वैशाख ३० गते हुने स्थानीय तहको निर्वाचनमा महानगरपालिका र उपमहानगरपालिकामा पाँच दलीय गठबन्धन भए पनि नगर र गाउँपालिकास्तरमा दलहरुले आफूअनुकूल गठबन्धन गरेका छन्। नेकपा एमालेले पनि सम्भव भएसम्मका स्थानमा अन्य दलसँग गठबन्धन गरेको छ। तर, काठमाडौंको टोखा नगरपालिकामा गठबन्धन छैन। नेकपा माओवादी केन्द्र र नेकपा एकीकृत समाजवादीले पनि फरकफरक उम्मेदवारी दर्ता गराएका छन्। मेयरमा कांग्रेसकी रजनी थापा उम्मेदवार छिन्। थापासँग नेपाल लाइभले गरेको कुराकानीको सम्पादित अंश-
तपाईं घरदैलो कार्यक्रममा व्यस्त हुनुहुन्छ। मतदाताहरूको प्रतिक्रिया कस्तो छ?
म घरदैलो कार्यक्रममा गइरहँदा आमाबुबाहरूले आशीर्वाद दिइरहनु भएको छ। युवाहरूमा जोसजाँगर देखिएको छ। यी कुराहरूले मलाई अगाडि बढाइरहेको छ। दिदीबहिनी आमाबुबाहरूले मलाई ‘तिमीले जित्छौं छोरी, अगाडि बढ’ भनेर हौसला दिइरहनु भएको छ।
मेयरको रुपमा रहँदा अजेण्डाहरू के छन्?
अघिल्लो पटक उपमेयरमा उम्मेदवार हुँदा जे अजेण्डा थियो, आज मेयर लड्दा पनि त्यही छ। मेरो अजेण्डा हिजो पनि त्यही थियो, आज पनि त्यही छ। मेयर लड्दा पनि ‘हाम्रो टोखा, राम्रो टोखा’कै अजेण्डा लिएर अघि बढिरहेको छु। हाम्रो टोखामा सबै नागरिक अट्ने छन्। त्यहाँ कुनै पार्टीगत कुरा हुने छैन। राम्रो विकास निर्माणका कामहरू सबै हुन्छ। जनताले प्रत्यक्ष अनुभव गर्ने खालको विकास हुन्छ। आम जनताको जीवनचर्या सहज हुने किसिमका योजना बनाउँछु।
घरदैलो गरिरहँदा शिक्षा, स्वास्थ्य, रोजगारीका कस्ता अजेण्डा अघि सार्नुभएको छ?
म आफू युवा हुँ। म आफैं विद्यावारिधि गरिरहेको मान्छे। यसैले पनि शिक्षा, स्वास्थ्य र रोजगारीको विषयमा मेरो आफ्नै दक्षता र योग्यता पनि छ। स्वास्थ्यमा मैले दीर्घरोगीहरूका लागि वार्षिक स्वास्थ्य शिविर, प्रेग्नेन्सी किटदेखि पोषण कार्यक्रम अघि सारेको छु। सामुदायिक अस्पतालमा सुविधा थपेर नयाँ ढंग र फरक रुपमा लैजाने योजना छ। आम जनतालाई रोजगारी सिर्जना गर्ने खालका विभिन्न योजना बनाएको छु।
काठमाडौंभित्रै भएर पनि टोखा कम विकसित क्षेत्र मानिन्छ। तपाईंको कार्यकालमा यसमा कस्तो फरकपन आउँछ?
मलाई पनि चित्त दुखेको कुरा यही हो। अहिले पनि आईटी पार्कजस्ता विषयको कुरा गर्नुपर्ने समयमा सडक, खनेपानीजस्ता पूर्वाधारको कुरा गर्नुपरेको छ। म जहाँ जाँदा पनि बाटोको समस्या देखेको छु। यसले चित्त दुखाएको छ। म टोखाको नगरप्रमुखको दावेदार हुँदै गर्दा यी सबै अवस्था देख्दा चित्त दुखेको छ।
विकास भनेको पूर्वाधार मात्रै होइन, सोच पनि हो। कतिपय सोच परिवर्तन भएपछि विकास आफै हुन्छ। विकास गर्न ठूलो कुरा छैन, हामी आइटीको फिल्डमा छौं, प्रविधि भएको अवस्थामा छौं। टोखाकै बासिन्दा कोही इञ्जिनियर हुनुहुन्छ, कोही विकास निर्माणको काममा हुनुहुन्छ। केही न केही हुनुहुन्छ। त्यसैले, हामीले समाजवेशी सहकार्य गरेर बजेटलाई सही ढंगले प्रयोग गरेमा विकास असम्भव छैन। विकास ढिला पनि हुँदैन।
रोगजारी र फोहोर व्यवस्थापनमा तपाईंका योजनाहरू के छन्?
मैले पटकपटक भनिरहेको छु। टोखा आफैंमा समृद्ध भएको ठाउँ हो। टोखाको सबैभन्दा ऐतिहासिक कुरा भनेको चाकु हो। म नगरपालिकाले समन्वय गरेर चाकु व्यवसाय अघि बढाउने सोचेको छु। यसलाई देश बाहिर पनि निर्यात गर्ने योजना बनाएकी छु। यसबाट रोजगारीको अवसर पनि बढ्नेछ। यसैबाट आउने आम्दानीले टोखामा संग्रहालय खोल्ने योजना पनि बनाएको छु। संग्रहालयमा ऐतिहासिक सांस्कृतिक सम्पदादेखि नेवार समुदायले गर्ने पूजापाठजस्ता विषय सबैसामु प्रस्तुत गर्ने योजना छ। यो भएपछि यहाँ पर्यटनको अवसर सिर्जना हुन्छ, जसबाट स्वतः रोजगारीको अवस्था बन्छ।
फोहोरको विषयमा पनि हाम्रो योजना हुन्छ। मैले सम्भवत नेपाले पहिलो पटक रिटेडा प्रालिमार्फत फोहोरबाट इँटा बनाएकी थिएँं। त्यसैले मलाई टोखाको फोहोर व्यवस्थापनमा कुनै समस्या छैन।
घरदैलो गरिरहँदा प्रतिस्पर्धीका रुपमा कसलाई देख्नुभएको छ?
मैले प्रतिस्पर्धीका रुपमा आफैंलाई देखिरहेको छु। हिजो उपमेयरमा लड्दा ५१ मतले चुनाव हारेको थिएँ। अन्य पार्टीलाई नभएर म आफूलाई नै प्रतिस्पर्धीका रुपमा देखेको छु। हिजोको रजनी थापा र आजको रजनी थापामा परिर्वतन आएको देखाउनु छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
