वैशाख ३० गते हुने स्थानीय तहको निर्वाचनमा महानगरपालिका र उपमहानगरपालिकामा पाँच दलीय गठबन्धन भए पनि नगर र गाउँपालिकास्तरमा दलहरुले आफूअनुकूल गठबन्धन गरेका छन्। नेकपा एमालेले पनि सम्भव भएसम्मका स्थानमा अन्य दलसँग गठबन्धन गरेको छ। यसबाहेक कतिपय स्थानमा प्रमुख पदमा स्वतन्त्र उम्मेदवारी दिएकाहरुले पनि चर्चा पाइरहेका छन्। सप्तरीको तिलाठी कोइलाडी गाउँपालिकामा भने उपाध्यक्ष पदमा स्वतन्त्र उम्मेदवारी दिएका शैलेन्द्र झाले स्थानीयमाझ चर्चा बटुलिरहेका छन्। उनका अजेन्डाकाे विषयमा नेपाल लाइभले गरेको कुराकानीको सम्पादित अंश-
तपाईं विभिन्न संघसंस्थाहरूमा आबद्ध भइ काम गरिरहनुभएको व्यक्ति, राजनीतिमा किन आउनु भयो?
मलाई राजनीतिप्रति पहिलादेखी नै चासो थियोे। कोरोनाको पहिलो लहरमा म गाउँमा थिएँ। सबै कार्यालयको काम भर्चुयल माध्यमबाट भइरहेको थियो। गाउँमा चार महिनादेखि एकल महिला र वृद्धवृद्धाले सामाजिक सुरक्षा भत्ता पाएका थिएनन्। धेरै जनाको रोजगारी गुमेको थियो। यही गाउँमा एक मजदुरले आत्महत्या गरे।
म विभिन्न संघसंस्थामा काम गरेको हुनाले राहतको लागि पहल गरेँ। गाउँपालिकामा आफ्नै नेतृत्वमा राहत बाडेँ। मोरङ र सप्तरीमा विपन्न वर्गका मान्छेलाई करिब एक करोड बराबरको राहत वितरण भयो।
यहाँका बिद्यालय डेढ वर्षजस्तो बन्द भए। तर, विवाह, व्रतबन्ध, भोजभतेर भने भइराखेका थिए। ट्युसन पढाइ हुने, विद्यालयमा पढाइ भने नहुने अवस्था भयो। त्यो देख्दा अच्चम लाग्यो मलाई। त्यति बेला पढाइलाई निरन्तरता दिन र रोजगारी गुमेकालाई काम दिन पहल गरेँ। अब जनप्रतिनिधि भएर सामाजिक समस्या र विकासमा काम गर्नसक्छु भन्ने हिम्मतले राजनीतिमा आएको छु।
मैले जर्मनीबाट ‘इन्फर्मेसन एण्ड कम्युनिकेसन्स इन्जिनियरिङ्ग ’ मा स्नातकोत्तर गरेको छु। साथै फिलिपिन्सबाट विकास व्यवस्थापन र बांगलादेशबाट अर्थशास्त्रमा स्नातकोत्तर गरेको छु। हाम्रो गाउँपालिकालाई विज्ञ नेतृत्व चाहिएको छ। मैले पढेको विषय र मेरो समन्वयकारी भूमिकाले मेरो गाउँका लागि योगदान दिनुसक्छु भन्ने विश्वास लिएर आएको हुँ।
तपाईंजस्तो विज्ञ मान्छे दल छाडेर किन स्वतन्त्रबाट, त्यो पनि उपाध्यक्षमा किन उम्मेदवारी दिनुभयो?
म कहिल्यै पनि कुनै दलको सदस्य भइनँ। मलाई दलले बोलाएका पनि हुन्, तर त्यहाँ मेरा मेरो अजेन्डा राख्ने र मेरो क्षमता देखाउने ठाउँ होलाजस्तो लागेन। म संघीयतामा विश्वास गर्छु। घोषणापत्रमा दलले जे लेखे पनि लागू गर्दैनन् भन्ने प्रष्ट भइसकेको छ। राजनीतिमा पनि मोनोपली छ। यहाँको सिन्डिकेट तोड्नका लागि भए पनि मैले स्वतन्त्र उम्मेदवारी दिएको हुँ। गाउँपालिकामा सीमित दलका सीमित मान्छेको हात हुन्छ। त्यसैले यहाँ राजनिति धेरै र विकास कम हुन्छ।
मैले अध्यक्षमा उम्मेदवारी दिन सक्थेँ, तर त्यसो गरिनँ। मलाई उपाध्यक्ष नै हुनुछ। उपाध्यक्ष उठ्नुको कारण पनि छ। उपाध्यक्षको चारवटा कार्यक्षेत्र छन्, न्यायिक समिति, बजार अनुगमन, संघसंस्थासँग समन्वय र उपभोक्ता। जसमा संघसंस्थासँग समन्वय गर्ने जिम्मेवारी छ, त्यसमा मेरो देश विदेशमा काम गरेको अनुभव छ।
तपाईंका एजेन्डा के–के छन्?
मैले एजेन्डा मुख्यत तिनवटा बुँदामा अघि सारेको छु। शिक्षा, स्वास्थ र सीप। सरकारी विद्यालयको गुणस्तर बढाउने योजना छ। म उपाध्यक्ष निर्वाचित भएँ भने निजी विद्यालयका विद्यार्थीलाई समेत सामुदायिक विद्यालयमा पढाउने वातावरण सिर्जना गर्नेछु। मैले टिच फर नेपालामा करिब सात वर्ष काम गरेको अनुभव छ।
महिलाको प्रजनन् स्वास्थ्यलाई ध्यानमा राख्नेछु। आज पनि तराईमा कुपोषण भएका बालबालिका छन्। पालिकामा तीन वटा निःशुल्क एम्बुलेन्स संचालन गर्नेछु।
सीपमुलक तालिम दिनेछु। यो पालिका भारतसँगको सीमामा पर्छ। यहाँ रोजगारीका लागि भारत जानेको संख्या बढ्दो छ। अब यहीँको स्रोतसाधन प्रयोग गरेर सीपमूलक तालिम दिइनेछ। ‘गुणस्तर शिक्षा, स्वास्थ्य परिवार, हातहातमा सीप, घर–घरमा रोजगार, तिलाठी–कोइलाडी बनोस सबल स्थानीय सरकार’ भन्ने मूल नारालाई अगाडी सारेको छु। मेरो प्रतिबद्धता तिलाठी–कोइलाडीको रूपान्तरण हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
