काठमाडौं– नेपालमा रियालिटी शोलाई लिएर आम दर्शकमा निकै चासो रहन्छ। चाहे त्यो गायन होस वा नृत्य, वा अरु कुनै किसिमको प्रतियोगिताबारेको रियालिटी शो होस। नेपालमा कार्यक्रम प्रसारण भइरहेको अवस्थामा उनीहरु निकै चर्चामा रहन्छन्। तर, कार्यक्रममा विजेता भएपछि भने धेरैजसो रियालिटी शो जित्नेहरुले आफ्नो क्षेत्रमा राम्रो प्रगति भने गर्न सक्दैनन्। सीमित समयका लागि चर्चामा रहेपनि कालान्तरमा उनीहरु बेपत्ताजस्तै हुन्छन्।
नेपालमा गायन विधाको निकै चर्चित कार्यक्रम थियो ‘नेपाली तारा’ । उक्त कार्यक्रमको २०७२ को संस्करणमा विजेता बनेका थिए प्रताप लामा। तर, जित हासिल गरेसँगै उनी हराए। प्रतियोगितामा जितेपछि सम्झौताअनुसारका केही गीतहरु सार्वजनिक त भए, तर खासै चर्चामा आउन सकेनन्। दुई वर्षपछि २०७४ मा नेपाल आइडलमा उनले भाग लिए। तर, त्यहाँ पनि उनको प्रस्तुति खासै जम्न सकेन। केही समयसम्म चर्चामा रहेपछि कलान्तरमा प्रतापको पुरानै हविगत भयो।
प्रतियोगिता जितेसँगै जुन गतिमा उनको करिअर अघि बढ्नुपर्ने थियो, त्यो भएन। दर्जनभन्दा बढी गीत निकालेका उनी खासै चर्चामा रहन सकेनन्।
प्रतापजस्तै कैयौं रियालिटी शोका विजेताहरु छन्, जो अहिले चर्चामा त परको कुरा यो क्षेत्रमै देखिँदैनन्। कतिपयले आफू संलग्न क्षेत्रमा काम गरिरहेको भएपनि उनीहरुको खासै चर्चा छैन।
यस्तैमध्येमा पर्छिन विष्णु चेम्जोङ। नेपाल टेलिभिजनबाट प्रसारण हुने ‘नेपाल स्टार’बाट चर्चामा आएकी थिइन् उनी। प्रतियोगिता चलिरहँदासम्म उनको चर्चा निकै थियो। जुन गति र मात्रामा उनको चर्चा थियो, त्यो त्यसरीनै हरायो। कार्यक्रम सकियो, विष्णु पनि हराइन्।
अन्तर्राष्ट्रिय जगतमा राम्रो नाम र स्थापित ब्राण्ड रहेको नेपाल आइडलका विजेताहरुको पनि हालत उस्तै छ। २०७४ बाट पहिलो पटक प्रसारण सुरु भएको यो कार्यक्रमको पहिलो सिजनको विजेता बुद्ध लामा भएका थिए। प्रतियोगिताको पहिलो सिजन प्रसारण भइरहेको बेला बुद्धको जति चर्चा थियो, त्यो कार्यक्रमको समाप्तीसँगै विस्तारै सेलाउँदै गयो। एक त उनी आफ्नो क्षेत्रमा सक्रिय रुपमा देखिएनन्। अर्कातिर, उनले आइडलसँगको सम्झौताभन्दा बाहिर गाएका गीतहरु खासै चर्चामा आउन सकेनन्।
त्यस्तै, नेपाल आइडलकै दोस्रो र तेस्रो सिजनका विजेताको अवस्था पनि बुद्धको भन्दा फरक छैन्। दोस्रो सिजनका विजेता रवि ओड केही समय चर्चामा रहे। धनगढीका उनको जितलाई निकै महत्त्वका साथ पनि हेरिएको थियो। तर, प्रतियोगिता जितेपनि उनले आफ्नो पहिचान भने बनाउन सकेनन्।
