काठमाडौं– स्थानीय तह निर्वाचनको परिणाम सार्वजनिक हुने क्रम अन्तिमतिर पुग्दा देशभरिका सात पालिकामा तीन पार्टीले ‘क्लीन स्वीप’ गरेका छन्। नेकपा एमालेले मात्र पाँच पालिका क्लीन स्वीप गर्दै 'गढ' कायम गरेको छ।
एमालेले पाल्पाका दुई पालिका निस्दी र पूर्वीखोला गाउँपालिकासहित मोरङको रंगेली नगरपालिका, लमजुङको क्वालासोथार र बाजुराको गौमुल गाउँपालिकामा एकलौटी जित हासिल गरेको हो। नेपाली कांग्रेसले संखुवासभाको चिचिला र नेपाल मजदुर किसान पार्टी (नेमकिपा)ले भक्तपुर नगरपालिकामा क्लीन स्वीप गरेका छन्।
पाल्पाको निस्दी गाउँपालिकामा एमालेले अध्यक्ष र उपाध्यक्षसहित सबै सात वटा वडाका अध्यक्ष र सदस्यमा जित हासिल गरेको छ। अध्यक्षमा एमालेका मुक्तबहादुर सारुले ६ हजार ६५२ मत पाउँदा निकटतम् प्रतिद्वन्द्वी कांग्रेसका गोविन्दप्रसाद अर्यालले ३ हजार ४६६ मत पाए। उपाध्यक्षमा एमालेकी तिरनकुमारी श्रेष्ठले ६ हजार ६३८ मत पाउँदा निकटतम् प्रतिद्वन्द्वी नेकपा माओवादी केन्द्रका रामप्रसाद खत्रीले ८३० मत पाए। यहाँ एमालेले अध्यक्षमा सारुलाई दोस्रो पटक उम्मेदवार बनाएको थियो।
निस्दीका सातमध्ये वडा नं. १ मा एमाले वडाध्यक्ष २८ मतले विजयी भए। अन्य वडामा भने एमालेले फराकिलो अन्तरले जित हासिल गरेको छ।
गएको स्थानीय निर्वाचनमा निस्दीको गाउँपालिका अध्यक्ष र उपाध्यक्ष जिते पनि वडा नं. १ र ७ मा कांग्रेसले जित हात पारेको थियो। वडा नं. १ मा कांग्रेसका वडाध्यक्षका उम्मेदवार पूर्णबहादुर खाण २७५ मतले र वडा नं. ७ मा कांग्रेसका गगनसिंह सोती १८ मतले विजयी भएका थिए।
पाल्पाकै पूर्वी खोलामा पनि सत्ता गठबन्धनलाई फराकिलो अन्तरले पराजित गर्दै एमालेले क्लीन स्वीप गरेको छ। ६ वटा वडा रहेको यो गाउँपालिकामा एमालेले २०७४ सालमा पनि क्लीन स्वीप गरेको थियो। यसपटक एमालेले अध्यक्ष र उपाध्यक्षकै उम्मेदवार दोहोर्याएको थियो।
अध्यक्षमा एमालेका नुनबहादुर थापाले ६ हजार ३९ मत पाउँदा नेकपा एकीकृत समाजवादीका मीनप्रसाद गिरीले १ हजार २५७ मत पाए। उपाध्यक्षमा एमालेकी भगीरथी शर्माले ५ हजार ८९४ मत पाउँदा कांग्रेसकी विष्णुकुमारी आचार्यले २ हजार २५० मत पाएकी थिइन्। वडा नं. ६ मा एमालेका वडाध्यक्ष उम्मेदवार धनबहादुर घर्ती ३७ मतले विजयी भए। अन्य वडामा भने मतान्तर फराकिलो छ।
मोरङको रंगेली नगरपालिकामा पनि एमालेले क्लीन स्वीप गरेको छ। मेयरमा विजयी दिलीपकुमार अग्रवालले अघिल्लो पटक पनि जितेका थिए। तर, उनी नेकपा माओवादी केन्द्रबाट विजयी भएका थिए। त्यति बेला मेयर, उपमेयरसहित तीन वडा माओवादी केन्द्रले जितेको थियो। कांग्रेसले पनि तीन र तत्कालीन संघीय समाजवादी फोरमले दुई वडा जित्दा एमालेले एउटामा मात्र विजय हासिल गरेको थियो।
यसपटक तत्कालीन मेयर अग्रवाल एमाले प्रवेश गरेर मेयरको उम्मेदवार बनेका हुन्। उनले १२ हजार ८६१ मत पाउँदा उनका निकटतम् प्रतिद्वन्द्वी कांग्रेसका मोदराज घिमिरेले ९ हजार ६१ मत पाए। अघिल्लो निर्वाचनमा पनि घिमिरे उनै अग्रवालसँग पराजित भएका थिए। त्यति बेला एमाले तेस्रो भएको थियो।
माओवादी केन्द्रबाट उम्मेदवार बनेका अग्रवालले ८ हजार ६८ मत पाउँदा घिमिरेले ६ हजार १८६ र एमाले उम्मेदवार सन्तोषकुमार साहले ३ हजार १२१ मत पाएका थिए। अग्रवालको प्रवेशपछि एमालेले सिंगो नगरपालिकामा एकलौटी जित निकालेको हो।
