काठमाडौं– प्रधानमन्त्री शेरबहादुर देउवाको गृहजिल्ला डडेलधुरामा यसपटक नेपाली कांग्रेसले आफ्नो अवस्था सुधार गरेको छ। पार्टीको वडादेखि जिल्ला अधिवेशनका क्रममा चर्किएको आन्तरिक विवादले प्रभावशाली मानिएका केही नेताहरुले पार्टी छाड्दा पनि कांग्रेसले स्थानीय तहको निर्वाचनमा 'राम्रै' नतिजा हात पारेको छ।
२०७४ सालको तुलनामा कांग्रेसले एउटा पालिका थप गरेको छ। ७ स्थानीय तह रहेको डडेलधुरामा कांग्रेसले २०७४ को चुनावमा गन्यापधुरा गाउँपालिका, आलीताल गाउँपालिका, परशुराम नगरपालिका र भागेश्वर गाउँपालिका जितेको थियो। यसपटक आलीताल गाउँपालिका गुमाउन पुगेको कांग्रेसले २ पालिका अमगरगढी र नवदुर्गामा जित हासिल गरेको छ।
यसअघि अमरगढी र नवदुर्गा नेकपा एमालेले जितेको थियो। कांग्रेसले यसपटक जिल्ला सदरमुकाम रहेको अमरगढी नगरपालिका, भित्री मधेस क्षेत्रको परशुराम नगरपालिका, प्रधानमन्त्री देउवाको गृहपालिका समेत रहेको गन्यापधुरा गाउँपालिका, भागेश्वर गाउँपालिका र नवदूर्गा गाउँपालिकाको प्रमुख/अध्यक्ष जितेको छ।
माओवादी केन्द्रले यसअघि जितेको अजयमेरु गाउँपालिका जोगाउँदै आलीताल गाउँपालिका कांग्रेसबाट खोसेको छ।
नेकपा एमालेले भने यसअघि जितेका दुवै पालिका अमरगढी र नवदूर्गाको नेतृत्व नेपाली कांग्रेस त्यागेका नेता/कार्यकर्ता जोडिएको नेपाली कांग्रेस बीपीलाई दिएको थियो। जिल्लाका सबै पालिकामा कांग्रेस बीपीसँग तालमेल गरेको एमालेले कुनै पनि पालिकामा उपप्रमुख समेत जित्न सकेन।
एमालेको साथ र कांग्रेस बीपीको प्रस्तुति?
सत्ता गठबन्धनका प्रमुख दलहरु कांग्रेस, माओवादी केन्द्र र नेकपा एकीकृत समाजवादीबीच डडेलधुरामा तालमेल हुन सकेन। त्यसको प्रमुख कारण कांग्रेस भित्रको आन्तरिक किचलो नै थियो। उम्मेदवारी दर्ताको अन्तिम अवधिसम्म पनि हाल नेपाली कांग्रेस बीपीमा रहेका अधिकांश नेता/कार्यकर्ताहरु कांग्रेसमै थिए।
नेपाली कांग्रेस डडेलधुराका एक नेताका अनुसार पूर्वजिल्ला सभापति कर्ण मल्लकै भावनाअनुसार पनि जिल्लामा गठबन्धन नगरी कांग्रेसले एक्लै चुनावमा जाने रणनीति बनाएको थियो। तर, मल्लले आफ्नो पक्षका केही नेतालाई कांग्रेस बीपीमा पठाएर एमालेसँग तालमेलको रणनीति बनाउन थालेपछि पार्टीले उनलाई कारबाही कांग्रेसका ती नेता बताउँछन्।
सबै पालिकाको अन्तिम मतपरिणाम सार्वजनिक भइसक्दासम्म नेपाली कांग्रेस बीपीले २ वडामा मात्रै वडाध्यक्ष जितेको छ। गन्यापधुरा गाउँपालिकाको वडा नम्बर १ र अमगरगढी नगरपालिकाको वडा नम्बर ८ को वडाध्यक्षमा करुवा चुनाव चिह्न भएका कांग्रेस बीपीका उम्मेदवार विजयी भए।
बीपी कांग्रेसबाट अमरगढी–८ को वडाध्यक्षमा विजयी भएका नरबहादुर साँकी यसअघि २०७४ सालको निर्वाचनमा नेपाली कांग्रेसबाट वडाध्यक्ष निर्वाचित भएका थिए। कांग्रेस छाडेर बीपी कांग्रेसमा गएका साँकी पुन: वडाध्यक्षमा विजयी भएका हुन्।
एमालेले जिल्ला सदरमुकाम रहेको अमगरढी, नवदूर्गा गाउँपालिका र गन्यापधुरा गाउँपालिकाको प्रमुखमा कांग्रेस बीपीलाई सघाएको थियो। अमरगढीको प्रमुख र गन्यापधुराको अध्यक्षमा कांग्रेस बीपीका उम्मेदवारले निकटतम् प्रतिस्पर्धीको रुपमा मत प्राप्त गरे।
गन्यापधुरा गाउँपालिकामा नेपाली कांग्रेसका उम्मेदवार ईन्द्र बहादुर कार्की ३ हजार १८४ मत ल्याएर अध्यक्षमा निर्वाचित हुँदा उनको प्रतिस्पर्धीका रुपमा बीपी कांग्रेसका सुरेन्द्र बहादुर मालीले १ हजार ६०५ मत ल्याए।
अमरगढी नगरपालिकाको प्रमुखमा पनि बीपी कांग्रेसका उम्मेदवार दोस्रो स्थानमा रहे। नेपाली कांग्रेसका डिल्ली राज जोशी ३ हजार ६१९ मत ल्याएर अमरगढीको मेयरमा निर्वाचित हुँदा उनको प्रतिस्पर्धीका रुपमा बीपी कांग्रेसका हरि प्रसाद भट्ट ३ हजार ४२६ मत ल्याए।
स्थानीय तहको नतिजा:
१) अजयमेरु गाउँपालिका
अध्यक्ष: उमेशप्रसाद भट्ट/माओवादी केन्द्र
उपाध्यक्ष: बसन्ती पाल/ कांग्रेस
२) अमगरगढी नगरपालिका
प्रमुख: डिल्ली राज जोशी/कांग्रेस
उपप्रमुख: पार्बती देवी झुकाल/कांग्रेस
३) आलीताल गाउँपालिका
अध्यक्ष: शेरसिंह पार्की/माओवादी केन्द्र
उपाध्यक्ष: मैना कुमारी रावल/माओवादी केन्द्र
४) गन्याधुरा गाउँपालिका
अध्यक्ष: इन्द्रबहादुर कार्की/कांग्रेस
उपाध्यक्ष: ज्ञानुकुमारी सेटी/कांग्रेस
५) नवदूर्गा गाउँपालिका
अध्यक्ष: लक्ष्मीप्रसाद अवस्थी/कांग्रेस
उपाध्यक्ष: निर्मलाकुमारी वोगटी/कांग्रेस
६) भागेश्वर गाउँपालिका
अध्यक्ष: हेमराज चटौत/कांग्रेस
उपाध्यक्ष: पुष्पा ठकुराठी/कांग्रेस
७) परशुराम नगरपालिका
प्रमुख: भरत बडायर जोशी/कांग्रेस
उपप्रमुख: विमला कुमारी बोहरा/माओबादी केन्द्र
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
