काठमाडौं– सशस्त्र प्रहरीले ३ महिनायता विपद व्यवस्थापनका लागि ७ हजार ७ सय १९ जना जनशक्ति परिचालन गरिएको जनाएको छ।
सशस्त्र प्रहरी बलले हाल करिब ३ हजार जनशक्तिलाई तत्काल देशभर परिचालन गर्ने व्यवस्था गरिएको स्पष्ट पारेको छ। देशका विभिन्न भागमा वर्षासँगै बाढी, पहिरो र डुबानको समस्या बढ्दै गइरहेका बेला सशस्त्र प्रहरीले करिब ३ हजार जनशक्तिलाई तत्काल देशभर परिचालन गर्ने व्यवस्था गरेको जनाएको हो।
मंगलबार काठमाडौंमा पत्रकार सम्मेलन गरी सशस्त्र प्रहरी बलका प्रवक्ता एवम् सशस्त्र प्रहरी नायब महानिरीक्षक बाबुराम पाण्डेले देशका विभिन्न भागमा रहेका ब्यारेकमा गरी ३ हजार जनशक्ति कुनै पनि बेला परिचालन हुने गरी व्यवस्था गरिएको स्पष्ट पारे। उनले प्रत्यक्ष रुपमा जनतालाई सेवा प्रदान गर्न दैनिक रुपमा करिब ९ हजारको जनशक्ति परिचालन गरिएको पनि जानकारी दिए। सशस्त्र प्रहरी बलले आपतविपदमा उद्दार कार्यका लागि बनाइएको टोलीलाई चौबिसै घण्टा तैनाथ गरिएको पनि जनाएको छ।
यसै महिनाबाट सशस्त्र प्रहरी बलमा सांगठनिक पुनर्संरचना सम्बन्धमा संक्षिप्त संगठन तथा व्यवस्थापन सर्वेक्षण २०७५ स्विकृत भई लागू गरिएको पनि जानकारी गराइएको छ। प्रवक्ता पाण्डेले सेवा प्रवाह र सुशासन कायम राख्न सशस्त्र प्रहरी बलको उचित व्यवस्था गरिएको पनि स्पष्ट पारे।
सशस्त्र प्रहरीले सिधै सम्पर्क गर्न हटलाईन सेवा ४२८७३४७ को पनि व्यवस्था गरेको छ।
हाल विद्यमान ५ वटा बाहिनीहरुको संख्या वृद्धि गरी सशष्त्र प्रहरीले ७ प्रदेश र उपत्यकामा गरी ८ वटा बाहिनी रहने व्यवस्था गरेको छ। त्यसैगरी सरुवा प्रणालीको नीति बनाई सशस्त्र प्रहरी अधिकृतहरुको सरुवा गर्ने व्यवस्था पनि गरिएको प्रवक्ता पाण्डेले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
