राजविराज– सप्तरीमा आफ्नै काकाद्वारा ७ वर्षीया बालिका बलात्कारको शिकार भएकी छिन्।
कञ्चनरुप नगरपालिका–८ बस्ने २५ वर्षीय गजेन्द्र साह सोनारले बालिकालाई बलात्कार गरेको प्रहरीले जनाएको छ। खडक नगरपालिका–९, लालपट्टीमा आफ्नै बहीनीलाई बलात्कार गरी हत्या गरेको घटना सेलाउन नपाउँदै अर्को घटना सार्वजनिक भएको हो। खडक नगरपालिकामा २२ वर्षीय दाजुले १२ वर्षीया बैनीको बलात्कार गरी हत्या गरेका थिए।
गजेन्द्रले कहिले फकाएर र कहिले डर त्रास देखाएर विगत १ महिनादेखि बालिकाको बलात्कार गर्दै आएको प्रहरीको भनाई छ। व्यापार÷व्यवसाय गर्ने बाबु–आमा स्थानीय कञ्चनपुर बजारमा गएको समय पारी उनले बालिकालाई बलात्कार गर्दै आएको इलाका प्रहरी कार्यालय कञ्चनपुरका इन्स्पेक्टर प्रतिक विष्टले बताए।
निरन्तरको बलात्कारपछि सिकिस्त हुँदै गएकी बालिकालाई परिवारका सदस्यले सोधखोज गर्दा घटना सार्वजनिक भएको हो। बालिकाले आफ्नी आमालाई घटनाको बारेमा जानकारी गराएकी थिइन्। बालिकाका अनुसार पछिल्लो पटक गत मंगलबार पनि गजेन्द्रले मुख थुनेर जबरजस्ती गरेको उनकी आमाले बताइन्।
धरानस्थित बिपी कोइराला स्वास्थ्य विज्ञान प्रतिष्ठानमा उपचारपछि शुक्रबार बालिकालाई घर ल्याइएको छ। आरोपित गजेन्द्र फरार छन्।
पीडित बालिकाको बयान र आमाबुवाको उजुरीका आधारमा मुद्दा दर्ता गरी घटनाको अनुसन्धान अघि बढाइएको र फरार रहेका गजेन्द्रको खोजी भइरहेको सप्तरीका एसपी मुकेश कुमार सिंहले बताए। ‘एकदमै जघन्य अपराध भएको छ।,’ एसपी सिंहले भने, ‘परिवारबाटै प्रहरीलाई ढिलो जानकारी आएकाले आरोपी भाग्ने मौका पाए पनि कुनै हालतमा दोषीलाई कारबाही हुन्छ।’
६ महिनामा २४ बलात्कारका घटना
सप्तरीमा बलात्कार र बलात्कार प्रयासका घटना बढ्दो रुपमा छन्। इन्सेक सप्तरीका अनुसार २०७४ पुस १७ देखि २०७५ असार ७ गते भित्र मात्रै सप्तरीमा २४ वटा बलात्कारका घटना भएका थिए। तथ्यांकअनुसार बालिका बलात्कारका २१ र महिला बलात्कारका ३ गरी २४ वटा घटना घटेका छन्।
२१ वटा बलात्कारका घटनामा २ वर्षका समेत गरी २२ बालिका पीडित छन्। आरोपितमा १२ र १३ वर्षका ५ बालकदेखि ६५ वर्षीय वृद्धसमेत गरी २८ जना रहेको प्रतिवेदनमा उल्लेख छ।
यसैगरी, महिला बलात्कार र यौन दुव्र्यवहारका समान ३/३ घटनामा ६ जना महिला पीडित भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