यता, सज्जा चौलागाईंको अवस्थामा पनि धेरै अन्तर छैन। सज्जा आइडल जितेपछि गुमनाम जस्तै भएकी छिन्। उनका गीतहरु कहिले सार्वजनिक हुन्छन् र कहिले हराउँछन्, पत्तै हुँदैन्।
अर्को चर्चित कार्यक्रम ‘द भोइस’को नेपाली फ्रेन्चाईज ‘द भोइस अफ नेपाल’का विजेताहरुको अवस्थामा पनि धेरै फरक छैन। पहिलो सिजनका सिडी विजय अधिकारी गीत त सार्वजनिक गरिरहेका छन्, तर उनको चर्चा छैन। उनका गीतहरुले अहिले युट्युबमा १ लाखभन्दा धेरै भ्युज पाउन पनि कठिन छ। गत साता सार्वजनिक भएको उनको ‘फरक भो’ बोलको गीत ९ दिन बितिसक्दा पनि १८ हजारभन्दा धेरै पटक हेरिएको छैन।
दोस्रो सिजनका विजेता राम लिम्बू पनि संगीत क्षेत्रमा त छन्, तर चर्चामा छैनन्। गत महिना उनले विमोचना लोम्जेलसँग ‘माया भन्ने कुरा’ बोलको गीत गाएका थिए। तर, उक्त गीत खासै चर्चामा समेत आएन्। हालसम्म उक्त गीतमा ४० हजार भ्युज पनि कटेको छैन।
तेस्रो सिजनका किरण गजमेरको अवस्था पनि उस्तै छ। एक त उनका धेरै गीतहरु सार्वजनिक नै भएका छैनन्। सार्वजनिक भएका गीतहरु चर्चामा आउनै सकेका छैनन्।
रियालिटी शोले प्रतिभाशालीहरुलाई आफ्नो प्रतिभा प्रस्तुत गरेर दर्शक तथा स्रोतामाझमा पहिचान बनाउन मद्दत गर्ने भनिएपनि खासै त्यो अवस्था देखिएको छैन। नेपालमा प्रसारणको समय र प्रतियोगिता हुँदाको समयमा चर्चामा रहेपनि शो जित्ने प्रतियोगीहरुको निम्ति नै यी कार्यक्रम खासै उपलब्धिमुलक देखिएका छैनन्।
लोकगीत गायनमा निकै महतत्त्व राख्ने भन्दै प्रचार भएको रियालिटी शो ‘लोकस्टार’का विजेताको पनि अहिले खासै चर्चा छैन। पहिलो सिजनको विजेता बनेका शनि विश्वकर्मा अहिले कहाँ छन् र उनको सांगीतिक यात्रा कस्तो चलिरहेको छ, कुनै चर्चा छैन।
शनिले केही संख्यामा गीतहरु निकालेपनि तिनले राम्रो माहोल सिर्जना गरेका छैनन्। युगल गायनमा गाएका केही गीतहरु चर्चामा त पुगेका छन्, तर उनको एकल गायनमा भएका गीतहरु भने धेरै हाइप लिन सकेका छैनन्।
रियालिटी शो जितेर पनि हराउने अन्य प्रतियोगीहरुमा सिंगिङ स्टारकी विजेता ऋतु लामा, खोजी प्रतिभाको कार्यक्रमकी विजेता दुर्गा परियार, तिम्रो सुर मेरो गीतकी महिलातर्फ विजेता प्राश्ना शाक्यलगायतका थुप्रैको नाम आउँछ।
केही हदसम्म रियालिटी शो जितेर पनि सफलताको शिखर चुम्नेहरुमा भने गायिक सन्तोष लामा र दीपक लिम्बू छन्। त्यसबाहेक प्रतियोगितामा भाग लिएर विजेता नभएपनि चर्चामा रहिरहेका र आफू सम्बन्धित क्षेत्रमा पहिचान बनाउन सक्नेहरुमा इन्दिरा जोशी, निशान भट्टराई, प्रताप दासलगायतका कलाकारहरू रहेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
