल। दाहाल नै विजयी भए। वाम गठबन्धनका साझा उम्मेदवार उनले ४० हजार ६३१ मत सहित जित निकालेका थिए। कांग्रेसको समर्थन पाएका राप्रपाका थापाले ३४ हजार ६५८ मत पाए। नेकपा मालेका कुमार बहादुर संजेलले १ हजार ४१९ मत पाए।
मंसिर ४ मा हुने निर्वाचनमा मकवानपुर- १ मा थापाको मुख्य प्रतिस्पर्धा कांग्रेस उम्मेदवार महालक्ष्मी उपाध्याय डिनासँग हुने आकलन गरिएको छ। डिना सत्ता गठबन्धनको साझा उम्मेदवार हुन्। उनी मकवानपुरमा २०४८ सालदेखि प्रतिस्पर्धा गर्दै आएकी छिन्। अर्कोतर्फ, थापाकै कुनै बेलाका सहयात्री तथा राप्रपाका नेता दीपकबहादुर सिंह पनि यस क्षेत्रमा प्रतिस्पर्धा गर्दैछन्। सिंह वैशाखको स्थानीय तह निर्वाचनमा पनि प्रतिस्पर्धामा थिए तर पराजित भएका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