उपाध्यक्षमा एमालेकी भुमाकुमारी पराजुलीले ११ हजार ७९० मत पाउँदा उनकी निकटतम् प्रतिद्वन्द्वी जसपाका पन्नालाल मन्डलले ५ हजार १७५ मत पाए। नौ वडामध्ये कांग्रेस दुई वटामा प्रमुख प्रतिद्वन्द्वी हुँदा जसपा एउटामा निकट रह्यो।
उता, लमजुङको क्वालासोथार गाउँपालिकामा पनि एमालेले एकलौटी जित हासिल गरेको छ। एमाले उपमहासचिव पृथ्वी सुब्बा गुरुङको गृहपालिका क्वालासोथारमा अघिल्लो निर्वाचनमा कांग्रेसले वडा नं. २ र ८ मा जित हासिल गरेको थियो।
यसपटक पालिका अध्यक्ष र तीन वटा वडामा मंगोल नेशनल अर्गनाइजेसनसहित तीन पार्टीका उम्मेदवार थिए। उपाध्यक्षसहित पाँच वटा वडामा एमाले र कांग्रेसले मात्र प्रतिश्पर्धा गरेका थिए। अध्यक्षमा एमालेका सूर्यप्रसाद गुरुङ ३ हजार ८५६ मतसहित विजयी हुँदा उनका निकटतम् प्रतिश्पर्धी कांग्रेसका टेकबहादुर गुरुङले २ हजार ४८९ मत पाए। त्यस्तै उपाध्यक्षमा एमालेकी गमीमाया गुरुङले ३ हजार ९८९ मत पाउँदा कांग्रेसकी सिर्जना गुरुङले २ हजार ३४० मत पाइन्।
एमालेले बाजुराको गौमुलमा पनि क्लीन स्वीप गरेको छ। यहाँ कांग्रेसले अघिल्लो पटक वडा नं. २ मा जित हासिल गरेको थियो। तर, उक्त वडा यसपटक जोगाउन सकेन भने अन्य वडामा पनि जित हासिल गर्न सकेन।
एमालेले यहाँ अघिल्लो पटक निर्वाचित अध्यक्ष र उपाध्यक्षलाई नै फेरि उम्मेदवार बनाएको थियो। एमालेका हरिबहादुर रोकायाले ३ हजार ४३४ मत पाउँदा कांग्रेसका हिरेन्द्रबहादुर रोकायाले १ हजार ४७० मत पाए। उपाध्यक्षमा सीता रोकाया थापाले ३ हजार १९४ मत पाउँदा कांग्रेसकी उमा रोकायाले १ हजार ७४४ मत पाइन्।
कांग्रेसले एउटा स्थानीय तह संखुवासभाको चिचिला गाउँपालिकामा एकलौटी जित हासिल गरेको छ। तर, एक जना वडा सदस्य भने माओवादी केन्द्रले जितेको छ। कांग्रेस सबै पदमा विजयी हुँदा वडा नं. २ को एक खुला सदस्यमा माओवादी केन्द्रका जंगबहादुर राईले जितेका छन्।
गाउँपालिका अध्यक्षमा कांग्रेसका पासाङ नुर्बु शेर्पा १ हजार ८६१ मतसहित विजयी भए। उनका निकटतम् प्रतिद्वन्द्वी माओवादी केन्द्रका रिपुप्रसाद राईले ९०९ मत पाए। उपाध्यक्षमा कांग्रेसकी मनकला राईले १ हजार ८५४ मत पाउँदा निकटतम् प्रतिद्वन्द्वी एमालेकी विष्णुकुमारी राईले ९३४ मत पाइन्।
यो गाउँपालिका अघिल्लो पटक पनि कांग्रेसले नै फराकिलो अन्तरले जित हासिल गरेको थियो। तर, क्लीन स्वीप गर्न सकेको थिएन। वडा नं. २ मा माओवादी केन्द्रले जित हासिल गरेको थियो।
उता, भक्तपुर नगरपालिकामा फेरि पनि नेमकिपाले क्लीन स्वीप गरेको छ। मेयर र उपमेयरका उम्मेदवार दोहोर्याएको नेमकिपाले जित अन्तरसमेत बढाएको छ।
मेयरमा सुनिल प्रजापति २९ हजार २५२ मत पाएर विजयी हुँदा निकटतम् प्रतिद्वन्द्वी कांग्रेसका रामप्रसाद कासुला ३ हजार ४०७ मत पाए। अघिल्लो स्थानीय चुनावमा प्रजापतिले २५ हजार ७३० मत पाएर विजयी हुँदा कांग्रेसका उनै रामप्रसाद कासुलाले ६ हजार ५६० मत पाएका थिए।
उपमेयरमा रजनी जोशी २९ हजार ७५९ मतसहित विजयी हुँदा निकटतम् प्रतिद्वन्द्वी एमालेकी रञ्जना खर्बुजाले २ हजार ९८८ मत पाइन्। अघिल्लो निर्वाचनमा जोशी २५ हजार ७११ मत पाएर निर्वाचित हुँदा उनको निकटतम् प्रतिद्वन्द्वी गंगालक्ष्मी अवालले ६ हजार ५८७ मत पाएकी थिइन्। नेमकिपाले जितेको यो एक मात्र पालिका हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
