वैशाख ३० गते हुने स्थानीय तहको निर्वाचनमा महानगरपालिका र उपमहानगरपालिकामा पाँच दलीय गठबन्धन भए पनि नगर र गाउँपालिकास्तरमा दलहरुले आफू अनुकूल गठबन्धन गरेका छन्। नेकपा एमालेले समेत सम्भव भएसम्मका स्थानमा अन्य दलसँग गठबन्धन गरेको छ। सप्तरीको कञ्चनरुप नगरपालिकामा जसपालाई नेपाली कांग्रेसको साथ छैन। कांग्रेसले छुट्टै उम्मेदवारी दर्ता गराएको छ। जसपाले भने पूर्वपत्रकार भोलाकुमार पासवानलाई मेयरकाे उम्मेदवार बनाएको छ। पासवानसँग नेपाल लाइभले गरेको कुराकानी-
तपाईं पत्रकारीता छाडेर किन राजनीतिमा आउनुभयो?
कोरोनाको पहिलो र दोस्रो लहरमा स्वयंसेवी भएर कञ्चनरूप नगरपालिकालगायत मधेस प्रदेशभर ९० हजार परिवारलाई राहत वितरण गरेँ। विपन्न २० हजार जनतालाई जाडोबाट बच्न ब्लान्केट र फाइबर सिरक वितरण गरेँ। कञ्चनरूपमा सञ्चालित आइसोलेसन सेन्टरमा कोरोनाका बिरामीलाई एक महिनासम्म खाना खुवाएँ। कञ्चनरूप र सिरहाको कर्जन्हामा करोडौँको मेडिकल सामग्री वितरण गर्दैगर्दा किन राजनीतिमा नआउने भन्ने प्रश्नले डेरा जमायो। भोलिका दिनमा यस्तै सामाजिक सेवालाई अझ बिस्तारित रूप दिन राजनीतिक बाटो रोजेको हुँ।
मैले आर्जन गरेको शिक्षा र मैले देखेको बाहिरी संसारले मलाई आफ्नै गाउँ फर्कायो। गाउँ फर्केपछि यहाँका बालबालिकाको मुहार फेर्ने कोसिसमा लागेँ। मैले जीवनको २० वर्ष पत्रकारितामा लगाएँ। यसैगरी, समाजशास्त्र अध्ययन गर्दै सामाजिक अभियन्ताका रूपमा काम गरेँ। पत्रकारिता र सामाजिक अभियानका क्षेत्रमा गरेका अनुभवले मलाई देश/विदेशमा पहिचान बनाउन सहयोग मिल्यो। तर, म आफ्नै ठाउँको परिवर्तनका लागि केही गर्ने जिम्मेवारीबोधका साथ गाउँ फर्किएँ।
वास्तबमा पत्रकारका रुपमा काम गर्दैगर्दा सीमान्तकृत वर्गको सवाल सिंहदरवारको सवाल बनेनन्। सञ्चारमाध्यमले समस्या देखायो, समाधानमा राज्य कहिले लागेन। त्यसैले म मेयरको उम्मेदवार बनेँ।
तपाईंका अजेन्डा के के छन्?
मेरा अजेन्डा भिन्नै केही छैनन्, सबैले घोषणा गरेजस्तै हुन्। तर, मैले भौतिक विकासभन्दा सामाजिक विकासलाई ध्यान दिएको छु। हरेक विकासका कार्यक्रममा सीमान्तकृत वर्गलाई केन्द्रमा राखेको छु। ‘हाम्रो सपना र जिम्मेवारी : निःशुल्क शिक्षा, सुलभ स्वास्थ्य र गरिबी अन्त्यका लागि रोजगारी’ भन्ने मूल नारा अघि सारेको छु।
विद्यालय शिक्षा, अनौपचारिक शिक्षा, सीप तथा रोजगारमूलक शिक्षा, सचेतना तथा जनचेतामूलक शिक्षा, उच्च शिक्षामा समन्वय गर्नेछु। स्वास्थ्यमा पोषणको पहुँच, निःशुल्क स्वास्थ्य बीमा, स्वास्थ्य साक्षरता, चेकजाँच, औषधि उपचार, जटिल रोग निवारणमा ध्यान दिनेछु। व्यावसायिक कृषि प्रणालीको विकासका लागि बाँझो जमिनमा उत्पादन बढाउन सहयोग गर्ने, कृषिका लागि आवश्यक पर्ने मल, बीउ, सिँचाइ आदिमा सहयोग, केन्द्र र बजारसम्मको पहुँच विस्तारमा जोड दिनेलगायत योजना छन्।
महिला हिंसा र जातीय विभेदरहित सामाजिक न्यायसहितको कञ्चनरूप नगरपालिका निर्माण गरिनेछ। सबैलाई बराबर अवसर, निर्णय तहमा नागरिकको सहभागिता, नागरिकप्रति उत्तरदायी र पारदर्शी जनप्रतिनिधि र कर्मचारी जस्ता विषय मेरो अजेन्डामा छन्।
भौतिक पूर्वाधार विकासमा चाहिँ के योजना छन्?
रोजगारी सिर्जना तथा उद्यमशीलता विकासमा भौतिक र डिजिटल पूर्वाधार निर्माण तथा सञ्चालन गर्ने योजना छ। उद्यमशीलता र गरिखाने कार्यक्रम अगाडि सारिनेछ। सामाजिक विकास समाजलाई सभ्य, उन्नत र आधुनिक तथा सक्रिय तुल्याउन अत्यावश्यकीय काम गर्नेछु। घरबास नभएकालाई आवासको व्यवस्था गरिनेछ।
डिटिजल कञ्चनरूपका लागि सार्वजनिक ठाउँ, विद्यालय आदिमा इन्टरनेटको व्यवस्था गर्ने, नगरपालिका अन्तर्गतका कामलाई अनलाइनमार्फत गर्ने व्यवस्था मिलाउने योजना पनि छ। नगरका पर्यटकीय ठाउँहरू पहिचान गरी प्रचारप्रसार गर्ने र पर्यटक भित्र्याउन सम्भाव्य सबै उपाय अपनाउने योजना पनि बनाएको छु।
प्रतिस्पर्धीलाई कसरी हेरिराख्नु भएको छ?
मेरो प्रतिस्पर्धी भनेको नेकपा एमाले र नेपाली काँग्रेसका उम्मेदवार हुन्। तर, अब जनताले कुराभन्दा कामलाई विश्वास गर्छन्। मैले हिजो पनि समाजसेवा गरेको हुँ। आज पनि गर्छु भनेको छु। मैले व्यक्तिभन्दा पनि समुदायका अजेण्डालाई अघि बढाएको छु। मेरो काम, योग्यता, क्षमतालाई जनताले मूल्यांकन गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
